អតីតទីប្រឹក្សាកាសែតស្មារតីខ្មែរ លោក តាន់ ពិសិដ្ឋ ដែលមាននិន្នាការលម្អៀងទៅរកគណបក្សសមរង្ស៊ី ដែលបានភៀសខ្លួនចេញពីប្រទេសកម្ពុជាទៅកាន់ប្រទេសថៃ ក្រោយពីការចោទប្រកាន់និងចាប់ដាក់ពន្ធនាគារតេបី បានឲ្យដឹងថាលោកកំពុងជម្លៀសខ្លួនពីកន្លែងមួយទៅកន្លែងមួយដោយភាពភ័យខ្លាច ។
លោក តាន់ ពិសិដ្ឋ បានឲ្យដឹងថា ៖ «ខ្ញុំកំពុងតែភ័យខ្លាចសម្បើមណាស់ ឥឡូវនេះខ្ញុំរត់មកនៅជាយក្រុងហើយ ហើយខ្ញុំបែកបាក់ប្រពន្ធកូនខ្ញុំ ខ្ញុំអត់ដឹងថាប្រពន្ធកូនខ្ញុំសុខទុក្ខយ៉ាងម៉េច ? នៅឯណាទេ ? ខ្ញុំកំពុងតែឋិតនៅក្នុងការភ័យខ្លាចខ្លាំងណាស់ ឥឡូវនេះខ្ញុំអត់មានហ៊ានចេញក្រៅផ្ទះទេ» ។
ចំណែកឯអតីតកងកម្លាំងគ១៤ ឬកងទ័ពស្រមោល ដែលបង្កើតឡើងដោយលោក ជាម ច័ន្ទនី អ្នកតំណាងរាស្រ្តគណបក្សសមរង្ស៊ី ដែលកំពុងលាក់ខ្លួននៅក្នុងប្រទេសថៃ បានសម្ដែងការព្រួយបារម្ភពីសន្តិសុខផ្ទាល់ខ្លួនដែរ ។
លោក ជាម ច័ន្ទនី បានមានប្រសាសន៍ថា ៖ «ឥឡូវក្រោយពីលោក ហ៊ុន សែន បានប្រកាសហើយថាគ្មានអាជ្ញាយុកាលហ្នឹងមក គឺថាមានការភ័យបារម្ភ បងប្អូនដែលមានឈ្មោះពីមុនមកហ្នឹង ព្រោះគេបានប្រកាសរួចហើយពីមុនមកថា តាមចាប់ទាល់តែអស់ហ្នឹងទោះបីនៅទីណាក៏តាមចាប់ដែរ ។ ឥឡូវគាត់ប្រកាសម្ដងទៀតហើយ អ៊ីចឹងបងប្អូនយើងមានការភ័យខ្លាច» ។
ការភ័យខ្លាចនេះកើតឡើងប៉ុន្មានថ្ងៃបន្ទាប់ពីអតីតជនភៀសខ្លួនខ្មែរបីរូប ដែលក្នុងនោះរួមមានលោក ឡឹក ប៊ុនញៀន បានចុះចូលជាមួយគណបក្សប្រជាជនកម្ពុជា និងបានទទួលការតែងតាំងជាទីប្រឹក្សាក្រសួងការពារជាតិនៃរដ្ឋាភិបាលកម្ពុជា និងត្រូវបានប្រគល់ភារកិច្ចដោយលោកនាយករដ្ឋមន្រ្តី ហ៊ុន សែន ឲ្យធ្វើជាក្រុមស៊ើបការសម្ងាត់ ដើម្បីតាមស្វែងរកចាប់មនុស្សដែលពាក់ព័ន្ធនឹងចលនាស៊ីអែហ្វអែហ្វ ដែលត្រូវបានគេចោទប្រកាន់ ។
ប្រភពជនភៀសខ្លួនខ្មែរដែលមានការភ័យខ្លាចបានអះអាងថា លោក ឡឹក ប៊ុនញៀន បានចូលមកក្នុងប្រទេសថៃក្នុងឋានៈជាអ្នកស្វែងរកសិទ្ធិជ្រកកោនផ្នែកនយោបាយផង និងក្នុងឋានៈជាមន្ត្រីចារកិច្ចរបស់លោកឧត្តមសេនីយ៍ ម៉ុល រឿប ផង និងថាលោកបានប្រឌិតឯកសារបញ្ជីឈ្មោះមនុស្សជាច្រើននាក់នៃគណបក្សសមរង្ស៊ី ដើម្បីផ្តល់ទៅរដ្ឋាភិបាល ដោយភ្ជាប់ការពាក់ព័ន្ធទៅនឹងចលនាស៊ីអែហ្វអែហ្វ និងចលនាផ្សេងៗទៀត ។
ប្រភពសុំមិនបញ្ចេញឈ្មោះបង្ហើបថា ការរៀបចំនោះគឺដើម្បីទម្លាក់កំហុសនិងចោទប្រកាន់គណបក្សសមរង្ស៊ី និងលោក សម រង្ស៊ី ហើយថាថ្មីៗនេះលោក ឡឹក ប៊ុនញៀន បានទាក់ទាញជនភៀសខ្លួនខ្លះឲ្យទៅនិយាយទម្លាក់កំហុសលើលោក សម រង្ស៊ី ៖ «ដែលគេ Call មកខ្ញុំនេះ គេ Call ឲ្យខ្ញុំចេញទៅនិយាយឥឡូវនេះ ចេញទៅចូលសារភាពជាមួយគណបក្សប្រជាជន ដើម្បីឲ្យគេឲ្យតំណែង ។ ប៊ុនញៀនគេប្រាប់ខ្ញុំថាអ៊ីចឹង អ៊ីចឹងគាត់ឲ្យខ្ញុំទៅជួយរៀបចំធ្វើផែនការហ្នឹងជាមួយនឹងគាត់» ។
ភ្លាមៗនេះវិទ្យុអាស៊ីសេរីមិនអាចទាក់ទងលោក ឡឹក ប៊ុនញៀន ដើម្បីសុំការបំភ្លឺជុំវិញការចោទប្រកាន់នេះបាននៅឡើយទេ ៕