ប្រធានសហព័ន្ធ លោក ថាច់ ង៉ុកថាច់ អធិប្បាយពីគោលដៅនៃការប្រជុំនេះដូច្នេះ ៖ «ក្នុងពេល២ថ្ងៃហ្នឹង យើងប្រជុំមានគោលបំណង ៣។ ទី១ ពិនិត្យឡើងវិញនូវផែនការសហព័ន្ធខ្មែរកម្ពុជាក្រោម ដំណើរឆ្ពោះទៅកាន់មាតុភូមិ តើកិច្ចការណាដែលចាំបាច់ត្រូវធ្វើមុន កិច្ចការណាចាំបាច់ត្រូវធ្វើក្រោយ។ ទី២ យើងបានរៀបសម្រួលផ្ដោះប្ដូរនូវនាទីការងារដើម្បីទៅតាមបច្ចេកទេស ទៅតាមឯកទេសស្ទាត់ជំនាញ នូវគណៈកម្មការនាយកនីមួយៗហ្នឹង ដើម្បីឲ្យទាន់តាមសភាពការណ៍ការងារបច្ចុប្បន្ន។ ទី៣ គឺផែនការរៀបចំគម្រោងការធ្វើសន្និសីទអន្តរជាតិខួបទី៦០ នៅទីក្រុងមែលប៊ន នៃប្រទេសអូស្រ្ដាលី»។
លោកប្រធានសហព័ន្ធខ្មែរកម្ពុជាក្រោមបន្ថែមទៀតថា ការប្រជុំនេះនឹងពិភាក្សាអំពីការបោះពុម្ពពីការដឹកនាំការគ្រប់គ្រងពីគោលជំហររបស់សហព័ន្ធដើម្បីហ្វឹកហ្វឺនដល់មន្រ្តីនិងបុគ្គលិកសហព័ន្ធព្រមទាំងប្រជាពលរដ្ឋខ្មែរក្រោមទូទៅឲ្យគាត់យល់ដឹងពីគោលដៅសហព័ន្ធ។
លោក ថាច់ ង៉ុកថាច់ បានមានប្រសាសន៍ថា ៖ «ហើយចុងក្រោយទី៤ហ្នឹង គឺអំពាវនាវឲ្យបងប្អូនខ្មែរក្រោម និងបងប្អូនខ្មែរយើងទូទៅដើម្បីជួយគាំទ្រនូវការរៀបចំសន្និសីទអន្តរជាតិ នៅទីក្រុងមែលប៊ន ប្រទេសអូស្រ្ដាលី ថ្ងៃទី៥-៦-៧ ខែ១២ ឆ្នាំហ្នឹង»៕