អ្នកដឹកនាំសាសនិកអ៊ិស្លាមទៅធ្វើបុណ្យហាជ្ជ នៅទីក្រុងម៉ាក្កះ ប្រទេសអារ៉ាប៊ីសាអូឌីត បានថ្លែងឲ្យដឹងនៅថ្ងៃព្រហស្បតិ៍ ទី២៧ វិច្ឆិកា ថា ពួកគេនឹងអាចខកខានមិនបានធ្វើបុណ្យហាជ្ជដោយសារមិនអាចហោះហើរពីព្រលានយន្តហោះអន្តរជាតិភ្នំពេញឆ្ពោះទៅព្រលានយន្តហោះអន្តរជាតិក្រុងបាងកក គឺព្រលានយន្តហោះសុវណ្ណភូមិ និង ដនមឿង ដែលត្រូវបានបន្តបិទបណ្តោះអាសន្ន ប្រសិនបើមិនមានដំណោះស្រាយណាមួយបានឆាប់ៗនេះទេនោះ។
លោក ហ្សាការីយ៉ា បានមានប្រសាសន៍ថា លោកមានការពិបាកចិត្តដោយបញ្ហារាំងស្ទះនៃការធ្វើដំណើរនេះដែលជិតដល់ពេលនៃពិធីបុណ្យហាជ្ជហើយនោះ ហើយក្រុមរបស់លោកមានជាង១០០នាក់ដែលបានរង់ចាំអស់រយៈពេលពីរថ្ងៃមកហើយនៅតែមិនទាន់បានចាកចេញនៅឡើយនោះ។
លោក ហ្សាការីយ៉ា បានឲ្យដឹងថា ៖ «...ជើងកប៉ាល់ហោះដែលមានហ្នឹងគឺច្រើនតែថៃវាមាន ដល់ពេលជើងកប៉ាល់ហោះទៅតាមប្រទេសផ្សេងហ្នឹង ដូចសាំងហ្គាពួរ ដូចម៉ាឡេហ្នឹង គឺគ្រាន់តែជាតិគេពេញៗអស់អ៊ីចឹង អ៊ីចឹងយើងដូចអត់ទាន់ហ៊ានទេ»។
ជុំវិញការខកខាននៃការហោះហើរនេះបានធ្វើឲ្យភ្ញៀវទេសចរណ៍រាប់ពាន់នាក់មិនបានធ្វើដំណើរចាកចេញពីព្រលានយន្តហោះអន្តរជាតិភ្នំពេញឆ្ពោះទៅក្រុងបាកកទេក្នុងរយៈពេលពីរថ្ងៃកន្លងមកនេះ។
មន្រ្តីនៃក្រុមហ៊ុនព្រលានយន្តហោះអន្តរជាតិភ្នំពេញមួយរូបសុំមិនបញ្ចេញឈ្មោះបានមានប្រសាសន៍ប្រាប់វិទ្យុអាស៊ីសេរីតាមទូរស័ព្ទថា ក្រុមហ៊ុនដែលផ្អាកការហោះហើរបណ្ដោះអាសន្ននោះ រួមមានក្រុមហ៊ុន Bangkok Airways, Thai Airways និងក្រុមហ៊ុន Air Asia។
មន្ត្រីក្រុមហ៊ុន Bangkok Airways សុំមិនបញ្ចេញឈ្មោះដែរបានមានប្រសាសន៍ថា ការហោះហើរថ្ងៃនេះគឺមានពីរជើងដែលបានធ្វើឲ្យខកអ្នកដំណើរចំនួនជាង៣០០នាក់ដោយសារយន្តហោះមួយចំនួនកំពុងជាប់នៅព្រលានយន្តហោះសុវណ្ណភូមិនៅឡើយ ប៉ុន្តែទោះជាយ៉ាងណាក្រុមហ៊ុនកំពុងធ្វើការទំនាក់ទំនងទៅខាងថៃពីបញ្ហានេះ ហើយក៏មិនប្រាកដថានឹងដំណើរការវិញនៅពេលណានោះទេ។
មន្ត្រីក្រុមហ៊ុន Bangkok Airways ដដែល បានមានប្រសាសន៍ថា ៖ «អ្វីដែលខាងសុវណ្ណភូមិ Airport នៅខាងបាងកកហ្នឹង គេប្រកាសមកខាងខ្ញុំ ហើយនិងគេផ្ញើព័ត៌មានឲ្យខាងខ្ញុំ គឺគេបិទសម្រាប់ម្សិលមិញនិងថ្ងៃនេះ ប៉ុន្តែមិនទាន់ច្បាស់សម្រាប់ថ្ងៃស្អែក»។
ប្រជាពលរដ្ឋខ្មែរអ៊ិស្លាមដែលត្រៀមទៅធ្វើបុណ្យហាជ្ជ ឈ្មោះ សាឡាហួដទីន បានមានប្រសាសន៍ថា លោកក៏ដូចជាសាសនិកអ៊ិស្លាមមួយចំនួនផ្សេងទៀតមានការព្រួយបារម្ភចំពោះការខកខាននេះ។
លោក សាឡាហួដទីន បានបញ្ជាក់ថា ៖ «ព្រួយបារម្ភ ខ្លះអត់ចង់ហូបបាយហូបទឹកអីទេ ព្រោះថាចំណាយលុយច្រើនណាស់ដើម្បីទៅធ្វើបំពេញ រុកុនហាជីអ៊ិស្លាម រុកុនអ៊ិស្លាម៥ប្រការហ្នឹង សង្ឃឹមថាបានហើយឆ្នាំ២០០៨នេះ មកចំពេលនេះប្រទេសថៃមិនឲ្យចុះកប៉ាល់ហោះនៅទីក្រុងបាងកក គឺមានការព្រួយខ្លាំងណាស់»។
សូមជម្រាបថា ការខកខាននៃការហោះហើរនេះយោងតាមភ្ញៀវអ្នកធ្វើដំណើរមួយចំនួនរួមមានទាំងភ្ញៀវបរទេសផងនោះបានឲ្យដឹងថា ពួកគេបានដូរសំបុត្រយន្តហោះយកលុយវិញពីក្រុមហ៊ុនដែលលក់សំបុត្រនោះ។
យោងតាមសេចក្តីរាយការណ៍ពីពលរដ្ឋខ្មែរដែលបានស្ទះដំណើរក្នុងក្រុងបាងកកបានឲ្យដឹងថា ពួកគាត់នៅមិនទាន់អាចចាកចេញទៅកាន់ប្រទេសទីបីនៅឡើយទេ ដោយសារគេបានប្រកាសបិទព្រលានយន្តហោះបណ្តោះអាសន្នតាំងពីល្ងាចថ្ងៃអង្គារ ទី២៥ វិច្ឆិកាមក៕