ព្រះមហាក្សត្រនៃព្រះរាជាណាចក្រកម្ពុជា ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី បានតបលិខិតមួយទៅគណបក្សសមរង្ស៊ី កាលពីថ្ងៃទី១២ ខែកញ្ញា ថា ព្រះអង្គបានទទួលលិខិតរបស់តំណាងរាស្រ្ដទាំង១២៦រូបរបស់គណបក្សសមរង្ស៊ី ដែលសុំមិនទៅចូលរួមប្រជុំនិងស្បថនៅថ្ងៃទី២៤ ខែកញ្ញា និងសុំស្បថដាច់ដោយឡែក។ តែព្រះអង្គមិនបានតបលិខិតនោះថា ព្រះអង្គយល់ព្រមឬជំទាស់ចំពោះសំណើសុំនោះទេ។
ប៉ុន្តែអ្នកតំណាងរាស្រ្ដគណបក្សសមរង្ស៊ី លោក សុន ឆ័យ អះអាងនៅថ្ងៃអាទិត្យ ទី១៤ ខែកញ្ញា ថា ក្រោយពីបានទទួលព្រះរាជសារពីព្រះមហាក្សត្រ កាលពីថ្ងៃទី១១ ខែកញ្ញា កោះអញ្ជើញឲ្យតំណាងរាស្រ្ដគ្រប់គណបក្សនយោបាយត្រូវចូលរួមប្រជុំសភាអាណត្តិទី៤ លើកដំបូង នៅថ្ងៃទី២៤ ខែកញ្ញា ឆ្នាំ២០០៨ នោះគណបក្សសមរង្ស៊ីបានថ្វាយលិខិតថ្មីមួយទៀត នៅថ្ងៃទី១២ ខែកញ្ញា ថ្វាយសុំព្រះមហាក្សត្រប្រជុំនិងស្បថដាច់ដោយឡែក។
លោកថា នារសៀលថ្ងៃដដែលនោះព្រះរាជសារតបពីព្រះមហាក្សត្រព្រះអង្គថ្វាយពរដល់តំណាងរាស្រ្តគណបក្សសមរង្ស៊ី។
លោក សុន ឆ័យ បានឲ្យដឹងថា ៖ «ទោះបីជាលោកមិនបានបញ្ជាក់ថា លោកថាយ៉ាងណាក៏ដោយការឲ្យពរយើងនេះមានន័យថា លោកយល់ស្រប យល់តាមសំណូមពររបស់យើងទាំង២៦រូបហើយ»។
តំណាងរាស្ត្រលោក សុន ឆ័យ បន្តថាមូលហេតុដែលគណបក្សសមរង្ស៊ីមិនចូលរួមប្រជុំនិងស្បថចូលកាន់តំណែងដំបូងរបស់សភាអាណិត្តទី៤ មកពីម្ចាស់ឆ្នោតបានស្នើសុំឲ្យគណបក្សប្រឆាំងដែលជាតំណាងជួយតវ៉ាសិទ្ធិបោះឆ្នោតត្រូវបានគេបំបាត់និងការបន្លំសន្លឹកឆ្នោត។
ចំណែកអគ្គលេខាធិការគណបក្សសិទ្ធិមនុស្ស លោក យ៉ែម បុញ្ញាឫទ្ធិ អះអាងថា ៖ «រហូតដល់ថ្ងៃនេះយើងមិនទាន់សម្រេចចិត្តថា នឹងចូលរួមប្រជុំលើកទី១ហ្នឹងទេ»។
ហើយក៏មិនទាន់ច្បាស់ថា អាចទៅចូលរួមស្បថជាមួយគណបក្សសមរង្ស៊ីដែរ។
ពាក់ព័ន្ធការមិនព្រមចូលរួមស្បថរួមគ្នាដើម្បីចូលកាន់តំណែងសភាអាណត្តិទី៤នៃតំណាងរាស្រ្តគណបក្សប្រឆាំងនោះ អ្នកនាំពាក្យរាជរដ្ឋាភិបាលកម្ពុជា លោក ខៀវ កាញារីទ្ធ ធ្លាប់មានប្រសាសន៍ប្រាប់វិទ្យុអាស៊ីសេរីថា សភាមានតែមួយ បើសមាជិកសភាគណបក្សសមរង្ស៊ីចង់ស្បថដាច់ដោយឡែក បើតាមច្បាប់ត្រូវគណបក្សនោះនាំសមាជិកសភារបស់ខ្លួនទៅប្រជុំនៅកន្លែងដាច់ដោយឡែកដែរ។
យោងតាមព្រះរាជសារថតចម្លងដែលវិទ្យុអាស៊ីសេរីទទួលបាន កាលពីថ្ងៃទី១៣ ខែកញ្ញា ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ព្រះអង្គទ្រង់មានព្រះរាជចំណារថា ជូនឯកឧត្តម លោកជំទាវ ទាំង២៦រូបជាបេក្ខជនជាប់ឆ្នោតតំណាងរាស្រ្តអាណត្តិទី៤ នៃគណបក្សសមរង្ស៊ី។ ឯកឧត្តម លោកជំទាវ បេក្ខជនជាប់ឆ្នោតតំណាងរាស្រ្តទាំងអស់ជាទីរាប់អាន ខ្ញុំបានទទួលរួចហើយ លិខិតចុះថ្ងៃទី១២ ខែកញ្ញា ឆ្នាំ២០០៨ របស់ឯកឧត្តមនិងលោកជំទាវដែលបានផ្ញើមកថ្វាយខ្ញុំ។ ខ្ញុំសូមជូនពរឯកឧត្តម លោកជំទាវ បេក្ខជនជាប់ឆ្នោតតំណាងរាស្រ្តនៃគណបក្សសមរង្ស៊ី បានប្រកបតែនឹងព្រះពុទ្ធពរទាំង៥ប្រការ។ សូមឯកឧត្តម លោកជំទាវ បេក្ខជនជាប់ឆ្នោតតំណាងរាស្រ្តទាំងអស់ទទួលនូវសេចក្តីរាប់អានអំពីខ្ញុំ នរោត្តម សីហមុនី ភ្នំពេញ ថ្ងៃទី១២ ខែកញ្ញា ឆ្នាំ២០០៨ ។
ព្រះករុណាពុំមានចំណារលើសពីសេចក្តីខាងលើនេះឡើយ៕