លោក ស៊ា ទ្រចេង បានមកប្តឹងសមាគមសិទ្ធិមនុស្ស អាដហុក ខេត្តកំពង់ចាម ដើម្បីឲ្យជួយរកយុត្តិធម៌ នៅថ្ងៃទី២០ សីហានេះ បានមានប្រសាសន៍និងចោទប្រកាន់ថា ដីចម្ការរបស់គាត់បានដាំកៅស៊ូជាងមួយហិកតានៅក្នុងឃុំព្រែកកក់ ស្រុកស្ទឹងត្រង់ ត្រូវបានលោកប្រធានប៉ុស្តិ៍រដ្ឋបាលចម្ការកៅស៊ូបឹងកេត ឈ្មោះ សុខ ប៊ុន្នី ហៅកាក់ បាននាំកងកម្លាំងប្រដាប់ដោយអាវុធ ទៅដកដើមកៅស៊ូគាត់ចោលជាលើកទីពីរ ដោយលើកទីមួយកាលពីថ្ងៃទី២៩ ខែ៦ អស់៧០០ដើម និងលើកទីពីរ មន្រ្តីប៉ូលិសដដែលបាននាំកងកម្លាំងទៅដកនៅថ្ងៃទី១០ ខែសីហា ឆ្នាំ២០០៨នេះ អស់ចំនួន១៥០ដើម ។
លោក ស៊ា ទ្រចេង បានមានប្រសាសន៍ថា ៖ «អត់មានការពាររាស្រ្ដទេ មានតែការពារអ្នកឈ្មួញកណ្ដាល អ្នកមានអំណាច ធ្វើបាបរាស្រ្ដ» ។
ប្រធានប៉ុស្តិ៍រដ្ឋបាលចម្ការកៅស៊ូបឹងកេត លោក សុខ ប៊ុន្នី បានបដិសេធនិងការចោទប្រកាន់ខាងលើ ដោយលោកបានមានប្រសាសន៍ថា លោកមិនបានដកដើមកៅស៊ូនោះទេ ៖ «ដីហ្នឹងពីដើមដីពាក់ព័ន្ធនឹងក្រុមហ៊ុន» ។
តំណាងប្រជាពលរដ្ឋជាង៧០០គ្រួសារនិងជាប្រធានភូមិបឹងកេតផងនោះ ឈ្មោះ សន ងួនហួ បានមានប្រសាសន៍ថា ប្រជាពលរដ្ឋទាំងនោះធ្លាប់បានធ្វើការតវ៉ាដល់ផ្ទះលោកនាយករដ្ឋមន្រ្តី ហ៊ុន សែន ចំនួនបីលើករួចមកហើយ ដោយលើកទីបីចុងក្រោយ គឺនៅថ្ងៃទី១៧ ខែកក្កដា មុនពេលបោះឆ្នោតជាតិ ។ ប៉ុន្តែនៅពេលនោះខាងខុទ្ទកាល័យលោកនាយករដ្ឋមន្ត្រីបានឆ្លើយថា ចាំបោះឆ្នោតរួចគេនឹងដោះស្រាយជូន ហើយបានចាត់ឲ្យអាជ្ញាធរស្រុកធ្វើស្ថិតិប្រជាពលរដ្ឋឲ្យបានច្បាស់លាស់និងផ្ញើជូនដល់លោកវិញ ។ លោក សន ងួនហួ បានបញ្ជាក់ថាអភិបាលស្រុកស្ទឹងត្រង់មិនបានធ្វើចំណាត់ការរឿងនេះទេ ។
លោក សន ងួនហួ បានមានប្រសាសន៍ថា ៖ «សំណូមពរខ្ញុំជាតំណាងប្រជាពលរដ្ឋនេះ សូមសំណូមពរឲ្យសម្ដេច ឲ្យខាងក្រុមខុទ្ទកាល័យរបស់សម្ដេចហ្នឹង ចុះមកត្រួតពិនិត្យឲ្យបានឆាប់ កុំឲ្យទុកនៅអូសបន្លាយ នៅវែងពេកអ៊ីចឹង វាមានការថ្ងៃក្រោយប្រទូសរ៉ាយគ្នា ។ វាមានការលំបាកទៅធ្វើហ្នឹង ទាំងភ័យភិត វាមិនបានស្រណុកសុខស្រួល គេចេះតែគំរាម ប៉ូលិសគេចេះតែថា ដាំមិនបាន គេចង់តែដករបស់យើងចោល គេចង់តែឈូសរបស់យើងចោល» ។
វិទ្យុអាស៊ីសេរីបានព្យាយាមសុំការបំភ្លឺពីលោកអភិបាលស្រុក ឈ្មោះ កៅ សុខអាន អំពីបញ្ហាខាងលើ ប៉ុន្តែលោកបានបិទទូរស័ព្ទ ។
នាយករងខុទ្ទកាល័យលោកនាយករដ្ឋមន្រ្តី ហ៊ុន សែន លោក លឹម លាងសែ បានមានប្រសាសន៍ដូច្នេះថា ៖ «បើគាត់ចង់ធ្វើ ស្រុកមិនធ្វើ គាត់អាចឡើងមកខេត្ត មកដាក់ពាក្យនៅខេត្តបាន ព្រោះរឿងហ្នឹងថ្នាក់ខេត្តក៏ដឹងដែរ» ។
សូមជម្រាបថាដីរបស់ប្រជាពលរដ្ឋខាងលើមានជាង១៤០០ហិកតា ហើយបានកាន់កាប់តាំងពីរបបសង្គមរាស្រ្តនិយមមកហើយ ៕