ផ្អែកតាមប្រភពបានឲ្យដឹងថា ភូមិចំនួនបីនោះមានភូមិស្វាយព្រៃ ភូមិពោធិ៍ស្ទាង និងភូមិតាំងជ្រៃ នៅក្នុងឃុំសណ្តែក នៅជាប់គ្នានឹងឃុំត្រប់ ស្រុកបាធាយ ខេត្តកំពង់ចាម។
តំណាងប្រជាពលរដ្ឋនៃភូមិទាំងបីខាងលើនេះបានមានប្រសាសន៍ត្អូញតែ្អរប្រាប់វិទ្យុអាស៊ីសេរីថា ប្រជាពលរដ្ឋចំនួនប្រមាណ៣៧០គ្រួសារត្រូវបានហាមឃាត់មិនឲ្យធ្វើស្រែនៅលើដីទំនាស់ដែលឃុំត្រប់រឹបយកវិញពីឃុំសណ្តែកនាពេលបច្ចុប្បន្ននេះ ៖ «មេឃុំត្រប់ហ្នឹងគាត់ហាមឃាត់មិនឲ្យប្រជាជនឃុំសណ្ដែកហ្នឹងធ្វើស្រែទេ។ ដីហ្នឹងវាមានបញ្ហាអ៊ីចេះ កាលហ្នឹងមេឃុំត្រប់ហ្នឹងគាត់អភិវឌ្ឍហើយគាត់លក់ឲ្យក្រុមហ៊ុន»។
ផ្អែកតាមប្រភពបានឲ្យដឹងថា ប្រជាពលរដ្ឋនៅក្នុងភូមិចំនួនបី គឺភូមិស្វាយព្រៃ ភូមិពោធិ៍ស្ទាង និងភូមិតាំងជ័យនោះ ធ្លាប់បានធ្វើស្រែបង្កបង្កើនផលនៅលើដីនោះចាប់តាំងពីឆ្នាំ១៩៨២មកម៉្លេះ រហូតដល់ឆ្នាំ២០០៧កន្លងទៅនេះអាជ្ញាធរឃុំត្រប់បានរឹបអូសយកដីនោះវិញដែលមានទំហំជាច្រើនរយហិកតារ។
លោក ឈួន ឆាន ជាមេភូមិស្វាយព្រៃក្នុងចំណោមភូមិទាំងបីខាងលើ បានមានប្រសាសន៍ថា ដីធ្លីកសិកម្មច្រើនរយហិកតារដែលកំពុងតែមានទំនាស់នោះគឺជាអតីតដីរបស់ឃុំត្រប់ ទើបមានការរឹបយកវិញ ប៉ុនែ្តប្រជាពលរដ្ឋនៅឃុំសណ្តែកដែលត្រូវបាត់បង់ដីស្រែនោះមិនព្រមប្រគល់ឲ្យបណ្តាលឲ្យមានការប្រទាញប្រទង់គ្នានាពេលបច្ចុប្បន្ននេះ។
លោក ឈួន ឆាន បានឲ្យដឹងថា ៖ «កាលពីជំនាន់៨៣-៨៤ហ្នឹង ប្រជាពលរដ្ឋឃុំសណ្ដែកហ្នឹងបានទៅកាន់កាប់ ហើយមកដល់ពេលបច្ចុប្បន្ននេះ ឆ្នាំ២០០៧ខាងឃុំត្រប់គេអត់ឲ្យយើងចូលកាន់កាប់ដីហ្នឹងទៀតទេ។ ប្រជាពលរដ្ឋខ្ញុំជាអ្នកកាន់កាប់ហ្នឹងគេមានហៅថា មានប្លង់មានបញ្ជីគេណា៎ ហើយអ៊ីចឹងគេទាមទារយកដីហ្នឹងវិញប្រជាពលរដ្ឋខ្ញុំ តែខាងត្រប់ហ្នឹងគេអត់ទាន់កាត់ឲ្យ»។
ទាក់ទងនឹងបញ្ហាខាងលើនេះ លោក ជុំ ជន ជំទប់ទី១នៃឃុំត្រប់ បានមានប្រសាសន៍បំភ្លឺថា គ្មានការសម្រេចណាមួយនៅទ្បើយទេជុំវិញការប្រទាញប្រទង់គ្នាក្នុងការកាន់កាប់ដីរវាងឃុំត្រប់និងឃុំសណ្ដែកនោះ។
លោក ជុំ ជន បានមានប្រសាសន៍ថា ៖ «ដីដែលបញ្ហាដោយសារដីនៅក្នុងមូលដ្ឋានឃុំត្រប់ ហើយសណ្ដែកគាត់មកធ្វើអីអ៊ីចឹង ហើយកាលហ្នឹងវាមានមេឃុំចាស់... មានលិខិតកាន់កាប់ ឬក៏លិខិតខ្ចីអីអ៊ីចឹង ដែលយើងអនុញ្ញាតបាន ហើយបើសិនជាមិនមានទេ មិនទាន់ហ៊ានថាដីអ្នកណាទេ។ អាហ្នឹងការពិតព្រំប្រទល់ជាប់គ្នាហើយវាចេញចូលគ្នាដូចមុខរណារអ៊ីចឹងណា៎»។
សូមរំឭកថា អាជ្ញាធរនៃឃុំទាំងពីរគឺឃុំត្រប់និងឃុំសណ្តែកបានអះអាងថា ពួកគេបានប្តឹងតវ៉ារឿងនេះទៅថ្នាក់លើនៃខេត្តកំពង់ចាមរួចហើយដើម្បីសុំសេចក្ដីសម្រេចដោះសា្រយឬកាត់សេចក្តីជុំវិញបញ្ហាប្រទាញប្រទង់គ្នានោះ ប៉ុនែ្តគ្មានកិច្ចអន្តរាគមន៍ដោះស្រាយនៅឡើយទេ៕