ប្រជាពលរដ្ឋនៅក្នុងភូមិឡពាង ឈ្មោះ ផេង រុំ មានប្រសាសន៍ប្រាប់វិទ្យុអាស៊ីសេរីនៅព្រឹកថ្ងៃទី៥ វិច្ឆិកា ថា ស្រូវគាត់ជាង២ហិកតារត្រូវគេបាញ់ថ្នាំឲ្យងាប់ដោយអន្លើៗរបៀបជាឆ្នូតៗឯគោគាត់ដែលចងឲ្យស៊ីស្មៅក្បែរកន្លែងស្រូវងាប់នោះក៏ត្រូវពុលរាករូសយ៉ាងខ្លាំង។
លោក ផេង រុំ បានឲ្យដឹងថា ៖ «ស្រូវដែលបាញ់ហ្នឹង បើស្រូវខ្ញុំចំនួន២ហិកតារស្រូវបងប្អូនទៀតវាច្រើន ប៉ុន្តែក្នុងមួយស្រែៗ វាឆូតអស់មួយមុខៗ។ គោខ្ញុំមួយនោះរាកអាចម៍អត់ស៊ីស្មៅអីទេ ព្រោះវាទៅស៊ីស្មៅនៅជិតកន្លែងគេបាញ់ថ្នាំ»។
ប្រជាពលរដ្ឋបានផ្តោតការសង្ស័យថា ក្រុមហ៊ុន KDC ជាអ្នកនៅពីក្រោយហេតុការណ៍ដែលធ្វើឲ្យស្រូវរបស់អ្នកភូមិរាប់សិបហិកតារបានងាប់នោះ។
អ្នកស្រី ទូច រ៉េត មានប្រសាសន៍ថា ៖ «ទំនាស់របស់ក្រុមហ៊ុនទេ ឲ្យរដ្ឋាភិបាលជួយដោះស្រាយឲ្យពលរដ្ឋធ្វើស្រែដែលគេបាញ់ថ្នាំសម្លាប់ស្រូវនេះ ងាប់ស្រូវអស់ហើយ ហើយខ្ញុំបានអីហូប។ ថ្នាំហ្នឹងប្ដីខ្ញុំទៅកាន់ ស្ពឹកដៃ ជាំដៃឡើងខ្មៅ ហើយការបំផ្លាញហ្នឹងគឺមិនមែនបំផ្លាញទាំងស្រុងទេ គឺដីយើងមួយហិកតារអ៊ីចឹង វាបាញ់ឆូតៗ បំផ្លាញមួយជួរ។ ហើយវានិយាយទៀត វាថាស្រូវដែលសល់ពីបាញ់ថ្នាំទាំងប៉ុន្មានហ្នឹង វាអត់ឲ្យយើងច្រូតទេ»។
ប៉ុន្តែតំណាងឲ្យក្រុមហ៊ុន KDC លោក ថៃ ហ៊ី បានមានប្រសាសន៍ថា លោកក៏ពុំបានដឹងហេតុការណ៍នេះដែរ។ លោក ថៃ ហ៊ី រុញសំណួរនេះឲ្យសួរទៅមេធាវីរបស់ក្រុមហ៊ុនគឺលោក ផាត់ ពៅសៀង។
លោក ថៃ ហ៊ី បានមានប្រសាសន៍ថា ៖ «ខ្ញុំអត់ដឹងទេរឿងនេះ ខ្ញុំគ្រាន់តែមើលតែដីគេ ហើយរឿងស្អីមានមេធាវីគាត់ ទៅសួរមេធាវីគាត់ទៅ ខ្ញុំអត់សូវដឹងទេរឿងហ្នឹង»។
វិទ្យុអាស៊ីសេរីបានទាក់ទងសុំការពន្យល់ពីលោកមេធាវី ផាត់ ពៅសៀង ដែរ តែលោកមិនព្រមឆ្លើយដោយលើកហេតុផលថាលោកជាប់រវល់ ៖ «ប្រជុំនៅ ECCC បន្តិច»។
មេភូមិឡពាង អ្នកស្រី ទូច លី មានប្រសាសន៍ថា អ្នកស្រីបានដឹងរឿងនេះដែរ តែអ្នកស្រីមិនអាចធ្វើការសន្និដ្ឋានថា អ្នកណាជាអ្នកប្រព្រឹត្តនោះទេព្រោះគ្មានភស្តុតាងបញ្ជាក់ ៖ «...ប្រាប់ខ្ញុំដែរ ខ្ញុំថា មិនដឹងធ្វើម៉េចទេទ្រាំទៅ យើងវាត្រូវតែអ៊ីចឹងហើយ»។
មេឃុំតាជេស លោក ឌី ឌឿន មានប្រសាសន៍ថា លោកពុំទាន់ទទួលបានព័ត៌មាននេះទេ។ លោកថា បន្ទាប់ពីទទួលបានព័ត៌មាននេះលោកនឹងទៅពិនិត្យជាក់ស្តែង ៖ «អត់ដឹងផង មេភូមិអត់បានរាយការណ៍ឲ្យខ្ញុំផង ខ្ញុំរវល់តែនៅធ្វើសមាហរណកម្មនៅស្រុក»។
គួរបញ្ជាក់ដែរថា ស្រូវដែលរងការបំផ្លាញពីជនមិនស្គាល់មុខបាញ់ថ្នាំឲ្យងាប់នេះស្ថិតតំបន់ដីដែលកំពុងមានជម្លោះរវាងក្រុមហ៊ុន KDC និងប្រជាពលរដ្ឋជាង១០០គ្រួសារដែលបានអូសបន្លាយជាច្រើនឆ្នាំកន្លងមកហើយ ដោយពុំទាន់មានអ្នកឈ្នះនិងអ្នកចាញ់ពិតប្រាកដនៅឡើយ៕