ជម្លោះដីធ្លីនៅឃុំប៊ូស្រា ខែត្រមណ្ឌលគិរី
ដោយ ឱ ភារិទ្ធ
2008-05-09
ជនជាតិព្នងនៅឃុំប៊ូស្រាខែត្រមណ្ឌលគិរី ដែលបានតវ៉ាចោទប្រកាន់ក្រុមហ៊ុនអភិវឌ្ឍន៍ពីរថាបានរំលោភលើដីចម្ការវិលជុំរបស់ពួកគេនោះ កំពុងតែមានការបែកបាក់មិនទុកចិត្តគ្នាទៅវិញទៅមក ។
ជនជាតិព្នងនៅភូមិលេខ១ ឃុំប៊ូស្រា បានផ្ដល់សម្ភាសន៍កាលពីព្រឹកថ្ងៃទី៩ ខែឧសភាថាពួកខ្លួនកំពុងតែនាំគ្នាផ្ដិតមេដៃសុំធ្វើការតវ៉ាជាថ្មី ដើម្បីបដិសេធមិនទទួលស្គាល់ក្រុមជនជាតិព្នងដែលផ្ដិតមេដៃលើកិច្ចសន្យាដោះស្រាយកាលពីថ្ងៃទី៤ ឧសភា ៖ «គេមាន១០នាក់ផ្ដិតមេដៃនៅកន្លែងសាលាខែត្រពីថ្ងៃមុននោះ ខ្ញុំអត់គាំទ្រអត់ទទួលស្គាល់ទេ ខ្ញុំបដិសេធព្រោះផ្ដិតមេដៃមិនអត់ត្រឹមត្រូវ» ។
ស្ត្រីជនជាតិព្នងរូបនេះបានអះអាងបន្ថែមថា ការផ្ដិតមេដៃលើកនេះក៏ជាការរកដំណោះស្រាយជាថ្មី ដើម្បីឲ្យក្រុមហ៊ុនអភិវឌ្ឍន៍ធ្វើការឈូសឆាយចៀសឲ្យផុតពីព្រៃកេរដូនតានិងចម្ការវិលជុំរបស់ពួកគេ ៖ «ពួកខ្ញុំតវ៉ាដើម្បីយកដីធ្លី ចម្ការវិលជុំ... បើថាគាត់មិនយល់ព្រមទេ ពួកខ្ញុំមិនយល់ព្រមឲ្យធ្វើជាដាច់ខាត» ។
ក្នុងចំណោមជនជាតិព្នងដែលផ្ដិតមេដៃបញ្ចប់វិវាទពីថ្ងៃទី៤ ឧសភា បានអះអាងថាពួកខ្លួនត្រូវបានគេយកចុងកន្ទុយសន្លឹកមកឲ្យផ្ដិតមេដៃ ដោយមិនឲ្យមើលខ្លឹមសារខាងដើមមែន ប៉ុន្តែនៅតែអះអាងថាពួកខ្លួនមិនបានផ្ដិតមេដៃគាំទ្រឲ្យក្រុមហ៊ុនឈូសឆាយរំលោភលើដីរបស់ប្រជាពលរដ្ឋនោះទេ ។
មន្ត្រីស៊ើបអង្កេតសមាគមអាដហុក គឺលោក សម សារិន ដែលតាមឃ្លាំមើលបញ្ហាវិវាទនេះបានរិះគន់អាជ្ញាធរជាតិដោះស្រាយវិវាទដីធ្លីកាលពីថ្ងៃទី៤ ឧសភាថា គ្មានតម្លាភាពធ្វើឲ្យប្រជាពលរដ្ឋមានមន្ទិលសង្ស័យលើគ្នាទៅវិញទៅមក ។
លោក សម សារិន បានឲ្យដឹងថា ៖ «ការដោះស្រាយកាលពីថ្ងៃទី៤ ជាដំណោះស្រាយមួយរបៀបរៀបចំល្បិចបោកប្រាស់ប្រជាពលរដ្ឋ ព្រោះថាដឹងថាប្រជាពលរដ្ឋមិនសូវចេះអក្សរ អ៊ីចឹងយកសំណើនិងសំណូមពរប្រជាពលរដ្ឋហ្នឹងទៅឲ្យនាយករដ្ឋមន្ត្រីសម្រេច ។ ប៉ុន្តែបែរជាយកមេដៃប្រជាពលរដ្ឋប្រហែលជាបួនដប់ហ្នឹង ទៅធ្វើកិច្ចសន្យាបញ្ចប់វិវាទរវាងប្រជាពលរដ្ឋនិងក្រុមហ៊ុនទៅវិញ ។ អ៊ីចឹងគួរតែអាជ្ញាធរជាតិពិនិត្យឡើងវិញ» ។
សូមជម្រាបថាកាលពីថ្ងៃទី២ ដល់ថ្ងៃទី៤ ឧសភា ជនជាតិព្នងនៅឃុំប៊ូស្រាដែលតវ៉ាពីរឿងវិវាទដីធ្លីត្រូវបានរំសាយទៅផ្ទះវិញ បន្ទាប់ពីអាជ្ញាធរជាតិដោះស្រាយវិវាទដីធ្លីបានតម្រូវឲ្យជនជាតិព្នងប្រមាណ១០នាក់ ផ្ដិតមេដៃជាតំណាងភូមិនីមួយៗក្នុងឃុំប៊ូស្រាដើម្បីបញ្ចប់វិវាទ ដែលមានខ្លឹមសារខ្លះសរសេរថា នឹងនាំពាក្យតវ៉ាទៅដាក់ជូននាយករដ្ឋមន្ត្រីដើម្បីដោះស្រាយ ព្រមទាំងធ្វើយ៉ាងណាដើម្បីកុំឲ្យក្រុមហ៊ុនឈូសឆាយលើដីកសិកម្មរបស់ប្រជាពលរដ្ឋ ដែលក្នុងនោះប្រជាពលរដ្ឋថា មិនបាននិយាយអំពីផលប៉ះពាល់មកលើដីចម្ការវិលជុំរបស់ពួកគាត់ ។
អភិបាលរងខែត្រមណ្ឌលគិរីគឺលោក ញ៉ា រាំងចាន់ បានផ្តល់សម្ភាសន៍ថាអាជ្ញាធរខែត្របានបង្កើតគណៈកម្មការស៊ើបអង្កេតដើម្បីពន្យល់ប្រជាពលរដ្ឋទាំងនោះឲ្យយល់ច្បាស់អំពីរឿងនេះ ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
ទាហានបន្តរុះរើផ្ទះអ្នកស្រុកនៅភូមិជ័យសេនា ខេត្តកំពត
ផ្ទះអ្នកភូមិជ័យសេនាក្នុងស្រុកឈូកខេត្តកំពតត្រូវទាហានរុះរើ
ជនរងគ្រោះដោយសារដីធ្លីនៅកំពតត្អូញត្អែរពីការមិនរកយុត្តិធម៌
អាជ្ញាធរខែត្រសៀមរាបស្វែងរកដំណោះស្រាយរឿងដីធ្លីជូនពលរដ្ឋ
កិច្ចប្រជុំរបស់ជនរងគ្រោះដោយសារការធ្វើសម្បទានដីត្រូវគេរារាំង
មនុស្ស៣នាក់បាត់ខ្លួនក្រោយការបង្ក្រាបករណីជម្លោះដីនៅកំពត
ជនជាតិព្នងនៅឃុំប៊ូស្រាខឹងនឹងអាជ្ញាធរក្នុងការដោះស្រាយបញ្ហាដីធ្លី
ស្ត្រីម្នាក់នៅស្រុកឈូក ខែត្រកំពត ចោទថាត្រូវក្រុមយោធាវាយ
ពលរដ្ឋជាង៤០០នាក់តវ៉ារឿងដីធ្លីប្រឆាំងនឹងទាហាននៅខេត្តសៀមរាប
ពលរដ្ឋ៥គ្រួសារនៅប៉ៃលិន ប្ដឹងអភិបាលរងក្រុងពីបទបំផ្លាញទ្រព្យសម្បត្តិ
