ក្រសួង​ទេសចរណ៍​រក​វិធានការ​អភិរក្ស​ស៊ីក្លូ

រដ្ឋមន្ត្រី​ក្រសួង​ទេសចរណ៍ លោក ថោង ខុន នៅ​ថ្ងៃ​ទី៩ ខែ​មករា ឆ្នាំ​២០១៣ បាន​កោះ​ប្រជុំ​ជាមួយ​តំណាង​សមាគម​អភិរក្ស​ស៊ីក្លូ តំណាង​សមាគម​ភោជនីយដ្ឋាន​កម្ពុជា និង​សមាគម​សណ្ឋាគារ​ជាដើម ដើម្បី​រិះរក​វិធានការ​បន្ទាន់​មួយ​ក្នុង​ការ​ថែ​រក្សា ឬ​អភិរក្ស​ស៊ីក្លូ នៅ​ទីក្រុង​ភ្នំពេញ ដោយ​សារ​តែ​គេ​បាន​កត់​សម្គាល់​ថា ចំនួន​ស៊ីក្លូ​កំពុង​តែ​ថយ​ចុះ​គួរ​ឲ្យ​ព្រួយ​បារម្ភ។
ដោយ សុខ សេរី
2013-01-09
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ថោង ខុន ៣០៥
រដ្ឋមន្ត្រី​ក្រសួង​ទេសចរណ៍ លោក ថោង ខុន ដឹកនាំ​កិច្ច​ប្រជុំ​នៅ​ក្រសួង​ទេសចរណ៍ កាល​ពី​ថ្ងៃ​ទី៩ ខែ​មករា ឆ្នាំ​២០១៣។
RFA

វិធានការ​អភិរក្ស​ស៊ីក្លូ នោះ គឺ​ក្រោយ​ពី​លោក​នាយក​រដ្ឋមន្ត្រី ហ៊ុន សែន បាន​ប្រកាស​កាល​ពី​ថ្ងៃ​ទី២៦ ខែ​វិច្ឆិកា ឆ្នាំ​២០១២ កន្លង​ទៅ​នេះ​ថា លោក​ព្រួយ​បារម្ភ​អំពី​ការ​បាត់​បង់​ស៊ីក្លូ​នៅ​ថ្ងៃ​អនាគត បើ​សិន​ណា​គ្មាន​វិធានការ​ទប់ស្កាត់​ទេ​នោះ។

រដ្ឋមន្ត្រី​ក្រសួង​ទេសចរណ៍ លោក ថោង ខុន និង​តំណាង​សមាគម​អភិរក្ស​ស៊ីក្លូ និង​តំណាង​សមាគម​សណ្ឋាគារ ព្រម​ទាំង​តំណាង​សមាគម​មួយ​ចំនួន​ទៀត បាន​ឯកភាព​គ្នា​ថា គេ​នឹង​បន្ត​អភិរក្ស​ស៊ីក្លូ​មិន​ឲ្យ​បាត់​បង់​នៅ​ថ្ងៃ​អនាគត​ឡើយ ដោយ​បង្កើន​គុណភាព​សេវា និង​សុវត្ថិភាព​ដល់​ភ្ញៀវ​ទេសចរ​បរទេស នៅ​គ្រា​ដែល​គេ​ត្រូវ​ការ​ស៊ីក្លូ​ជិះ​កម្សាន្ត​នៅ​ភ្នំពេញ។

វិធានការ​រក្សា​សុវត្ថិភាព​របស់​អ្នក​ធាក់​ស៊ីក្លូ​នោះ មាន​ដូច​ជា ស៊ីក្លូ​នីមួយៗ​ត្រូវ​មាន​កញ្ចក់ ហ្វ្រាំង ដំបូល និង​ចង្កៀង​បំភ្លឺ​ផ្លូវ​ជាដើម។ អ្នក​ធាក់​ស៊ីក្លូ​គប្បី​មាន​ឯក​សណ្ឋាន​ត្រឹមត្រូវ និង​មាន​អាវ​ភ្លៀង​សម្រាប់​រដូវ​ភ្លៀង​ធ្លាក់។ នៅ​ជំហាន​បន្ទាប់​ទៀត អ្នក​ធាក់​ស៊ីក្លូ​ម្នាក់​ត្រូវ​មាន​ប័ណ្ណ​បើកបរ ដើម្បី​ឲ្យ​ភ្ញៀវ​ទេសចរ​មាន​ការ​ទុក​ចិត្ត​ជាដើម។

ក្រៅ​ពី​នេះ សមាគម​អភិរក្ស​ស៊ីក្លូ​ត្រូវ​តែ​ផ្តល់​ការ​អប់រំ​រៀន​សូត្រ​ដល់​អ្នក​ធាក់​ស៊ីក្លូ។ សមាគម​នេះ​គប្បី​បង្កើន​សមាជិក​បន្ត​ទៀត​ឲ្យ​បាន​ចំនួន​ច្រើន។ អ្នក​ធាក់​ស៊ីក្លូ​គប្បី​ចេះ​និយាយ​ភាសា​បរទេស​ខ្លះៗ ដើម្បី​ទាក់​ទាញ​ភ្ញៀវ​ទេសចរ​បរទេស។

រដ្ឋមន្ត្រី​ក្រសួង​ទេសចរណ៍ លោក ថោង ខុន បាន​មាន​ប្រសាសន៍​ថា ស៊ីក្លូ​គឺ​ជា​មធ្យោបាយ​ដឹក​ជញ្ជូន​សំខាន់​មួយ​ដែរ​ក្នុង​វិស័យ​ទេសចរណ៍​បៃតង៖ «ឯកភាព​គ្នា​ក្នុង​ការ​រៀបចំ​ចំណត ចំណត​ស៊ីក្លូ ពិសេស​នៅ​តាម​ភោជនីយដ្ឋាន នៅ​តាម​សណ្ឋាគារ នៅ​តាម​ហាង​លក់​ទំនិញ នៅ​តាម​គោល​ដៅ​ទេសចរណ៍​ទាំង​អស់​ដូច​ថា រៀបចំ​ចំណត​អាទិភាព ពិសេស​សម្រាប់​ស៊ីក្លូ​នេះ។ ទន្ទឹម​នោះ សាលា​ក្រុង​ក៏​លោក​នឹង​រៀបចំ​ឲ្យ​មាន​ផ្លូវ ពិសេស​សម្រាប់​ស៊ីក្លូ​នៅ​កន្លែង​មួយ​ចំនួន ពី​គោលដៅ​ទេសចរណ៍​មួយ​ទៅ​គោលដៅ​ទេសចរណ៍​មួយ។ ឧទាហរណ៍ ពី​វិមាន​ឯករាជ្យ​ទៅ​វត្ត​ភ្នំ រៀបចំ​ឲ្យ​មាន​ផ្លូវ​ស៊ីក្លូ និង​ផ្លូវ​កង់​ដោយ​ឡែក ឬ​ក៏​ពី​ព្រះបរមរាជវាំង ឬ​ក៏​ពី​គុក​ទួល​ស្លែង ទៅ​ផ្សារ​ទួល​ទំពូង។ល។»

ជាមួយ​គ្នា​នេះ ប្រធាន​សមាគម​អភិរក្ស​ស៊ីក្លូ និង​មុខ​របរ​ក្រៅ​ប្រព័ន្ធ លោក អ៊ឹម សម្បត្តិ បាន​មាន​ប្រសាសន៍​ថា លោក​នឹង​ចាត់​វិធានការ​មួយ​ចំនួន​តាម​ការ​ឯកភាព​គ្នា​នេះ៖ «ទីមួយ គឺ​យើង​រៀបចំ​ស៊ីក្លូ​ឲ្យ​មាន​ឯក​សណ្ឋាន ហើយ​ចំណុច​ទី២ គឺ​រៀបចំ​រចនាបថ​ស៊ីក្លូ​ដូច​សម័យ​រាស្ត្រ​និយម មាន​កណ្ដឹង មាន​ចង្កៀង ហើយ​និង​មាន​ចំណាំងផ្លាត ហើយ​និង​មាន​លេខ​កូដ។ ទាក់​ទង​លេខ​កូដ​នេះ ប្រហែល​ជា​យើង​រៀបចំ​ឲ្យ​មាន​លេខ​កូដ​បណ្ដោះ​អាសន្ន​សិន រង់ចាំ​សម្រេច​ពី​ក្រសួង​សាធារណការ ដើម្បី​យើង​ចុះ​ជា​ស្ថាពរ។ ស៊ីក្លូ​នៅ​ទីក្រុង​ភ្នំពេញ វា​អត់​មាន​បង្កើត​ថ្មី​ទេ វា​មាន​តែ​ថយ​ចុះ ដូច្នេះ​វា​អាស្រ័យ​លើ​អ្នក​ធាក់ សូម្បី​តែ​មាន ៥១៧​គ្រឿង ក៏​មិន​មាន​អ្នក​ធាក់​គ្រប់គ្រាន់​ដែរ»

អ៊ឹម សម្បត្តិ ប្រធាន​សមាគម​ស៊ីក្លូ ៣០៥
ប្រធាន​សមាគម​អភិរក្ស​ស៊ីក្លូ និង​មុខ​របរ​ក្រៅ​ប្រព័ន្ធ លោក អ៊ឹម សម្បត្តិ មាន​ប្រសាសន៍​ប្រាប់​អ្នក​កាសែត កាល​ពី​ថ្ងៃ​ទី៩ ខែ​មករា ឆ្នាំ​២០១៣។ RFA/Sok Serey

អ្នក​ធាក់​ស៊ីក្លូ​ជើង​ចាស់​ម្នាក់​ឈ្មោះ ម៉ែន ច័ន្ទ អាយុ ៧១​ឆ្នាំ មក​ពី​ស្រុក​បាទី ខេត្ត​តាកែវ បាន​ថ្លែង​ថា មុខ​របរ​ធាក់​ស៊ីក្លូ គឺ​ជា​ការងារ​បន្ទាប់​បន្សំ​ក្រៅ​ពី​ការ​ធ្វើ​ស្រែ។ មួយ​ថ្ងៃ​លោក​អ៊ំ​រក​បាន​កំរៃ​រវាង ៨​ពាន់​រៀល ទៅ ២​ម៉ឺន​រៀល។ ប៉ុន្តែ​លោក​អ៊ំ​នៅ​ស្រឡាញ់​មុខ​របរ​ធាក់​ស៊ីក្លូ​នេះ៖ «ខ្ញុំ​បាន​ចូល​សមាគម​នេះ​ដូច​ថា​វា​សប្បាយ​ចិត្ត ដោយ​សារ​បាន​លុយ​កាក់​ចិញ្ចឹម​កូន​ប្រពន្ធ។ កាល​ណា​បាត់​ស៊ីក្លូ​ទៅ គឺ​ថា​ជា​ការ​ព្រួយ​បារម្ភ វា​មិន​សប្បាយ​ចិត្ត​ទេ»

របាយការណ៍​បណ្ដោះ​អាសន្ន​របស់​ក្រសួង​ទេសចរណ៍​កម្ពុជា បាន​ឲ្យ​ដឹង​ថា បច្ចុប្បន្ន​មាន​ស៊ីក្លូ​សរុប​នៅ​ទីក្រុង​ភ្នំពេញ​ចំនួន ៥១៧​គ្រឿង ប្រៀបធៀប​នឹង​សម័យ​មុនៗ ទីក្រុង​ភ្នំពេញ​មាន​ស៊ីក្លូ​ចំនួន​ជាង ១ពាន់​គ្រឿង។

រដ្ឋមន្ត្រី​ក្រសួង​ទេសចរណ៍ លោក ថោង ខុន បាន​បញ្ជាក់​ថា មូលហេតុ​ដែល​នាំ​ឲ្យ​ចំនួន​ស៊ីក្លូ​ថយ​ចុះ​គួរ​ឲ្យ​ព្រួយ​បារម្ភ​នោះ គឺ​ដោយ​សារ​តែ​មាន​កំណើន​មធ្យោបាយ​ទំនើបៗ​ជាច្រើន​នៅ​ភ្នំពេញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

Lim Sithavuth

ពី Phnom Penh

Tricycle or cyclo represents Khmer identity during sixties decade and it should be put under conservation by the government. In contrast, Tuk-tuk is not the Khmer word but almost foreign tourists use this word when communicating with Khmer people, and why? It's because of us who neglect the consequence of misusing the word. From now, we, Cambodian, should not use this word and try to promote our own language.

Jan 10, 2013 12:07 AM