នៅក្នុងពាក្យបណ្ដឹង លោកស្រី មូរ សុខហួរ បានរៀបរាប់ថាអំឡុងពេលធ្វើយុទ្ធនាការឃោសនារកសំឡេងឆ្នោត នាថ្ងៃទី៣០ មិថុនា នៅឯស្រុកកំពង់ត្រាច ខេត្តកំពត លោកស្រីបានព្យាយាមថតរថយន្តរបស់អគ្គលេខាធិការរងសាលាខេត្តកំពត លោក សាន់ ស្មាន់ ដែលពាក់ស្លាកលេខខេមរភូមិន្ទ ហើយមានបិទសញ្ញាគណបក្សប្រជាជនកម្ពុជានៅសងខាងកញ្ចក់ដែលផ្ទុយនឹងច្បាប់បោះឆ្នោត។
លោកស្រី មូរ សុខហួរ បានបន្តថាការសុំថតរូបរថយន្តនោះត្រូវបានរារាំងដោយលោក សាន់ ស្មាន់ ហើយចោទថា លោក សាន់ ស្មាន់ បានច្រានលោកស្រីនិងមួលដៃថែមទៀត។ លោកស្រីបានបន្តទៀតថា ការរុញច្រានលោកស្រីចេញបានបណ្ដាលឲ្យរបូតឡេវអាវ។
លោកស្រី មូរ សុខហួរ បានចោទទៀតថា លោក សាន់ ស្មាន់ បានបញ្ជាឲ្យមនុស្សម្នាក់ទៀតឡើងបើករថយន្តនោះថយក្រោយយ៉ាងលឿនដោយអូសលោកស្រីប្រហែលពីរបីម៉ែត្រ។
លោកស្រី មូរ សុខហួរ បានឲ្យដឹងថា ៖ «ករណីនេះគឺជាករណីព្រហ្មទណ្ឌ។ បើសិនជាគាត់មិនបានប៉ះពាល់ដល់រាងកាយរបស់ខ្ញុំ ឬមួយចិត្តរបស់ខ្ញុំគឺចប់ត្រឹមហ្នឹង។ តែនេះមានការពាក់ព័ន្ធទៅដល់មួលដៃខ្ញុំ រុញច្រានខ្ញុំ រហូតដល់ខ្ញុំរបូតឡេវអាវនៅមុខសាធារណៈ។ នេះគឺជារឿងពាក់ព័ន្ធនឹងព្រហ្មទណ្ឌ ទើបខ្ញុំឡើងមកដល់តុលាការ»។
ឆ្លើយតបទៅនឹងការចោទប្រកាន់នោះ លោក សាន់ ស្មាន់ អគ្គលេខាធិការរងសាលាខេត្តកំពត និងជាប្រធានច្រកទ្វារតន់ហន់ ភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច បានជំទាស់រាល់ពាក្យចោទប្រកាន់របស់លោកស្រី មូរ សុខហួរ ដោយបញ្ជាក់ថាជាការមិនពិត។
លោក សាន់ ស្មាន់ ដែលចូលបំភ្លឺមុខព្រះរាជអាជ្ញាខេត្តកំពតនៅរសៀលថ្ងៃដដែលបានទទួលស្គាល់ថា រថយន្តរបស់លោកដែលពាក់ស្លាកលេខខេមរភូមិន្ទ ពិតជាមានរូបសញ្ញាប្រធានគណបក្សប្រជាជនកម្ពុជាទាំងបីរូបពិតមែន ហើយត្រូវគណៈកម្មធិការជាតិរៀបចំការបោះឆ្នោតពិន័យជាទឹកប្រាក់៥លានរៀលរួចមកហើយ។
លោក សាន់ ស្មាន់ បានឲ្យដឹងទៀតថាលោកមិនបានរុញច្រានលោកស្រី មូរ សុខហួរ រហូតដល់របូតឡេវអាវនោះទេ ហើយថាវាអាចទាក់នឹងរថយន្តដែលកំពុងបរថយក្រោយ។
លោក សាន់ ស្មាន់ បានមានប្រសាសន៍ថា ៖ «រឿងរបេះហ្នឹង បើតាមសាក្សីយើងបំភ្លឺដល់ NEC នៅ PEC ក្ដី គេថាគាត់ថ្ពក់នឹងកាងឡាន ថ្ពក់ត្រងណាអីត្រង់ណា ខ្ញុំមិនដឹងទេ ហើយរបូតមិនរបូតក៏ខ្ញុំអត់បានឃើញដែរ។ ខ្ញុំអត់បានឃើញ គាត់របូតមិនរបូតខ្ញុំអត់ដឹង ពេលហ្នុងដូចថាខ្ញុំបាត់ម្ចាស់ការ មិនដឹងថាគេចង់ធ្វើអី ក៏អត់ស្គាល់ថាគាត់ហ្នឹងនរណាផង»។
លោក សាន់ ស្មាន់ បានបន្តទៀតថាជម្លោះនេះអាចបណ្ដាលមកពីការប្រកួតប្រជែងគ្នារវាងគណបក្សទាំងពីរ គឺគណបក្សប្រជាជនកម្ពុជានិងគណបក្សសមរង្ស៊ី។
តុលាការខេត្តកំពតកំពុងតែចាត់វិធានការស៊ើបអង្កេតក្នុងករណីបណ្ដឹងរបស់លោកស្រី មូរ សុខហួរ នោះ។
គួរជម្រាបផងដែរថា នៅក្នុងពាក្យបណ្ដឹងនោះ លោកស្រី មូរ សុខហួរ បានទាមទារសងជំងឺចិត្តជាទឹកប្រាក់ចំនួន៥០លានរៀល៕