សភាទទួលយកញត្តិសុំឲ្យពន្លឿនច្បាប់ប្រឆាំងអំពើពុករលួយ
ដោយ អ៊ុក សាវបូរី
2008-05-17
សភាជាតិនៃប្រទេសកម្ពុជាបានទទួលយកជាផ្លូវការនូវញត្តិមានផ្តិតស្នាមមេដៃនិងហត្ថលេខារបស់ពលរដ្ឋជាង១លាននាក់ ដែលញត្តិនោះសុំឲ្យរដ្ឋសភាជួយពន្លឿនច្បាប់ប្រឆាំងអំពើពុករលួយ និងឆាប់យកច្បាប់នោះមកអនុម័ត ។
ក្បួនដង្ហែញត្តិទាមទារឲ្យរដ្ឋាភិបាលពន្លឿនការធ្វើច្បាប់ប្រឆាំងអំពើពុករលួយរបស់សង្គមស៊ីវិលទៅកាន់រដ្ឋសភា កាលពីថ្ងៃទី១៦ ខែឧសភា ឆ្នាំ២០០៨ ។
រដ្ឋសភាទទួលយកញត្តិនោះបានធ្វើឡើងនៅព្រឹកថ្ងៃសុក្រ ទី១៦ ខែឧសភា ឆ្នាំ២០០៨ បន្ទាប់ពីសម្ព័ន្ធអង្គការសង្គមស៊ីវិលកម្ពុជាប្រឆាំងអំពើពុករលួយ បានប្រមូលស្នាមមេដៃនិងហត្ថលេខាប្រជាជន ១៩ខែត្រក្រុង កាលពីខែធ្នូ ឆ្នាំ២០០៧ ដល់ថ្ងៃ៣០ ខែមេសា ឆ្នាំ២០០៨ បានចំនួន១៩៤៤៥០នាក់ ដើម្បីជាសក្ខីភាពនៃការចង់បានច្បាប់ប្រឆាំងអំពើពុករលួយ យកមកអនុវត្ត និងមានការដាក់ទោសដល់ជនប្រព្រឹត្តអំពើពុករលួយ ។
មន្រ្តីសម្ព័ន្ធអង្គការសង្គមស៊ីវិលកម្ពុជាប្រឆាំងអំពើពុករលួយ និងជាប្រធានសមាគមការពារសិទ្ធិមនុស្សអាដហុក លោក ធន សារ៉ាយ មានប្រសាសន៍ក្រោយជំនួបប្រគល់ញត្តិរវាងតំណាងសង្គមស៊ីវិល និងគណៈកម្មការទី១នៃរដ្ឋសភា ថា សមាជិកសភាបានទទួលយកសំណូមពរខ្លះ ដែលចែងនៅក្នុងញត្តិនោះ និងមិនបានសន្យាថាច្បាប់ប្រឆាំងអំពើពុករលួយអាចនឹងចេញពីដៃរដ្ឋាភិបាលដាក់ឲ្យសភាអនុម័តនៅពេលណាទេ ។
លោក ធន សារ៉ាយ បានមានប្រសាសន៍ថា ៖ «ពីព្រោះថាសភានេះជិតអស់អាណត្តិហើយអ៊ីចឹងមិនអាចធ្វើអីកើតទេ អ៊ីចឹងទាល់តែសភាក្រោយបានអាចធ្វើអីបាន ប៉ុន្តែយើងបំពងសំឡេងពេលនេះ ដើម្បីឲ្យអ្នកដែលចូលប្រកួតនៅក្នុងការបោះឆ្នោតនៅក្នុងពេលខាងមុខនេះ ខិតខំយកចិត្តទុកដាក់ ហើយដើម្បីឲ្យរដ្ឋាភិបាលសភាអាណត្តិក្រោយនេះ លោកត្រូវតែយកចិត្តទុកដាក់នូវសំឡេងដ៏ធំនេះរបស់ប្រជារាស្រ្តយើងនេះ» ។
ចំណែកប្រធានគណៈកម្មការទី៤នៃរដ្ឋសភា លោក យឹម សុវណ្ណ មានប្រសាសន៍ថា លោកមិនរំពឹងថា ច្បាប់ប្រឆាំងអំពើពុករលួយអាចនឹងចេញឆាប់បានឡើយ ដោយប្រធានសភាកម្ពុជាបានចាត់តាំងគណៈកម្មការទី១នៃរដ្ឋសភា ទៅទទួលញត្តិដែលគណៈកម្មការនោះមិនបានធ្វើការជាមួយអំពើពុករលួយ គឺគណៈកម្មការទី៤ទៅវិញទេដែលត្រូវទទួលញត្តិនោះ ។
លោក យឹម សុវណ្ណ បានឲ្យដឹងថា ៖ «តែខាងគណៈកម្មការទី១ នៃរដ្ឋសភាមិនបានបញ្ជាក់ជំហរអ្វីឲ្យបានច្បាស់លាស់ទេ គឺគាត់តម្លាក់បន្ទុកទៅលើរដ្ឋាភិបាល ថារដ្ឋាភិបាលជាអ្នកដែលរៀបចំសេចក្ដីព្រាងច្បាប់ ដែលគាត់មិនអាចកំណត់ថាពេលណានឹងធ្វើច្បាប់ហ្នឹងបានទេ ។ ហើយជាពិសេសទៅទៀត នៅក្នុងរដ្ឋសភាហ្នឹង តំណាងរាស្រ្តនៃគណបក្សប្រជាជនកម្ពុជាមានច្រើនលើសលុប តែបើសិនជាតំណាងរាស្រ្តនៃគណបក្សប្រជាជនកម្ពុជាចង់ធ្វើ គឺគេធ្វើបាន គេកោះប្រជុំវិសាមញ្ញ រួចហើយជំរុញឲ្យរដ្ឋាភិបាលថា ទេរដ្ឋាភិបាលអ្នកឯងត្រូវតែបញ្ជូនសេចក្ដីព្រាងច្បាប់ហ្នឹងមករដ្ឋសភា» ។
លោកស្រីវេជ្ជបណ្ឌិត ពុង ឈីវកេក មានប្រសាសន៍ថាប្រាក់ច្រើនលានដុល្លារក្នុងមួយខែៗ ក្នុងប្រទេសកម្ពុជា បានបាត់បង់ក្រោមអំពើពុករលួយ ។ ឯប្រទេសកម្ពុជាជាង១៤ឆ្នាំមកហើយដែលបានសន្យាជាមួយម្ចាស់ជំនួយ និងប្រជាជនទូទៅ ថានឹងមានច្បាប់នោះ ប៉ុន្តែនៅតែមិនអាចបញ្ចេញច្បាប់ប្រឆាំងអំពើពុករលួយមកដាក់ទោសដល់អ្នកប្រព្រឹត្តឬអនុវត្តក្នុងប្រទេសកម្ពុជាបានទេ ។
ចំណែកប្រជាជន សិស្ស និសិ្សត ដែលបានចូលរួមក្នុងពិធីប្រគល់ញត្តិទៅសមាជិកសភា នៅថ្ងៃសុក្រ សុទ្ធតែរំពឹងថារដ្ឋាភិបាលថ្មីនឹងជួយពន្លឿនច្បាប់ប្រឆាំងអំពើពុករលួយនៅក្រោយជាប់ឆ្នោតសភាអាណត្តិទី៤ ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
កងវិស្វកម្មនៅស្រុកបាធាយចោទថា មេរបស់ខ្លួនកិបកេងប្រាក់ឧបត្ថម្ភ
ប៉ូលិសប្រឆាំងការជួញដូរមនុស្សនៅបាត់ដំបងរងការចោទប្រកាន់ថាពុករលួយ
សង្គមស៊ីវិលនិងបក្សនយោបាយគ្រោងប្រជុំពីបញ្ហាពុករលួយ
ការបកស្រាយរបស់អ្នកច្បាប់ទាក់ទងនឹងការឃុំខ្លួនចាងហ្វាងកាសែតមនសិការខ្មែរ
សង្គមស៊ីវិលនិងការជំរុញឲ្យមានច្បាប់ប្រឆាំងអំពើពុករលួយ
ក្រសួងមហាផ្ទៃនឹងដាក់ទោសសមត្ថកិច្ចដែលធ្វើបាបស្រ្តីរកស៊ីផ្លូវភេទក្រោយពេលចាប់ខ្លួន
ការក្លែងបន្លំឯកសារអត្តសញ្ញាណនិងអំពើពុករលួយនៅច្រកប៉ោយប៉ែត
ហ៊ុន សែន ព្រមានពីការរឹបអូសទ្រព្យសម្បត្តិពីជនពុករលួយ
បេក្ខជនដាក់ពាក្យសុំធ្វើការជាអ្នករៀបចំបោះឆ្នោតចោទថា មានការទារប្រាក់
ប៉េអឹមស្រុកដូនកែវខេត្តតាកែវជំរិតទារប្រាក់អ្នកលក់ឱសថបុរាណ
