សូមបញ្ជាក់ថាប៉ុន្មានថ្ងៃកន្លងមកនេះមានការបញ្ចេញឯកសារមួយពីខេត្តសៀមរាប ដែលមានចុះឈ្មោះ លេខកូដការិយាល័យបោះឆ្នោតត្រឹមត្រូវ នៅក្នុងឃុំចុងឃ្នៀស បង្ហាញឈ្មោះមនុស្សប្រមាណ៣០០នាក់ដែលប្រើនាមត្រកូល សែ ង្វៀង សែ ត្រឹង សែ ផាម។ល។ ដែលគេជឿថាសុទ្ធជាក្រុមនាមត្រកូលសែស្រឡាយវៀតណាម ។ ឈ្មោះមនុស្សទាំងនោះត្រូវគណៈកម្មាធិការជាតិរៀបចំការបោះឆ្នោតបានប្រថាប់ត្រាផ្តល់សិទ្ធិឲ្យមានការបោះឆ្នោតរួចមកហើយកន្លងមកនេះ ។
អគ្គលេខាធិការនៃគណៈកម្មាធិការជាតិរៀបចំការបោះឆ្នោត លោក ទេព នីថា បានមានប្រសាសន៍ថាលោកមិនដឹងថាការបញ្ចេញឯកសារជាសាធារណៈបង្ហាញឈ្មោះវៀតណាមទាំងនោះ កំពុងតែមានគោលបំណងអ្វីណាមួយនោះទេ ប៉ុន្តែលោកបានបកស្រាយថាការចុះឈ្មោះរាល់ជនបរទេសនិងផ្តល់សិទ្ធិឲ្យបានទៅបោះឆ្នោត គឺអាស្រ័យយោងតាមឯកសារអត្តសញ្ញាណប័ណ្ណត្រឹមត្រូវរបស់ពួកគេ ។
លោក ទេព នីថា បានមានប្រសាសន៍ថា ៖ «គ.ជ.ប.ពុំមានសមត្ថកិច្ចនឹងផ្ដល់សញ្ជាតិឲ្យនរណាម្នាក់ទេ ក៏ប៉ុន្តែប្រសិនបើប្រជាពលរដ្ឋដែលមានឯកសារបញ្ជាក់សញ្ជាតិច្បាស់លាស់ហើយមកចុះឈ្មោះបោះឆ្នោត យើងចុះជូន» ។
ម៉ាយ៉ារិទ្ធិ ៖ ដូច្នេះបានន័យថាគេមានសញ្ជាតិខ្មែររួចទៅហើយ ?
ទេព នីថា ៖ ខ្ញុំមិនដឹងយ៉ាងណាទេ តែដំណើរការចុះឈ្មោះអ៊ីចឹង កាលណាមានអត្តសញ្ញាណប័ណ្ណសញ្ជាតិខ្មែរ មានប័ណ្ណគ្រួសារដែលបញ្ជាក់ថាសញ្ជាតិខ្មែរហើយ យើងចុះឲ្យហើយ ។
ក្រសួងមហាផ្ទៃនៅមិនទាន់មានប្រតិកម្មឆ្លើយតបចំពោះការផ្សាយឯកសារបង្ហាញឈ្មោះសែត្រកូលជាតិវៀតណាមទាំងនោះទេនៅថ្ងៃនេះ ៕