ប្រធានមជ្ឈមណ្ឌលវប្បធម៌ជាតិនិងសីលធម៌សង្គម លោក ប៉ូ សំណាង អះអាងនៅថ្ងៃទី៤ កញ្ញា ថា សៀវភៅ១ម៉ឺន៥ពាន់ក្បាលនោះចែកជូនមិនគិតថ្លៃ តាមភ្លើងស្តុប៤កន្លែង ជិតពេទ្យព្រះសង្ឃ ជិតពេទ្យព្រះអង្គឌួង ជិតក្រសួងកសិកម្ម និងជិតរង្វល់មូលក្បាលថ្នល់។ ការចែកនោះក្នុងគោលបំណងឲ្យអ្នកដំណើរអាននិងរៀនពីច្បាប់និងស្លាកសញ្ញាចរាចរណ៍ជួយបន្ថយគ្រោះថ្នាក់។
លោកថា កាលពីថ្ងៃ២៧ ខែកក្កដា ក្រសួងមហាផ្ទៃ ក្រសួងគមនាគមន៍ និងអង្គការក្រៅរដ្ឋាភិបាល ប្រជុំរិះរកវិធីឲ្យប៉ូលិសអនុវត្តច្បាប់ចរាចរណ៍ឲ្យបានល្អ ប៉ុន្តែច្បាប់នោះពុំបានផ្សព្វផ្សាយទូលំទូលាយទេ។
លោក ប៉ូ សំណាង បានឲ្យដឹងថា ៖ «ជារៀងរាល់ថ្ងៃអ្នកចុះឈ្មោះទៅរៀនច្បាប់បើកបរហ្នឹង វានៅមានកម្រិតតិចណាស់ គួបផ្សំទៅនឹងក្រសួងសាធារណការ ក៏ដូចជាមន្ទីរសាធារណការខេត្តក្រុង ការផ្សព្វផ្សាយហ្នឹងវាស្ទើរតែតិចបំផុតសម្រាប់អ្នកដែលបញ្ជាយានយន្ត គឺថាសឹងតែពុំបានទទួលយល់ដឹងច្បាប់បើកបរ ច្បាប់ចរាចរណ៍»។
លោក ប៉ូ សំណាង រិះគន់ថាគ្រោះថា្នក់បានកើនបណ្តាលឲ្យមានអ្នកស្លាប់ក្នុងមួយថ្ងៃច្រើនជាង៤នាក់ មកពីមន្រ្តីអនុវត្តច្បាប់ចរាចរណ៍ នៅបន្តធ្វើឲ្យច្បាប់គ្មានប្រសិទ្ធភាព។
លោកថាមន្រ្តីទាំងនោះបណ្តោយឲ្យរថយន្តចតពីរជួរ ប្រើរយៈពេលយូរនាំឲ្យស្ទះចរាចរណ៍លើដងវិថីនិងមហាវិថី ។ ចតឬឈប់មិនប្រកាន់ស្តាំ បញ្រ្ចាសទិស ចតឬឈប់កែងភ្លើងស្តុប ត្រង់ផ្លូវកោង ចតត្រួតពីរជួរមុខសណ្ឋាគារ មុខភោជនីយដ្ឋាន ចតពីរជួរតាមផ្សារនានា បណ្តោយឲ្យអ្នកបើកបរចុះចោលចង្កូត ហើយប្រើពេលច្រើនម៉ោង រីឯមន្រ្តីនគរបាលអនុវត្តច្បាប់ចរាចរណ៍ បែរជាឈរយាមការពាររថយន្តដែលចតឬឈប់ខុសនោះ ទើបធ្វើឲ្យច្បាប់ចរាចរណ៍អនុវត្តគ្មានប្រសិទ្ធភាព។
អ្នកធ្វើដំណើរតាមដងវិថីបានរិះគន់មន្រ្តីអនុវត្តច្បាប់ចរាចរណ៍ថា មន្រ្តីខ្លះមិនបានដាក់កញ្ចក់ម៉ូតូខ្លួនឯងទេ ប៉ុន្តែបែរជាទៅផាកពិន័យអ្នកកំពុងធ្វើចរាចរណ៍តាមផ្លូវឲ្យដាក់កញ្ចក់ម៉ូតូ ឲ្យពាក់មួកសុវត្ថិភាព។
ឆ្លើយតបទៅនឹងការរិះគន់ខាងលើនេះ ប្រធានចរាចរណ៍ជើងគោករាជធានីភ្នំពេញ លោក ទិន ប្រសើរ មានប្រសាសន៍ថាមន្រ្តីអនុវត្តច្បាប់ចរាចរណ៍មានពីរសណ្ឋាន គឺគ្រប់គ្រងសណ្តាប់ធ្នាប់ និងចរាចរណ៍ជើងគោក។ លោកថានគរបាលទាំងពីរនេះមានសម្លៀកបំពាក់ប្រហាក់ប្រហែលគ្នា និងធ្វើការស្រដៀងគ្នា។
លោក ទិន ប្រសើរ បានឲ្យដឹងថា ៖ «ប៉ូលិសចរាចរណ៍ស្លៀកពាក់ស្រដៀងនឹងប៉ូលិសសណ្ដាប់ធ្នាប់ដែរ ប៉ុន្តែមានអាវចាំងពន្លឺពីក្រៅ»។
ចំណែកប្រធាននគរបាលសណ្តាប់ធ្នាប់ លោក ហាស់ ភិរម្យ មានប្រសាសន៍ថាក្រៅពីនគរបាលទាំងពីរនេះ ក៏មាននគរបាលខណ្ឌធ្វើការងារចរាចរណ៍ដែរ ដោយពុំអាចដឹងថាក្រុមណាមួយជាអ្នកអនុវត្តខុសច្បាប់ទេ ៖ «មាន២ ទី១ កម្លាំងចរាចរណ៍ ទី២ ពាក់ព័ន្ធនឹងខណ្ឌ»។
យោងតាមរបាយការណ៍ក្រសួងមហាផ្ទៃកាលពីថ្ងៃទី២៧ កក្កដា ថា កំណើនគ្រោះថ្នាក់ចរាចរណ៍បានកើនចាប់ពីទសវត្សរ៍១៩៩០មក។ បច្ចុប្បន្នមនុស្សច្រើនជាង៤នាក់ស្លាប់ក្នុងមួយថ្ងៃ និង ៧០នាក់រងរបួស។ ឯ៧ខែដើមឆ្នាំ២០០៨ គ្រោះថ្នាក់ចរាចរណ៍មាន១៨ករណី នាំឲ្យមនុស្សរងគ្រោះ៣២នាក់៕