លោកបណ្ឌិត ហៀង រិទ្ធី ប្រធានអង្គការស៊ីអិនរ៉ូមានប្រសាសន៍រៀបរាប់អំពីភិនភាគនៃជនសង្ស័យជាអ្នកប៉ងសម្លាប់រូបលោកយ៉ាងដូច្នេះ ៖ «ក៏ស្រាប់តែមានរថយន្តមួយម៉ាកវីហ្គោ ពណ៌ខ្មៅ ពាក់ស្លាកលេខ ខម២ លេខ៩៩១៦ ហើយម្នាក់នោះអាយុប្រហែល ៣៧-៣៨ឆ្នាំ ហើយក៏ឈប់ចំពីមុខឡានដែលកំពុងបើកបរ ស្តុបភ្លាម... ក៏បញ្ជាឲ្យខ្ញុំចុះពីឡាន ហើយវាថា "ចុះមក អ្ហែងមិនចុះអញបាញ់ងាប់ឥឡូវ"»។
លិខិតចុះថ្ងៃទី២៦ កញ្ញា របស់ប្រធានអង្គការស៊ីអិនរ៉ូដែលបានផ្ញើជូនរដ្ឋមន្ត្រីក្រសួងមហាផ្ទៃដើម្បីវែកមុខជនសង្ស័យនោះ លោកបណ្ឌិត ហៀង រិទ្ធី បានឲ្យដឹងថា ដោយហោចណាស់មានមនុស្សប្រមាណ៣០នាក់បានឃើញសភាពការណ៍គំរាមនោះ ដែលបានកើតឡើងនៅចំណុចផ្លូវលេខ៤៨៨ នៅទល់មុខវិទ្យាស្ថានប៊ែលធី។
គួររំឭកផងដែរថា ក្រៅពីកិច្ចការស្រាវជ្រាវនិងការងារប្រឹងប្រែងពង្រឹងវិស័យច្បាប់លោកបណ្ឌិត ហៀង រិទ្ធី ក៏ត្រូវបានពណ៌នាថាជាបញ្ញាជនមួយរូបដែលមានសម្តីរិះគន់ចំៗនិងខ្លាំងៗចំពោះឥស្សរជនឬស្ថាប័នដែលលោកយល់ថា មិនបានធ្វើតាមច្បាប់និងពាក្យសន្យារបស់ខ្លួន។
លោកបណ្ឌិត ហៀង រិទ្ធី ក៏បានទទួលសារភាពដូច្នោះផងដែរ ៖ «ចំណុចសំខាន់ៗនេះខ្ញុំក៏បានបញ្ជាក់ផងដែរអំពីបញ្ហាបោះឆ្នោតមិនយុត្តិធម៌ ការដែលខ្ញុំបានថា លោក សម រង្ស៊ី ការតវ៉ារបស់គាត់គ្មានប្រសិទ្ធភាពដោយសារគាត់មានភាពល្ងង់ខ្លៅខ្លួនឯង។ ឃើញអ្នកណាខុសខ្ញុំថាទាំងអស់ ឲ្យតែមិនមានលក្ខណៈថា ធ្វើទៅវាត្រឹមត្រូវទៅតាមឆន្ទៈរបស់ប្រជារាស្ត្រ អាហ្នឹងគឺថា ខ្ញុំរិះគន់ ទិតៀន ថាខ្លាំងៗអ៊ីចឹង មិនញញើតថាទេ ព្រោះឃើញការពិតត្រូវតែហ៊ានថា អាហ្នឹងថ្មីៗនេះអ៊ីចឹង។ សម្ដេចសង្ឃរាជ ទេព រង្ស ក៏ខ្ញុំរិះគន់ រដ្ឋាភិបាលកម្ពុជាក៏ខ្ញុំរិះគន់ដែរ។ ក្រោយពីការគំរាមកំហែងនេះ ព្រឹកមិញនេះខ្ញុំបានដាក់លិខិតទៅឯកឧត្ដមឧបនាយករដ្ឋមន្ត្រី ស ខេង ដើម្បីស្នើសុំឲ្យគាត់មានវិធានការ គ្រប់ស្ថាប័នទាំងអស់ឲ្យស្វែងរកស្លាកលេខ ខម២ ៩៩១៦ ដែលគំរាមកំហែងបាញ់សម្លាប់ខ្ញុំយប់មិញនេះ»៕