លោក យ៉ាប់ គឹមទឹង ប្រធានអង្គការខារ៉ាត់ បានឲ្យដឹងយ៉ាងដូច្នេះ ៖ «អ្វីសំខាន់ ព្រោះកិច្ចព្រមព្រៀងឆ្នាំ១៩៩១ នៅក្នុងទីក្រុងប៉ារីស បានចារសារសំខាន់ជាច្រើននៅក្នុងហ្នឹង ជាពិសេសសិទ្ធិមនុស្ស ហើយនិងលទ្ធិប្រជាធិបតេយ្យសម្រាប់ប្រជាជនខ្មែរយើង។ ហើយមួយទៀតដូចការពារព្រំដែនរបស់ខ្មែរយើងដែរ ហើយមួយទៀតកិច្ចព្រមព្រៀងហ្នឹងបាននាំសុខសន្តិភាពទៅដល់ស្រុកខ្មែរយើង»។
កិច្ចព្រមព្រៀងសន្តិភាពទីក្រុងប៉ារីសបានចែងអំពីការគោរពបូរណភាពទឹកដីនិងឯករាជភាពរបស់ប្រទេសកម្ពុជាពីសំណាក់ប្រទេសជិតខាងផងដែរ។
លោក យ៉ាប់ គឹមទឹង បានអះអាងបន្តថា ប្រសិនបើកិច្ចព្រមព្រៀងសន្តិភាពទីក្រុងប៉ារីសត្រូវបានយកមកអនុវត្តឲ្យបានត្រឹមត្រូវពេញលេញនោះ មិនត្រឹមតែប្រជាពលរដ្ឋខ្មែរទទួលបាននូវសិទ្ធិសេរីភាពពេញបរិបូរណ៍និងការរីកចម្រើនស្រុកទេសប៉ុណ្ណោះទេ ប៉ុន្តែការខាតបង់ទឹកដីរបស់ប្រទេសខ្មែរទៅប្រទេសជិតខាងក៏នឹងមិនកើតមានផងដែរ។
លោក យ៉ាប់ គឹមទឹង បានបញ្ជាក់ថា ៖ «ហើយមួយចំណុចទៀតខ្ញុំចង់រំឭកហ្នឹងមកពីយើងសោកស្ដាយខ្លះដែរ ពីព្រោះថាកិច្ចព្រមព្រៀងហ្នឹងមិនបានយកទៅអនុវត្តឲ្យបានត្រឹមត្រូវ ដល់ពេលអ៊ីចឹងទៅប្រជាជនខ្មែរយើងនៅខ្វះសិទ្ធិជាច្រើន ហើយមួយទៀតដូចថា យើងនៅតែមានបញ្ហាទាក់ទងនឹងព្រំដែន ព្រំដែនជាមួយថៃនៅម្ដុំព្រះវិហារហ្នឹង។ ប៉ុន្តែពួកយើងសោកស្ដាយខ្លាំងមែនទែនគឺព្រំដែនជាមួយវៀតណាម ពីព្រោះធ្លាប់មកគ្រប់គ្រងប្រទេសខ្មែរយើង ហើយគេបានធ្វើកិច្ចព្រមព្រៀងជាមួយខ្មែរយើងនៅក្នុងកាលគេត្រួតត្រាយើងហ្នឹង បង្ខំឲ្យយើងទទួលស្គាល់កិច្ចព្រមព្រៀងកាលដែលគេនៅត្រួតត្រាយើង។ ពួកយើងនៅក្រៅប្រទេសយល់ថា យើងទទួលស្គាល់ព្រំប្រទល់ជាមួយប្រទេសយួនសព្វថ្ងៃហ្នឹង គឺយើងមិនចំណេញមកប្រទេសខ្មែរយើង។ ពីរឿងព្រំប្រទល់ជាមួយថៃសព្វថ្ងៃហ្នឹង ពួកយើងពីក្រៅប្រទេសខ្មែរយល់ថា រដ្ឋាភិបាលខ្មែរយើងគួរតែយកកិច្ចព្រមព្រៀងហ្នឹងទៅទាក់ទងនឹងអង្គការសហប្រជាជាតិដើម្បីជួយដោះស្រាយបញ្ហាដែលយើងមានជាមួយថៃហ្នឹង»។
គួររំឭកផងដែរថា កាលពីថ្ងៃទី២៣ តុលា ឆ្នាំ១៩៩១ នៅទីក្រុងប៉ារីស ប្រទេសបារាំង មេដឹកនាំខ្មែរ៤ភាគី គឺសម្ដេចព្រះនរោត្ដម សីហនុ ប្រធានភាគីអ្នកតស៊ូខ្មែររាជានិយមហ៊្វុនស៊ិនប៉ិច លោកតា សឺន សាន ប្រធានរណសិរ្សជាតិរំដោះប្រជាពលរដ្ឋខ្មែរ លោក ខៀវ សំផន តំណាងភាគីខ្មែរក្រហម និងលោក ហ៊ុន សែន នាយករដ្ឋមន្រ្តីនៃសាធារណរដ្ឋប្រជាមានិតកម្ពុជា បានចុះហត្ថលេខាលើកិច្ចព្រមព្រៀងមួយនេះដើម្បីបញ្ចប់សង្រ្គាមនៅកម្ពុជា។
នៅក្នុងពិធីជាប្រវត្តិសាស្រ្តនោះក៏មានតំណាងប្រទេសចំនួន១៨ ក្នុងនោះមានប្រទេសថៃ ប្រទេសវៀតណាម និងប្រទេសលាវ ចូលរួមនិងចុះហត្ថលេខាជាសាក្សីលើកិច្ចព្រមព្រៀងសន្តិភាពនេះផងដែរ៕