សង្គមស៊ីវិលនិងការជំរុញឲ្យមានច្បាប់ប្រឆាំងអំពើពុករលួយ

ដោយ អ៊ុក សាវបូរី

2008-06-09

សម្ព័ន្ធអង្គការសង្គមស៊ីវិលកម្ពុជាប្រឆាំងអំពើពុករលួយថ្លែងនៅថ្ងៃច័ន្ទ ទី៩ ខែមិថុនា ឆ្នាំ២០០៨ ថាមុនពេលបោះឆ្នោតនឹងផ្សព្វផ្សាយជាសាធារណៈនូវលទ្ធផលនៃការស្វែងរកកិច្ចសន្យាពីគោលជំហររបស់គណបក្សនយោបាយទាំង១១ ដែលបានចូលរួមប្រកួតប្រជែងបោះឆ្នោតសភាលើកទី៤ ក្នុងការធ្វើឲ្យប្រទេសកម្ពុជា មានច្បាប់ប្រឆាំងអំពើពុករលួយឬគ្មាន ។

RFA Photo

សកម្មជននៃអង្គការសង្គមស៊ីវិលនាំគ្នាដង្ហែក្បួនធ្វើយុទ្ធនាការទាមទារឲ្យរដ្ឋាភិបាលពន្លឿនការធ្វើច្បាប់ប្រឆាំងអំពើពុករលួយកាលពីចុងឆ្នាំ២០០៦ ។

លោកស្រីវេជ្ជបណ្ឌិត ពុង ឈីវកេក មានប្រសាសន៍ថា ច្បាប់ប្រឆាំងអំពើពុករលួយនៅបន្តជាប់គាំងបើទោះបីសេចក្តីព្រាងនីតិវិធីព្រហ្មទណ្ឌត្រូវបានធ្វើរួចរាល់ហើយក៍ដោយ ។ ហើយកាលពីថ្ងៃ១៦ ឧសភា ឆ្នាំ២០០៨ សម្ព័ន្ធអង្គការសង្គមស៊ីវិលកម្ពុជាប្រឆាំងអំពើពុករលួយ បានបញ្ជូនញត្តិមានហត្ថលេខានិងស្នាមមេដៃរបស់ប្រជាជនជាង១លាននាក់ ទាមទារឲ្យសភាប្រទេសកម្ពុជាពន្លឿននិងឆាប់អនុម័តច្បាប់ប្រឆាំងអំពើពុករលួយស្របតាមបទដ្ឋានអន្តរជាតិ យកមកអនុវត្តក្នុងប្រទេសនេះឲ្យមានការដាក់ទោសដល់អ្នកប្រព្រឹត្តពុករលួយ ។

លោកស្រីវេជ្ជបណ្ឌិត ពុង ឈីវកេក បានមានប្រសាសន៍ថា ៖ «ប្រសិនបើគណបក្សណាមួយឈ្នះឆ្នោត តើគណបក្សនោះនឹងធ្វើឲ្យច្បាប់ប្រឆាំងអំពើពុករលួយមួយដែលស្របតាមបទដ្ឋានអន្តរជាតិ និងជំរុញឲ្យមានការអនុម័តយ៉ាងយូរបំផុតត្រឹមដំណាច់ឆមាសទី១នៃអាណត្តិថ្មីរបស់រដ្ឋាភិបាល...» ។

ពាក់ព័ន្ធនឹងការលើកឡើងខាងលើក្នុងចំណោមគណបក្ស ១១ ដែលបានចូលរួមបោះឆ្នោតសភាលើកទី៤ គណបក្សខ្លះដែលវិទ្យុអាស៊ីសេរីបានសាកសួរមានគណបក្ស នរោត្តម រណឫទ្ធិ ប្រធានគណបក្សសិទ្ធិមនុស្ស ប្រធានគណបក្សប្រជាធិបតេយ្យខ្មែរ បានសម្ដែងសុឆន្ទៈគាំទ្រថា នឹងបង្កើនល្បឿនការអនុម័តច្បាប់ប្រឆាំងអំពើពុករលួយឲ្យបាននៅក្នុងអាណត្តិរដ្ឋាភិបាលថ្មី ។

ចំណែកតំណាងគណបក្សប្រជាជនកម្ពុជា លោក ជាម យៀប មានប្រសាសន៍យ៉ាងដូច្នេះ ៖ «ច្បាប់ប្រឆាំងអំពើពុករលួយហ្នឹង ថាត្រូវចេញពីរបីឆ្នាំមកហើយ តាំងពីពាក់កណ្ដាលអាណត្តិទី៣ ។ ប៉ុន្តែឥឡូវនេះយើងឃើញថាដោយសារការរុញ... រវាងអន្តរក្រសួងរបស់រាជរដ្ឋាភិបាលជាមួយនិងសហគមន៍អន្តរជាតិ នៅក្នុងនោះមានដូចជា អង្គការ JICA អង្គការស៊ីដា World Bank ឬក៏ FMF អីហ្នឹង NGO មួយចំនួនធ្វើឲ្យមានការយឺតយ៉ាវ ។ ដូច្នេះគណបក្សប្រជាជនកម្ពុជាក៏ចង់ដូចគណបក្សផ្សេងៗទៀតដែរ ចង់បានកេរ្តិ៍ឈ្មោះ ចង់បានកិត្តិយស ចង់បានការជឿទុកចិត្តពីប្រជាពលរដ្ឋ ដើម្បីឲ្យគាត់ចូលរួមបោះឆ្នោតឲ្យគណបក្សប្រជាជនកម្ពុជា ឈ្នះឆ្នោតនៅក្នុងអាណត្តិទី៤បន្តទៅទៀត» ។

រីឯលោក សេក បរិសុទ្ធ មន្រ្តីកម្មវិធីប្រឆាំងអំពើពុករលួយរបស់អង្គការផេកកម្ពុជា មានប្រសាសន៍ថាអំពើពុករលួយជាឧបសគ្គធ្ងន់សម្រាប់ការអភិវឌ្ឍនៅក្នុងប្រទេសកម្ពុជា ។ បើតាមការសិក្សាឆ្នាំ២០០៥ របស់វិទ្យាស្ថានសេដ្ឋកិច្ចកម្ពុជា រកឃើញថាវិស័យឯកជនចំណាយក្រៅផ្លូវការក្នុង១ឆ្នាំៗ ប្រមាណ៣៣០លានដុល្លារអាមេរិក និងរដ្ឋាភិបាលបាត់ប្រាក់ចំណូលពន្ធ ៤០០លានដុល្លារអាមេរិកផងដែរ ។

លោកបន្តថាអង្គការតម្លាភាពអន្តរជាតិឲ្យដឹងថា ប្រទេសកម្ពុជាបាត់បង់ប្រាក់យ៉ាងហោចណាស់ ១លានដុល្លារអាមេរិកក្នុង១ថ្ងៃៗ ដោយសារតែអំពើពុករលួយ ។ ហេតុដូច្នេះបានជាច្បាប់ប្រឆាំងអំពើពុករលួយត្រូវការចាំបាច់សម្រាប់ប្រទេសកម្ពុជា ៕

បោះពុម្ព អ៊ីម៉េល