លោក Barack Obama បានថ្លែងថា ៖ «ចំពោះអ្នកដែលមានបំណងចង់ហែកកម្ទេចពិភពលោក យើងនឹងយកឈ្នះលើអ្នក។ ចំពោះអ្នកដែលស្វែងរកសន្តិភាពនិងសន្តិសុខជូនពិភពលោកវិញនោះ យើងនឹងគាំទ្រអ្នក»។
លោក Barack Obama បេក្ខជនប្រធានាធិបតីពីគណបក្សប្រជាធិបតេយ្យបានឈ្នះឆ្នោតដ៏លើសលុបលើគូប្រជែងរបស់លោក គឺលោក John MacCain ពីគណបក្សសាធារណរដ្ឋកាលពីយប់ថ្ងៃអង្គារ។ នេះជាលើកដំបូងបំផុតក្នុងទំព័រប្រវត្តិសាស្ត្រជាង២០០ឆ្នាំនៃកាបោះឆ្នោតក្នុងសហរដ្ឋអាមេរិកដែលប្រធានាធិបតីមានឈាមជ័រជាអាមេរិកាំងស្បែកខ្មៅ។
សូមជម្រាបថា លោក Barack Obama មានឪពុកជាជនជាតិ Kenya ជាប្រទេសមួយស្ថិតនៅក្នុងទ្វីបអាហ្វ្រិកនិងមានម្តាយជាអាមេរិកាំងស្បែកស។
នៅក្នុងឱកាសថ្លែងសុន្ទរកថា ជ័យជម្នះនិងសម្តែងអំណរគុណដល់អ្នកគាំទ្រ ក៏ដូចជាប្រជាជនអាមេរិកាំងទាំងមូល លោក Barack Obama បានមានប្រសាសន៍ថា សហរដ្ឋអាមេរិកជាប្រទេសដែលអាចសម្រេចសុបិនឬបំណងប្រាថ្នារបស់ខ្លួនបានដូចលទ្ធផលនៃការបោះឆ្នោតនៅក្នុងថ្ងៃនេះបញ្ជាក់ជាភស្តុតាង។
លោក Barack Obama នឹងចូលស្បថកាន់តំណែងជាប្រធានាធិបតីសហរដ្ឋអាមេរិកទី៤៤ ជាផ្លូវការនៅថ្ងៃទី២០ ខែមករា ដើមឆ្នាំ២០០៩ខាងមុខនេះ។ លោកបានឲ្យដឹងថា កិច្ចការដំបូងបំផុតរបស់លោកជាប្រធានាធិបតី គឺការចេញបញ្ជាឲ្យមានការដោះស្រាយបញ្ហាសេដ្ឋកិច្ចដែលសហរដ្ឋអាមេរិកកំពុងប្រឈមយ៉ាងធ្ងន់ធ្ងរ។
នៅក្នុងអំឡុងពេលឃោសនារកសំឡេងឆ្នោតគាំទ្រ លោក Barack Obama ក៏បានសន្យាចំពោះម្ចាស់ឆ្នោតដែរថា លោកនឹងដកកងទ័ពអាមេរិកាំងចេញពីប្រទេសអ៊ីរ៉ាក់ឲ្យអស់នៅក្នុងរយៈពេល១៦ខែ។
នៅប្រទេស Kenya ឯណោះវិញ ប្រធានាធិបតី Kenya បានចេញសេចក្តីប្រកាសឲ្យមានការឈប់សម្រាកពីការងារមួយថ្ងៃដើម្បីអបអរសាទរជ័យជម្នះរបស់លោក Barack Obama ដែលមានឈាមជ័រជាជនជាតិ Kenya។
ចំណែកមេដឹកនាំប្រទេសនិងអ្នកនយោបាយនានាជុំវិញពិភពលោកក្នុងនោះមានប្រទេសកម្ពុជាផងក៏បានសម្តែងការស្វាគមន៍ចំពោះជ័យជម្នះរបស់លោក Barack Obama ប្រធានាធិបតីថ្មី ពីគណបក្សប្រជាធិបតេយ្យនេះផងដែរ បន្ទាប់ពីលោកប្រធានាធិបតី George Bush នៃគណបក្សសាធារណរដ្ឋដែលដឹកនាំប្រទេសអស់រយៈកាលពីរអាណត្តិ ឬ៨ឆ្នាំកន្លងមកនេះ។
គួររំឮកថា ដោយសារសហរដ្ឋអាមេរិកជាប្រទេសមហាអំណាចមួយទាំងផ្នែកសេដ្ឋកិច្ចនិងយោធា ព្រមទាំងជាប្រទេសដែលផ្តល់ជំនួយហិរញ្ញវត្ថុដល់ប្រទេសនានានៅជុំវិញពិភពលោកផងនោះ ទំនោរនយោបាយក្រៅប្រទេសក៏ដូចជាបុគ្គលិកលក្ខណៈផ្ទាល់ខ្លូនរបស់ប្រធានាធិបតីនីមួយៗ ក៏មានសារសំខាន់ណាស់ខ្លាំងណាស់ដែរសម្រាប់ប្រទេសផងទាំងឡាយនៅលើពិភពលោកនេះ៕