លោក ហ៊ុន សែន បានមានប្រសាសន៍ដូច្នេះនៅក្នុងពិធីប្រគល់ជ័យលាភីអាហារូបករណ៍ដល់និសិ្សតនាវិទ្យាស្ថានជាតិអប់រំ ដោយបានបញ្ជាក់ថា រដ្ឋាភិបាលចម្រុះនាពេលបច្ចុប្បន្ននេះរវាងគណបក្សប្រជាជនកម្ពុជានិងគណបក្សហ៊្វុនស៊ិនប៉ិច គឺមានចំនួនគណៈរដ្ឋមន្រ្តីច្រើនទៅហើយ ដូច្នេះវាពិបាកនឹងទទួលយកគណបក្សផ្សេងទៀតមកចូលរួម។
លោកនាយករដ្ឋមន្រ្តីបានមានប្រសាសន៍ថា ៖ «សូមបញ្ជាក់ឲ្យច្បាស់ថា រដ្ឋាភិបាលនេះគឺមានតែគណបក្សប្រជាជននិងហ៊្វុនស៊ិនប៉ិចប៉ុណ្ណោះ គ្មានអ្នកផ្សេងទេ។ អ៊ីចឹងអ្នកដែលត្រៀមធ្វើរដ្ឋលេខាធិការ ត្រៀមធ្វើអនុខេត្ត អនុស្រុកអីនេះ បើថាចាញ់បោកគេ ទៅតាមទារលុយមកវិញមក ព្រោះខ្ញុំបារម្ភណាស់អាហ្នឹង បារម្ភជួសតែម្ដង ព្រោះគេត្រៀមណាស់ ថានឹងបានរដ្ឋលេខាធិការមួយក្រសួងមួយ អនុរដ្ឋលេខាធិការមួយក្រសួងមួយ ខេត្តអាចមួយនិងពីរ គណបក្ស នរោត្ដម រណឫទ្ធិ មានមនុស្សធ្វើអារឿងហ្នឹង។ អ៊ីចឹងខ្ញុំនិយាយកាត់មុនតែម្ដង មិនចង់ឲ្យមាននរណាមួយ Lobby (បញ្ចុះបញ្ចូល) អ៊ីចេះ Lobby អ៊ីចុះ។ មេរបស់មេវានៅឯណេះ»។
មន្រ្តីគណបក្ស នរោត្តម រណឫទ្ធិ បានមានប្រសាសន៍ថា រហូតមកទល់នឹងពេលនេះគណបក្សមិនដែលមានការចរចាដើម្បីចូលរួមនៅក្នុងរដ្ឋាភិបាលចម្រុះនោះឡើយ។
លោក ស៊ុត ឌីណា អគ្គលេខាធិការរងគណបក្ស នរោត្តម រណឫទ្ធិ និងជាអ្នកនាំពាក្យរបស់គណបក្សនេះបានមានប្រសាសន៍ថា ការចរចាកន្លងមកគឺមានតែរឿងការយាងត្រឡប់របស់ព្រះអង្គម្ចាស់ នរោត្តម រណឫទ្ធិ តែប៉ុណ្ណោះ។
លោក ស៊ុត ឌីណា បានឲ្យដឹងថា ៖ «កន្លងមកយើងអត់ទាន់មានការចរចារឿងរដ្ឋាភិបាលទេ ការចរចាមានត្រឹមតែហៅថា ការរកដំណោះស្រាយក្នុងការលើកលែងទោសនិងយាងព្រះអង្គបានចូលប្រទេសវិញ»។
ទោះជាយ៉ាងណាក៏ដោយ លោក ស៊ុត ឌីណា ក៏បានបញ្ជាក់ថា ការប្រកាសរបស់លោក ហ៊ុន សែន ស្តីពីមន្រ្តីខិលខូចនោះគឺជារឿងល្អសម្រាប់គណបក្សនេះ។
លោក ស៊ុត ឌីណា បានបញ្ជាក់ថា ៖ «យល់ថា ប្រសិនបើក្រុមហ្នឹងមានមែន គឺថានេះគឺជាសារមួយ ជាវិធានការមួយដែលល្អសម្រាប់គណបក្សរណឫទ្ធិ កុំឲ្យមានអ្នកធ្វើអ៊ីចឹងតទៅទៀត។ ប៉ុន្តែក្នុងក្របខ័ណ្ឌគណបក្ស យើងមិនទាន់មានការពិភាក្សាផ្លូវការណាមួយពីរឿងរៀបចំអ្នកនេះធ្វើអី អ្នកនោះធ្វើអី ឬចូលរដ្ឋាភិបាល គឺអត់ទាន់មានទេ»។
គួរបញ្ជាក់ថា ព្រះអង្គម្ចាស់ នរោត្តម រណឫទិ្ធ ដែលទើបនឹងយាងត្រឡប់ចូលមកប្រទេសវិញកាលពីចុងខែកញ្ញាកន្លងមក ក្រោយពេលដែលមានការត្រូវរ៉ូវគ្នាជាមួយនឹងលោកនាយករដ្ឋមន្រ្តី ហ៊ុន សែន ដោយសារតែគណបក្សរបស់ព្រះអង្គបានទទួលស្គាល់លទ្ធផលនៃការបោះឆ្នោតដែលបានទទួលជ័យជម្នះលើសលុបទៅខាងគណបក្សប្រជាជនកម្ពុជារបស់លោក ហ៊ុន សែន។
នៅពេលនេះរដ្ឋាភិបាលចម្រុះថ្មីអាណត្តិទី៤ មានសមាជិកជាង២០០នាក់ ដែលគណៈរដ្ឋមន្រ្តីនេះបានកាន់កាប់ស្ទើរតែទាំងស្រុងដោយសមាជិកនៃគណបក្សប្រជាជនកម្ពុជា និងមានការចូលរួមតិចតួចពីគណបក្សហ៊្វុនស៊ិនប៉ិច ត្រូវបានអ្នកប្រឆាំងរិះគន់ថា ជាគណៈរដ្ឋមន្ត្រីធំជាងគេនៅលើពិភពលោក ដែលអាចនឹងមានផលប៉ះពាល់ដល់ការចំណាយថវិកាជាតិ ហើយនឹងអាចមានការកើនឡើងនៃអំពើពុករលួយផងដែរ៕