នាយករដ្ឋមន្ត្រីស្នើសុំឲ្យមានសន្តិសុខក្នុងអំឡុងពេលបោះឆ្នោត

ដោយ ជា មករា

2008-05-17

លោកនាយករដ្ឋមន្ត្រី ហ៊ុន សែន នៅថ្ងៃសុក្រនេះ បានផ្ដល់អនុសាសន៍ដល់ក្រសួងមហាផ្ទៃ និងនគរបាលជាតិ ឲ្យធានាឲ្យបាននូវសន្តិសុខ និងគ្មានការគំរាមកំហែងក្នុងអំឡុងពេលបោះឆ្នោត ។

AFP Photo

លោកនាយករដ្ឋមន្ត្រីខ្មែរ ហ៊ុន សែន ចូលរួមការបោះឆ្នោតឃុំសង្កាត់កាលពីថ្ងៃទី១ មេសា ២០០៧ ។

លោកនាយករដ្ឋមន្ត្រីបានផ្ដល់អនុសាសន៍ដូច្នេះ ក្នុងឱកាសសម្ពោធអគារថ្មីនៃអគ្គបញ្ជាការដ្ឋាននគរបាលជាតិ និងទិវាខួបលើកទី៦៣ នៃកំណើតរបស់នគរបាលជាតិ ។

អនុសាសន៍របស់លោកនាយករដ្ឋមន្ត្រីគឺបានធ្វើឡើង ក្នុងខណៈដែលប្រទេសកម្ពុជាកំពុងរៀបចំការបោះឆ្នោតជ្រើសរើសតំណាងរាស្ត្រអាណត្តិទី៤ ដែលនឹងប្រព្រឹត្តទៅនៅខែកក្កដាខាងមុខនេះ ។

លោកនាយករដ្ឋមន្ត្រី បានមានប្រសាសន៍ថា ៖ «របៀបរៀបរយសង្គមឲ្យកាន់តែល្អថែមទៀតដើម្បីបង្កឲ្យមានបរិយាកាស សន្តិសុខស្ងប់ស្ងៀម គ្មានការបំភិតបំភ័យ ការគំរាមកំហែង ដើម្បីផ្ដល់ភាពអនុគ្រោះដល់ការអភិវឌ្ឍសេដ្ឋកិច្ចសង្គម និងបរិយាកាសល្អប្រសើរ ដល់ការបោះឆ្នោតជ្រើសតាំងរដ្ឋសភា នីតិកាលទី៤ ឲ្យប្រព្រឹត្តទៅប្រកបដោយលក្ខណៈសេរី ត្រឹមត្រូវ យុត្តិធម៌ និងមានសុវត្ថិភាព» ។

ទន្ទឹមគ្នានេះដែរ អគ្គបញ្ជាការនគរបាលជាតិ លោក ហុក ឡង់ឌី បានលើកឡើងថា នគរបាលជាតិនឹងធានានូវភាពស្ងប់ស្ងាត់ សុវត្ថិភាព និងគ្មានការគំរាមកំហែងក្នុងអំឡុងពេលនៃការបោះឆ្នោតនាពេលខាងមុខនោះ ។

អនុប្រធានគណបក្សសិទ្ធិមនុស្ស លោក កែវ រ៉េមី បានស្វាគមន៍ចំពោះអនុសាសន៍របស់លោកនាយករដ្ឋមន្ត្រី ហ៊ុន សែន ។ ប៉ុន្តែទោះជាយ៉ាងណា លោកបានមានប្រសាសន៍ផងដែរថាបើទោះបីជាមានការលើកឡើងដូច្នោះក៏ដោយ ការគំរាមកំហែងចំពោះសកម្មជនគណបក្សនយោបាយគឺនៅតែកើតមានឡើង ។

លោក កែវ រ៉េមី បានឲ្យដឹងថា ៖ «ក៏ប៉ុន្តែយើងចោទសួរទៅវិញថា ចុះបើសិនជានៅតែមានបុគ្គលមកគំរាមកំហែង បំភិតបំភ័យ ហើយបំពានទៅលើការណែនាំ បំពានទៅលើច្បាប់ទម្លាប់នេះ ថាតើមានវិធានការអីចំពោះមន្រ្តីនៅមូលដ្ឋានហ្នឹង?» ។

អគ្គលេខាធិការគណបក្សខ្មែរសាធារណរដ្ឋ លោក រស យឿន ក៏បានស្វាគមន៍ដល់អនុសាសន៍របស់នាយករដ្ឋមន្ត្រីផងដែរ ៖ «យើងខ្ញុំថា បើសុវត្ថិភាពល្អ ការប្រព្រឹត្តទៅនូវការបោះឆ្នោត ក៏ប្រព្រឹត្តទៅដោយល្អ និងមានប្រជាធិបតេយ្យ សេរីភាពបរិបូរណ៍ចំពោះពលរដ្ឋយើង ប្រជាជនយើងទាំងអស់គ្នា» ។

នាយកប្រតិបត្តិអង្គការនិកហ្វិច លោកបណ្ឌិត ហង្ស ពុទ្ធា បានមានប្រសាសន៍ថា សេចក្ដីលើកឡើងរបស់នាយករដ្ឋមន្ត្រី គឺជាការពញ្ញាក់ស្មារតីដល់អាជ្ញាធរដែលពាក់ព័ន្ធនឹងការបោះឆ្នោត ឲ្យប្រតិបត្តិតួនាទីរបស់ខ្លួនឲ្យបានត្រឹមត្រូវ ។

លោកបណ្ឌិត ហង្ស ពុទ្ធា ក៏បានបន្ថែមទៀតថា តាមការសង្កេតរបស់លោកស្ថានភាពនៃការបោះឆ្នោតក្នុងអាណត្តិទី៤នេះ គឺមានលក្ខណៈប្រសើរជាងការបោះឆ្នោតនាអាណត្តិមុនៗ ។ ទោះជាយ៉ាងណាលោកក៏បានមានប្រសាសន៍ផងដែរថា ក្នុងការបោះឆ្នោតនាអាណត្តិនេះ អាចនឹងមានគណបក្សទិញទឹកចិត្តអ្នកបោះឆ្នោត ដែលគណបក្សនោះយល់ថា មិនបានគាំទ្រខ្លួនដើម្បីកុំឲ្យទៅបោះឆ្នោត ។

លោកបណ្ឌិត ហង្ស ពុទ្ធា បានឲ្យដឹងថា ៖ «ទិញទឹកចិត្តអ្នកបោះឆ្នោតមិនឲ្យទៅបោះឆ្នោត ។ ឧទាហរណ៍ដឹងថាអ្នកហ្នុងឯងមិនបោះឆ្នោតឲ្យគណបក្សខ្លួន ខ្លួនប្រើវិធីទិញកុំឲ្យអ្នកឯងទៅបោះឆ្នោត បានន័យថាក្រោមម៉ោង ៣ បង្ហាញថា ដៃរបស់ខ្លួនអត់មានជ្រលក់ទឹកថ្នាំទេ គេនឹងឲ្យលុយ តែបោះមិនបោះឆ្នោតឲ្យគណបក្សខ្លួនទេ ។ អ៊ីចឹងជាវិធីសាស្រ្តថ្មី១ ដែលអាចនឹងកើតមានឡើង» ។

គួរជម្រាបថា លោកនាយករដ្ឋមន្ត្រីបានផ្ដល់អនុសាសន៍ជាញឹកញាប់ ស្នើឲ្យការបោះឆ្នោតមានតម្លាភាព ភាពត្រឹមត្រូវ និងយុត្តិធម៌ និងគ្មានការគំរាមកំហែង ក៏ប៉ុន្តែការគំរាមកំហែងចេះតែកើតមានឡើងជាហូរហែក្នុងអំឡុងពេលបោះឆ្នោតម្ដងៗ ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព