លោក អ៊ិត ប្រាង រដ្ឋលេខាធិការក្រសួងឧស្សាហកម្ម រ៉ែ និងឋាមពល មានប្រសាសន៍ប្រាប់វិទ្យុអាស៊ីសេរីនៅថ្ងៃពុធនេះបន្ថែមយ៉ាងដូច្នេះថា ៖ «កន្លែងណាដែលមានបណ្ដាញតទៅហ្នឹងវាលែងខ្វះហើយ ។ មែនទែនចាប់ពីឆ្នាំ២០០៩ ដែលមានការតភ្ជាប់ជាមួយវៀតណាមហើយហ្នឹង ភ្នំពេញយើងលែងខ្វះហើយ លែងខ្វះហើយពីព្រោះវៀតណាមអាចបញ្ជូនឲ្យយើង២០០មេហ្គាវ៉ាត់ ។ អាហ្នឹងថ្លៃវាអាចចុះមកនៅខ្ទង់ប្រហែល១២សេន (ដុល្លារ) គិតទៅវា៤៨០ ខ្ទង់៥០០រៀលអីហ្នឹង ថ្លៃវាចុះមកដល់ប៉ុណ្ណឹងនៅលើបណ្ដាញ ហើយអាហ្នឹងវាត្រូវបូកបន្ថែមនូវបណ្ដាញចែកចាយទៀតទៅ ថែម១សេន ឬក៏២សេនទៀតទៅតាមកន្លែង តាមតំបន់ជិតឆ្ងាយ ជាក់ស្ដែងទៅតាមទីតាំងកន្លែងនីមួយៗ» ។
លោក អ៊ិត ប្រាង មានប្រសាសន៍បន្តថាកម្ពុជាអាចនឹងមានអគ្គិសនីគ្រប់គ្រាន់នៅទូទាំងប្រទេសចាប់ពីឆ្នាំ២០១៧ ។ បច្ចុប្បន្ននេះកម្ពុជាកំពុងតែបន្តរៀបចំបណ្តាញភ្ជាប់ចរន្តពីប្រទេសវៀតណាម សម្រាប់ផ្គត់ផ្គង់អគ្គិសនីដល់ពលរដ្ឋខ្មែរនៅប៉ែកខាងត្បូងប្រទេស និងភាគខាងកើតប្រទេសកម្ពុជា គឺភ្ជាប់ចរន្តអគ្គិសនីពីប្រទេសលាវ ។
ចំណែកខាងប៉ែកពាយ័ព្យនៃប្រទេសកម្ពុជាគឺបញ្ជូនចរន្តផ្គត់ផ្គង់ពីទីក្រុងភ្នំពេញ ហើយនិងរៀបចំកសាងរោងចក្រអគ្គិសនីនៅខេត្តកោះកុង ដើម្បីបន្ថែមការផ្គត់ផ្គង់ចរន្តអគ្គិសនីដល់ពលរដ្ឋនៅទីនោះ ។
ទោះបីជាយ៉ាងណាក៏ដោយបច្ចុប្បន្ននេះតម្លៃអគ្គិសនីនៅតំបន់ខ្លះនៃប្រទេសកម្ពុជា គឺមានតម្លៃរហូតដល់៤០០០រៀល ឬស្មើនឹងមួយដុល្លារក្នុងមួយគីឡូវ៉ាត់ម៉ោង ៕