ភ្នំពេញ និង​បាងកក ចង​សម្ព័ន្ធ​មេត្រីភាព​ពង្រឹង​ទំនាក់​ទំនង​ល្អ

អភិបាល​ក្រុង​ភ្នំពេញ លោក កែប ជុតិមា និង​អភិបាល​ក្រុង​បាងកក នៃ​ប្រទេស​ថៃ លោក សុខុមផាន ផារីផាត់ត្រា (Sukhum Bhand Parisbatra) នៅ​ថ្ងៃ​ទី៤ ខែ​មករា ឆ្នាំ​២០១៣ បាន​ចុះ​ហត្ថលេខា​ទ្វេ​ភាគី​លើ​កិច្ច​ព្រមព្រៀង​លើក​ដំបូង ដើម្បី​ចង​សម្ព័ន្ធ​មេត្រីភាព​រវាង​ទីក្រុង​នៃ​ប្រទេស​ទាំង​ពីរ។
ដោយ សុខ សេរី
2013-01-04
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
កែប ជុតិមា សុខុមផាន ផារីផាត់ត្រា [Sukhum Bhand Parisbatra] ៣០៥
អភិបាល​ក្រុង​ភ្នំពេញ លោក កែប ជុតិមា (ស្តាំ) និង​អភិបាល​ក្រុង​បាងកក ប្រទេស​ថៃ លោក សុខុមផាន ផារីផាត់ត្រា [Sukhum Bhand Parisbatra] (ឆ្វេង) ចុះ​ហត្ថលេខា​លើ​កិច្ច​ព្រមព្រៀង​សម្ព័ន្ធ​មេត្រីភាព នៅ​សាលា​ក្រុង​ភ្នំពេញ កាល​ពី​ថ្ងៃ​ទី៤ ខែ​មករា ឆ្នាំ​២០១៣។
RFA/Sok Serey

ការ​ចង​សម្ព័ន្ធ​គ្នា​នេះ ដើម្បី​សិក្សា​រៀន​សូត្រ​អំពី​បទ​ពិសោធន៍​ផ្សេងៗ​ពី​គ្នា​ទៅ​វិញ​ទៅ​មក ជាពិសេស​ពាក់ព័ន្ធ​នឹង​ការ​អភិវឌ្ឍ​ទីក្រុង។

អភិបាល​ក្រុង​ភ្នំពេញ លោក កែប ជុតិមា និង​អភិបាល​ក្រុង​បាងកក លោក សុខុមផាន ផារីផាត់ត្រា បាន​អះអាង​ដូចៗ​គ្នា​ថា កិច្ច​ព្រម​ព្រៀង​នេះ​គឺ​ជា​ឯកសារ​គោល​រឹងមាំ​មួយ ដើម្បី​ពង្រឹង​ទំនាក់​ទំនង​ល្អ​រវាង​ទីក្រុង​នៃ​ប្រទេស​ទាំង​ពីរ និង​ទំនាក់​ទំនង​នៃ​ប្រទេស​ទាំង​ពីរ។

កិច្ច​ព្រមព្រៀង​នេះ បាន​ធ្វើ​ឡើង​នៅ​គ្រា​ដែល​រដ្ឋាភិបាល​ថ្មី​របស់​ថៃ ដឹកនាំ​ដោយ​អ្នកស្រី យ៉ីងឡាក់ ស៊ីណាវ៉ាត់ (Yingluck Sihawatra) កំពុង​តែ​មាន​ទំនាក់​ទំនង​ល្អ​ជាមួយ​រដ្ឋាភិបាល​កម្ពុជា ដឹកនាំ​ដោយ​លោក​នាយក​រដ្ឋមន្ត្រី ហ៊ុន សែន។

អ្នកស្រី យ៉ីងឡាក់ ស៊ីណាវ៉ាត់ គឺ​ជា​ប្អូន​ស្រី​របស់​អតីត​នាយក​រដ្ឋមន្ត្រី​ថៃ លោក ថាក់ស៊ីន ស៊ីណាវ៉ាត់ (Thaksin Shinawatra) ដែល​ជា​មិត្តភក្ដិ​ជិតស្និទ្ធ​ជាមួយ​លោក ហ៊ុន សែន។

អភិបាល​ក្រុង​ភ្នំពេញ លោក កែប ជុតិមា បាន​មាន​ប្រសាសន៍​ប្រាប់​អ្នក​កាសែត​ថា យើង​រៀន​សូត្រ​ពី​គ្នា​ទៅ​វិញ​ទៅ​មក​ក្នុង​ការ​រៀបចំ​ទីក្រុង​នៅ​ថ្ងៃ​អនាគត៖ «សាលា​រាជធានី​ភ្នំពេញ​មាន​ផែនការ​រួច​ហើយ​ថា​នឹង​សិក្សា​រៀន​សូត្រ​ពី​បាងកក អំពី​ការ​រីក​ចម្រើន​លូត​លាស់​របស់​បាងកក ហើយ​និង​ការ​ប្រឈម​ដូច​ដែល​យើង​ដឹង​ទាំង​អស់​គ្នា​ថា បញ្ហា​ទឹក​ជំនន់ បញ្ហា​ចរាចរណ៍ និង​បញ្ហា​ផ្ទះ​សម្បែង ដែល​យើង​ត្រូវ​រៀន​សូត្រ​ពី​ក្រុង​បាងកក សម្រាប់​អនាគត​ទីក្រុង​យើង។ ទី២ យើង​នឹង​បង្ក​លក្ខណៈ​ឲ្យ​អ្នក​វិនិយោគទុន​ថៃ មក​វិនិយោគ​នៅ​កម្ពុជា ដែល​មាន​ទីស្នាក់ការ​នៅ​ក្នុង​ទីក្រុង​ភ្នំពេញ ហើយ​យើង​សម្រប​សម្រួល​ជាមួយ​ទីក្រុង​បាងកក ដើម្បី​ការពារ​ផល​ប្រយោជន៍​ប្រជាពលរដ្ឋ​កម្ពុជា ដែល​គាត់​ធ្វើ​ការងារ​នៅ​ទីក្រុង​បាងកក»

ចំណែក​ឯ​អភិបាល​ក្រុង​បាងកក លោក សុខុមផាន ផារីផាត់ត្រា បាន​មាន​ប្រសាសន៍​ថា ចំណង​ទាក់​ទង​គ្នា​ល្អ​មិន​មែន​កើត​មាន​នៅ​ក្នុង​អាណត្តិ​ដឹកនាំ​ដោយ​អ្នកស្រី យ៉ីងឡាក់ ស៊ីណាវ៉ាត់ នេះ​ទេ រដ្ឋាភិបាល​ថៃ ក្រោយៗ​ទៀត​ក៏​នៅ​តែ​រក្សា​ទំនាក់​ទំនង​ល្អ​នេះ​ជា​ដដែល ទោះ​បី​ជា​គណបក្ស​ប្រជាធិបតេយ្យ​ផ្សេង​ពី​គណបក្ស​ភឺថៃ (Pheu Thai Party) ដឹកនាំ​រដ្ឋាភិបាល​ថៃ ក៏ដោយ៖ «ចំពោះ​ទីក្រុង​បាងកក មាន​ទន្លេ​តែ​មួយ​ទេ ប៉ុន្តែ​មាន​ប្រឡាយ​ច្រើន​ណាស់។ ប៉ុន្តែ​ការ​អនុវត្ត​តាម​ដង​ទន្លេ​នៅ​ក្នុង​ទីក្រុង​បាងកក គឺ​មាន​ការ​លំបាក។ ដូច្នេះ​ហើយ យើង​ដក​ស្រង់​បទ​ពិសោធន៍ តើ​គួរ​ធ្វើ​យ៉ាង​ណា​ក្នុង​ការ​អភិវឌ្ឍ​នៅ​តាម​ដង​ទន្លេ​នេះ​ឲ្យ​បាន​ល្អ​ប្រសើរ»

អ្នក​វិភាគ​ឯករាជ លោក​បណ្ឌិត សុខ ទូច ដែល​តែង​តែ​តាម​ដាន​ស្ថានការណ៍​នយោបាយ​រវាង​កម្ពុជា និង​ថៃ កន្លង​មក បាន​មាន​ប្រសាសន៍​ថា ថៃ តែង​តែ​ប្រើប្រាស់​នយោបាយ​ត្រជាក់​មក​លើ​កម្ពុជា ដើម្បី​ឲ្យ​អ្នក​នយោបាយ​ខ្មែរ​ទន់​ចិត្ត៖ «ថៃ អត់​ព្រម​ឈរ​ដោះស្រាយ ដែល​អ្វី​ដែល​គេ​ចង់​ទេ។ ថៃ បកស្រាយ​នូវ​អ្វី​ដែល​ជា​មិន​ជា​ចំណង ហើយ​មក​បង្កើត​ភាព​ល្អ​ជាមួយ​កម្ពុជា ដែល​ធ្វើ​កម្ពុជា​ត្រជាក់​ចិត្ត ពីព្រោះ​គេ​ដឹង​ហើយ​ថា​កម្ពុជា មាន​ជំងឺ​មួយ​គឺ​ជំងឺ​ឆាប់​ទន់​ចិត្ត ឆាប់​ភ្លេច​អតីតកាល ជា​បុព្វហេតុ​ហ្នឹង។ ហើយ​ចំណុច​ទី២ ចំណង​មិត្តភាព​អ្នក​នយោបាយ វា​អាច​កើត​មាន​រយៈពេល​មួយ ហើយ​បាត់​វិញ​នៅ​ពេល​ដែល​អ្នក​នយោបាយ​ប្រឈម​មុខ​គ្នា អាច​ងាយ​ស្រួល​បំផុត»

ដោយ​ឡែក ឯកអគ្គរាជទូត​ថៃ ថ្មី ប្រចាំ​នៅ​កម្ពុជា លោក ទូចឆៃយុទ្ធ ភក្ដី (Touchayoot Paki) ដែល​មក​ជួប​រដ្ឋមន្ត្រី​ក្រសួង​ការ​បរទេស​កម្ពុជា លោក ហោ ណាំហុង កាល​ពី​ថ្ងៃ​ទី២ ខែ​មករា ឆ្នាំ​២០១៣ កន្លង​ទៅ​នេះ​បាន​មាន​ប្រសាសន៍​សន្យា​ថា បេសកកម្ម​របស់​លោក គឺ​មក​ពង្រឹង​ចំណង​ទាក់​ទង​រវាង​កម្ពុជា និង​ថៃ ពីព្រោះ​ប្រទេស​ទាំង​ពីរ​ជា​ប្រទេស​ជិត​ខាង​គ្នា និង​មាន​វប្បធម៌ ព្រម​ទាំង​ការ​រស់​នៅ​ស្រដៀង​គ្នា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល