តុលាការខេត្តប៉ៃលិនបំភ្លឺរឿងក្ដីក្មេងស្រីរងគ្រោះដោយការចាប់រំលោភម្នាក់
ដោយ សួន សុផលមុន្នី
2012-02-24
ព្រះរាជអាជ្ញាតុលាការខេត្តប៉ៃលិន បានបំភ្លឺចំពោះករណីក្មេងស្រីរងគ្រោះដោយអំពើរំលោភសេពសន្ថវៈម្នាក់ ដែលត្រូវតុលាការកាត់ឲ្យចាញ់ក្ដី ហើយបង្គាប់ឲ្យបង់ប្រាក់ជាច្រើនលានរៀលទៅឲ្យគ្រួសារជនជាប់សង្ស័យថែមទៀត។
តុលាការខេត្តប៉ៃលិនបានបំភ្លឺថា ពួកគេពុំមានចេតនាផ្អឹបសំណុំរឿងបទឧក្រិដ្ឋរបស់ជនរងគ្រោះក្នុងករណីចាប់រំលោភសេពសន្ថវៈ ហើយលើកយកសំណុំរឿងបរិហារកេរ្តិ៍របស់ភាគីជនជាប់សង្ស័យមកជំនុំជម្រះក្ដីនោះទេ ប៉ុន្តែមានបញ្ហាយឺតយ៉ាវ ដោយសារតែមន្ត្រីនគរបាលយុត្តិធម៌បញ្ជូនសំណុំរឿងករណីចាប់រំលោភនោះទៅតុលាការនៅក្រោយការទទួលបណ្ដឹងបរិហារកេរ្តិ៍របស់ជនសង្ស័យ។
លោក ជុំ សែនសទ្ធា ព្រះរាជអាជ្ញាតុលាការខេត្តប៉ៃលិន បានថ្លែងនៅថ្ងៃទី២៣ ខែកុម្ភៈ ថា កាលពីថ្ងៃទី១៧ ខែកុម្ភៈ ឆ្នាំ២០១២ តុលាការបានចាប់ខ្លួនជនសង្ស័យក្នុងករណីចាប់រំលោភក្មេងស្រីអាយុ ៨ឆ្នាំ និងចោទប្រកាន់ជាផ្លូវការបញ្ជូនទៅឃុំខ្លួននៅក្នុងពន្ធនាគារខេត្តប៉ៃលិន។
តុលាការខេត្តប៉ៃលិន កាលពីថ្ងៃទី១ ខែកុម្ភៈ ឆ្នាំ២០១២ បានបើកសវនាការលើបណ្ដឹងបរិហារកេរ្តិ៍របស់ដើមបណ្ដឹងដែលជាជនជាប់សង្ស័យក្នុងករណីចាប់រំលោភក្មេងស្រីអាយុ ៨ឆ្នាំ នៅខេត្តប៉ៃលិន។ ក្រោយមកនៅថ្ងៃទី១៤ ខែកុម្ភៈ ឆ្នាំ២០១២ ចៅក្រមជំនុំជម្រះបានប្រកាសសាលក្រមកាត់សេចក្តីឲ្យគ្រួសារក្មេងស្រីរងគ្រោះចាញ់ក្តី។
ឪពុកម្ដាយក្មេងស្រីរងគ្រោះថ្មីៗនេះ ស្វះស្វែងរកកិច្ចអន្តរាគមន៍ពីអង្គការក្រៅរដ្ឋាភិបាលជួយខាងផ្លូវច្បាប់ ដើម្បីដាក់ពាក្យបណ្ដឹងប្ដឹងឧទ្ធរណ៍ជំទាស់ទៅសាលក្រមតុលាការខេត្តប៉ៃលិន ដែលបានកាត់ក្តីឲ្យមានទោសពីបទបរិហារកេរ្តិ៍ និងបង្គាប់ឲ្យបង់ប្រាក់ជាច្រើនលានរៀលទៅឲ្យភាគីដើមបណ្តឹង ដែលជាជនសង្ស័យក្នុងការចាប់រំលោភកូនស្រីរបស់គាត់។
ម្ដាយក្មេងស្រីរងគ្រោះថ្លែងថា តុលាការខេត្តប៉ៃលិន ពុំបានលើកយកពាក្យបណ្ដឹងព្រហ្មទណ្ឌកូនស្រីរបស់គាត់ដែលរងគ្រោះដោយអំពើចាប់រំលោភទៅចាត់ការតាមគោលការណ៍ច្បាប់ទេ ប៉ុន្តែតុលាការបែរជាលើកយកពាក្យបណ្ដឹងបរិហារកេរ្តិ៍របស់ជាប់ជនសង្ស័យ ដែលបានចាប់រំលោភកូនស្រីគាត់ចាត់ការទៅវិញ។
លោក ជុំ សែនសទ្ធា ព្រះរាជអាជ្ញាតុលាការខេត្តប៉ៃលិន បញ្ជាក់ថា តុលាការបានចាត់ការតាមនីតិវិធីរបស់ខ្លួន។ លោកថា ភាគីជនសង្ស័យក្នុងករណីចាប់រំលោភបានដាក់បណ្ដឹងប្ដឹងគ្រួសារជនរងគ្រោះពីបទបរិហារកេរ្តិ៍ទៅកាន់ព្រះរាជអាជ្ញាតុលាការខេត្តប៉ៃលិន តាំងពីថ្ងៃទី២៤ តុលា ឆ្នាំ២០១១ ប៉ុន្តែប៉ូលិសបានបញ្ជូនសំណុំរឿងចាប់រំលោភរបស់ជនរងគ្រោះនៅដើមខែមករា ឆ្នាំ២០១២។
ប៉ុន្តែម្ដាយក្មេងស្រីជនរងគ្រោះបានបញ្ជាក់ថា កាលពីខែសីហា ឆ្នាំ២០១១ កូនស្រីគាត់អាយុ ៨ឆ្នាំ ត្រូវបានជនសង្ស័យឈ្មោះ រ៉ា អាយុ ២៣ឆ្នាំ ចាប់រំលោភនៅបរិវេណខាងក្រោយផ្ទះ ស្ថិតនៅភូមិឃុំជាមួយគ្នា ហើយលោកស្រីបានទៅប្ដឹងអាជ្ញាធរភូមិ និងក្រុមប្រឹក្សាឃុំសង្កាត់ ប៉ុន្តែខាងអាជ្ញាធរមិនបានជួយគ្រួសារលោកស្រីទេ។ លុះក្រោយមកដំណឹងនេះបានលេចឮដល់គ្រួសារជនសង្ស័យ ធ្វើពាក្យបណ្ដឹងចោទប្រកាន់លោកស្រីពីបទបរិហារកេរ្តិ៍ដាក់ទៅតុលាការខេត្តប៉ៃលិន។ លោកស្រីថា ក្រោយមកនៅថ្ងៃទី២១ ខែវិច្ឆិកា ឆ្នាំ២០១១ លោកស្រីបានធ្វើពាក្យបណ្ដឹងករណីចាប់រំលោភកូនស្រីគាត់នេះទៅប៉ូលិសខេត្តប៉ៃលិន។
វិទ្យុអាស៊ីសេរី នៅពុំទាន់អាចសុំការបញ្ជាក់ពីមន្ត្រីប៉ូលិសខេត្តប៉ៃលិន ពីភាពយឺតយ៉ាវក្នុងការបញ្ជូនសំណុំរឿងករណីចាប់រំលោភនេះទៅតុលាការទេ។
លិខិតបញ្ជាក់របស់មន្ទីរពេទ្យបង្អែកខេត្តប៉ៃលិន ចុះកាលបរិច្ឆេទកាលពីថ្ងៃទី២១ ខែវិច្ឆិកា ឆ្នាំ២០១១ បានបញ្ជាក់ថា ក្មេងស្រីអាយុ ៨ឆ្នាំនោះពិតជាបានរងគ្រោះដោយការចាប់រំលោភពិតប្រាកដមែន។
លោក គង់ មីឌី ប្រធានសម្របសម្រួលនៃសមាគមអាដហុក ប្រចាំខេត្តប៉ៃលិន បានថ្លែងថា តុលាការបានចាត់ការលើសំណុំរឿងចាប់រំលោភនេះ ហើយបានចោទប្រកាន់ជាផ្លូវការទៅលើជនសង្ស័យ។ លោកសង្ឃឹមថា តុលាការនឹងផ្ដល់យុត្តិធម៌ជូនគ្រួសារជនរងគ្រោះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។
អត្ថបទដែលទាក់ទង
ប៉ូលិសចាប់ព្រះសង្ឃ លួន សុវ៉ាត នៅមុខតុលាការភ្នំពេញ
សាក្សី១រូបចូលបំភ្លឺតុលាការក្នុងសំណុំរឿងឃាតកម្មលោក ឈុត វុទ្ធី
លោក ស៊ូប៊ែឌី៖ រដ្ឋាភិបាលនៅប្រើកម្លាំងប្រដាប់អាវុធប្រឆាំងសកម្មជនសិទ្ធិមនុស្ស
លោក ស៊ូប៊ែឌី នឹងតស៊ូមតិក្នុងជម្លោះដីធ្លីជាមួយរដ្ឋាភិបាលកម្ពុជា
លោក សុរិយា ស៊ូប៊ែឌី ផ្ដោតលើបញ្ហាសម្បទានដីនៅស្ទឹងត្រែង
តុលាការគ្រោងហៅអ្នកកាសែត២នាក់ឲ្យឆ្លើយបំភ្លឺសំណុំរឿងលោក ឈុត វុទ្ធី
អ្នករងគ្រោះរឿងដីធ្លីគ្រោងដាក់របាយការណ៍ទៅអ្នករាយការណ៍ពិសេស អ.ស.ប
លោក សុរិយា ស៊ូប៊ែឌី ទៅស្ដាប់បញ្ហាសិទ្ធិមនុស្សផ្ទាល់នៅខេត្តរតនគិរី
ចម្ការស្វាយចន្ទីអ្នកភូមិ នៅខេត្តរតនគិរី ត្រូវគេលួចដុត
តុលាការខេត្តកោះកុងសម្រេចឃុំខ្លួនជំនួយការផ្ទាល់លោក ហ៊ុន សែន
មតិ
Click here to add your own comment