ម្សៅហេរ៉ូអ៊ីន ត្រូវបានអាជ្ញាធរមានសមត្ថកិច្ចបង្ក្រាបគ្រឿងញៀន ឆែកឃើញនៅក្នុងផ្ទះជនសង្ស័យ នៅរាជធានីភ្នំពេញ។
អាជ្ញាធរមានសមត្ថកិច្ចបង្ក្រាបគ្រឿងញៀន រឹបអូសគ្រឿងញៀនប្រភេទម្សៅហេរ៉ូអ៊ីន ចំនួន ៥ប្រអប់ ស្មើនឹងជិត ២គីឡូក្រាម ពីផ្ទះល្វែងប្រណីតលេខ២៦ ផ្លូវលេខ៣៨៤ ក្នុងសង្កាត់ទួលស្វាយព្រៃ រាជធានីភ្នំពេញ។
ចៅសង្កាត់ទួលស្វាយព្រៃ លោក លី ពូ មានប្រសាសន៍បញ្ជាក់ថា ម្ចាស់ផ្ទះដែលអាជ្ញាធររឹបអូសបានគ្រឿងញៀននោះ មានឈ្មោះ កែវ សារឿន អាយុ ៥២ឆ្នាំ ជាខ្មែរ-វៀតណាម ត្រូវរបួសជើងស្ដាំដោយសារគ្រាប់កាំភ្លើង បន្ទាប់ពីបាញ់តគ្នាជាមួយក្រុមសមត្ថកិច្ច នៅវេលាក្រោយពេលបាយថ្ងៃត្រង់។ សមត្ថកិច្ចឃាត់ខ្លួនមនុស្សចំនួន ៦នាក់នៅក្នុងផ្ទះនោះ៖ «យើងឃាត់ខ្លួននៅនឹងផ្ទះនេះ មានគាត់ហ្នឹងមួយ ប្ដីប្រពន្ធ ហើយនឹងកូន ២នាក់។ កូនតូចមួយ ហើយនឹងមួយជំទង់ប្រហែលជា ១៨-២០ (ឆ្នាំ) អីហ្នឹង។ បួននាក់។ មួយទៀតគេយកពីក្រៅមកទេ»។
មានជនជាតិវៀតណាម ម្នាក់ទៀត ត្រូវសមត្ថកិច្ចបង្ក្រាបគ្រឿងញៀន ចាប់បានបន្ទាប់ការឆែកឆេរនៅទីតាំងពាក់ព័ន្ធនៅតំបន់ផ្សេងទៀត។
លោកចៅសង្កាត់ទួលស្វាយព្រៃ និងអាជ្ញាធរមានសមត្ថកិច្ច ឱ្យដឹងថា ម្ចាស់ផ្ទះឈ្មោះ កែវ សារឿន ជាទាហានជើងគោកសក្ដិ៥។ ក៏ប៉ុន្តែ គេនៅមិនទាន់បញ្ជាក់ថានៅអង្គភាពណាមួយទេ។
មន្ត្រីដែលមិនបញ្ចេញឈ្មោះ ឱ្យដឹងជាបឋមនៅកន្លែងបង្ក្រាបនោះថា ក្រៅពីម្សៅហេរ៉ូអ៊ីន ជិត ២គីឡូក្រាម នៅមានអាវុធខ្លីចំនួន ២ដើម ម្សៅគីមីផ្សំ និងពុម្ពផលិតផង។
ក្រៅពីការបង្ក្រាបនៅផ្ទះលេខ២៦ ក្នុងសង្កាត់ទួលស្វាយព្រៃ អាជ្ញាធរបន្តឆែកឆេរនៅទីតាំងផ្សេង ៣កន្លែងទៀត គឺនៅម្ដុំសំណង់១២ ស្ទឹងមានជ័យ និងព្រែកប្រា។
ចៅសង្កាត់ទួលស្វាយព្រៃ លោក លី ពូ និងប្រធានមន្ទីរប្រឆាំងគ្រឿងញៀននៃក្រសួងមហាផ្ទៃ លោក ខៀវ សាម៉ន មានប្រសាសន៍ថា អាជ្ញាធរមានសមត្ថកិច្ចបង្ក្រាបគ្រឿងញៀន បានតាមដានសកម្មភាពរបស់ជនសង្ស័យទាំងយប់ទាំងថ្ងៃជាច្រើនខែមកហើយ។ ជនសង្ស័យ កែវ សារឿន ជាដំបូងត្រូវបានគេសង្ស័យថាពាក់ព័ន្ធនឹងការជួញដូរឈើប្រណីត។ ក៏ប៉ុន្តែនៅពេលនេះទើបដឹងថា ជនសង្ស័យពាក់ព័ន្ធនឹងគ្រឿងញៀន៖ «គាត់មកនៅទីនេះបានពីរឆ្នាំជាង។ បន្ទាប់ពីបានមួយឆ្នាំ ឃើញជួសជុលផ្ទះ។ យើងខ្ញុំជាមួយមេប៉ុស្តិ៍ដាក់ការសង្ស័យ។ ទីមួយសង្ស័យថា អាចរកស៊ីឈើ។ ឃើញក្នុងផ្ទះហ្នឹងបំពាក់គ្រឿងឈើប្រណីតៗ ល្អណាស់។ សង្ស័យឈើទេ ប៉ុន្តែឥឡូវចេញរឿងហ្នឹងវិញ»។
រហូតមកដល់ព្រលប់ថ្ងៃទី២៧ ធ្នូ មន្ត្រីប្រឆាំងគ្រឿងញៀន រួមនឹងមន្ត្រីតុលាការ នៅមិនទាន់អាចបញ្ជាក់ព័ត៌មានលម្អិតបន្ថែមទៀតបានទេ ពីព្រោះករណីនេះស្ថិតនៅក្រោមការឆែកឆេរបន្ថែមនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។