តំណាងក្រុមប្រឹក្សាឃ្លាំមើលកម្ពុជា ដឹកនាំដោយលោក រ៉ុង ឈុន មានប្រសាសន៍ឲ្យវិទ្យុអាស៊ីសេរីដឹងថា នៅខែវិច្ឆិកា ឆ្នាំ២០១០នេះ លោកគ្រោងទៅពិនិត្យមើលការបោះតម្រុយបង្គោលព្រំដែនលេខ១០៩ រវាងប្រទេសកម្ពុជា-វៀតណាម ស្ថិតនៅឃុំដា ស្រុកមេមត់ ខេត្តកំពង់ចាម។
លោក រ៉ុង ឈុន ដែលជាប្រធានសមាគមគ្រូបង្រៀនផងនោះ បានឲ្យដឹងថា គោលបំណងនៃការចុះពិនិត្យនៅតាមព្រំដែន គឺគ្រាន់តែចង់ដឹងថា រាជរដ្ឋាភិបាលកម្ពុជា និងប្រទេសវៀតណាម បានបោះបង្គោលព្រំដែនអនុវត្តត្រឹមត្រូវដែរ ឬយ៉ាងណា? ប៉ុន្តែមិនមែនមានន័យថា ធ្វើឲ្យរាំងស្ទះដល់ការងារបោះតម្រុយបង្គោលព្រំដែនរវាងប្រទេសទាំងពីរនោះទេ។
លោក រ៉ុង ឈុន មានប្រសាសន៍ថា ៖ «បើយើងរកឃើញថា មានការបោះចូលមកលើទឹកដីកម្ពុជា ពិតប្រាកដមែន យើងលើកបញ្ហាហ្នឹងដាក់ជូនរាជរដ្ឋាភិបាល និងគណៈកម្មការព្រំដែនកម្ពុជា ឲ្យពិចារណា ហើយនិងសុំឲ្យផ្អាកនូវការបោះបង្គោលហ្នឹង ចាំសិក្សាធ្វើការកែតម្រូវឲ្យបានត្រឹមត្រូវចាំបោះបន្តទៀត»។
លោកបន្ថែមថា គម្រោងចុះពិនិត្យព្រំដែននៅឃុំដា ស្រុកមេមត់ ខេត្តកំពង់ចាម ពេលនេះ ធ្វើឡើងនៅគ្រាមានពលរដ្ឋខ្មែរជាច្រើនរយគ្រួសាររស់នៅតំបន់នោះ បានសម្ដែងកង្វល់ពីការបារម្ភខ្លាចបាត់បង់ដីធ្លីបណ្ដាលមកពីការបោះតម្រុយបង្គោលព្រំដែនកម្ពុជា-វៀតណាម នៅតំបន់នោះ។
កសិករមិនបង្ហាញអត្តសញ្ញាណម្នាក់រស់នៅឃុំដា ស្រុកមេមត់ មានប្រសាសន៍ឲ្យវិទ្យុអាស៊ីសេរីដឹង នៅថ្ងៃទី១១ ខែវិច្ឆិកាថា ការបោះតម្រុយបង្គោលព្រំដែនរវាងប្រទេសកម្ពុជា និងវៀតណាម កាលពីថ្ងៃទី២៧ ខែតុលា ថ្មីៗនេះ ពិតជាបានប៉ះពាល់ដល់ដីចម្ការពលរដ្ឋធ្លាប់រស់អាស្រ័យផលតាំងពីដូនតារៀងមកពិតមែន។
ពលរដ្ឋមិនបញ្ចេញឈ្មោះមានប្រសាសន៍ដូច្នេះ ៖ «បាត់បង់ដីប្រជាពលរដ្ឋធ្លាប់ធ្វើហ្នឹងខ្ញុំនិយាយទៅក្រែងលោខ្ញុំចេះតែនិយាយបំផ្លើសអី សូមបងមកមើលផ្ទាល់មក ដល់គេឲ្យមើលហើយ គឺបោះចូលមកក្នុងចម្ការស្វាយប្រជាពលរដ្ឋតែម្ដង»។
សមាជិកក្រុមប្រឹក្សាឃុំដា លោក ឃី ប៊ុនហាក់ មានប្រសាសន៍ថា ការងារបោះតម្រុយកំណត់ព្រំដែនរវាងកម្ពុជា-វៀតណាម គឺមិនមែនជាសមត្ថកិច្ចរបស់ក្រុមប្រឹក្សាឃុំដា ត្រូវរកដំណោះស្រាយនោះទេ។ ប៉ុន្តែលោកបានទទួលស្គាល់ថា ការបោះតម្រុយបង្គោលព្រំដែននៅមូលដ្ឋានរបស់លោក ក្រុមការងារបោះបង្គោលព្រំដែនប្រទេសទាំងពីរដែលបានបោះ កាលពីថ្ងៃទី២៧ ខែតុលា ពិតជាបានប៉ះពាល់ដល់ដីចម្ការពលរដ្ឋពិតមែន។
លោក ឃី ប៊ុនហាក់ មានប្រសាសន៍បន្ថែមដូច្នេះ ៖ «ប៉ុន្តែទម្លាប់ប្រជាពលរដ្ឋគាត់ធ្វើកន្លងមក គាត់ធ្វើកន្លែងបោះបង្គោលតម្រុយបង្គោលព្រំដែនហ្នឹង។ បោះហ្នឹងបោះចូលមកក្នុងចម្ការស្វាយរបស់ប្រជាពលរដ្ឋប្រហែលជា ១០០ម៉ែត្រ ព្រោះកន្លែងហ្នឹងម្ខាងវៀតណាម ដាំអំពៅ ម្ខាងទៀតប្រជាពលរដ្ឋកម្ពុជា គាត់ដាំស្វាយចន្ទី»។
ប្រភពឲ្យដឹងទៀតថា ការបោះតម្រុយបង្គោលព្រំដែនរវាងកម្ពុជា-វៀតណាម នៅឃុំដា ស្រុកមេមត់ ទំនងអាចនាំឲ្យប៉ះពាល់ដល់ដីស្រែចម្ការប្រជាពលរដ្ឋជាង ២០០គ្រួសារ កំពុងរស់នៅតំបន់នោះ។
យ៉ាងណាក៏ដោយ លោកទេសរដ្ឋមន្ត្រី វ៉ា គឹមហុង និងជាប្រធានគណៈកម្មាធិការព្រំដែនរាជរដ្ឋាភិបាលកម្ពុជា មានប្រសាសន៍ថា ការបោះតម្រុយបង្គោលព្រំដែនណាមួយរវាងកម្ពុជា និងប្រទេសជិតខាងក្រុមការងារជំនាញ បានធ្វើឡើងដោយផ្អែកលើបច្ចេកទេសត្រឹមត្រូវ និងមានការប្រុងប្រយ័ត្នបំផុត។
លោក វ៉ា គឹមហុង បានស្នើទៅមន្ត្រីសង្គមស៊ីវិលក្តី ឬមន្ត្រីគណបក្សប្រឆាំងក្តី សូមនិយាយស្ដីឲ្យមានការប្រុងប្រយ័ត្ន និងសូមកុំរំខានដល់ការងារបោះតម្រុយបង្គោលព្រំដែនកម្ពុជា បើមិនដូច្នេះទេ នឹងប្រឈមមុខច្បាប់។
លោក វ៉ា គឹមហុង មានប្រសាសន៍បន្ថែម ៖ «លោក រ៉ុង ឈុន គាត់ជំនាញអីដែលគាត់ដឹងថា បាត់បង់ទឹកដីហ្នឹង? បាត់បង់ត្រង់ណាឲ្យពន្យល់ផលមើល៍។ យើងមិនបិទទេ ប៉ុន្តែសូមឲ្យពន្យល់ កុំចេះតែនិយាយ អានិយាយវាអត់ពិបាកទេ គ្រាន់តែចោទហ្នឹង យើងគិតថា រដ្ឋាភិបាលគេល្ងង់ខ្លាំងណាស់ ដែលធ្វើឲ្យបាត់បង់ទឹកដី ចាំបាច់បោះបង្គោលធ្វើអី បើធ្វើឲ្យបាត់បង់ទឹកដីដដែល?»។
មន្ត្រីគណៈកម្មការបោះបង្គោលព្រំដែនកម្ពុជា បានឲ្យដឹងថា ប្រទេសកម្ពុជា និងប្រទេសវៀតណាម មានគម្រោងបោះបង្គោលព្រំដែននៃប្រទេសទាំងពីរឲ្យចប់ជាស្ថាពរ នៅត្រឹមឆ្នាំ២០១២។
តំណាងក្រុមប្រឹក្សាឃ្លាំមើលកម្ពុជា ដឹកនាំដោយលោក រ៉ុង ឈុន កន្លងមក ធ្លាប់បានដឹកនាំគណៈប្រតិភូចុះពិនិត្យការបោះតម្រុយបង្គោលព្រំដែនកម្ពុជា-វៀតណាម នៅតាមខេត្តមួយចំនួនមានដូចជាខេត្តតាកែវ ជាដើម ប៉ុន្តែត្រូវបានអាជ្ញាធរមករារាំង៕