មន្ត្រីខុទ្ទកាល័យព្រះបរមរាជវាំង លោក អ៊ុំ តារាវុធ បានមានប្រសាសន៍ថាព្រះមហាក្សត្រ ព្រះបរមនាថ នរោត្តម សីហមុនី នឹងយាងចូលរួមជាមួយនឹងប្រមុខរដ្ឋនៃប្រទេសដទៃទៀតក្នុងពិធីបើកកីឡាអូឡាំពិក ទីក្រុងប៉េកាំង នៅថ្ងៃទី៨ ខែសីហាខាងមុខនេះ ហើយបន្ទាប់មកទ្រង់នឹងធ្វើការត្រួតពិនិត្យព្រះរាជសុខភាពរបស់ព្រះអង្គ ។
លោក អ៊ុំ តារាវុធ បានមានប្រសាសន៍ថាព្រះបរមនាថ នរោត្តម សីហមុនី នឹងយាងត្រឡប់មកកាន់ប្រទេសកម្ពុជាវិញយ៉ាងយូរ២សប្ដាហ៍ខាងមុខ ។
លោក អ៊ុំ តារាវុធ បានមានប្រសាសន៍ថា ៖ «លោកចូលរួមនៅក្នុងការបើកអូឡាំពិកជាមួយប្រមុខរដ្ឋ ប្រមុខរាជរដ្ឋាភិបាលមួយចំនួន... ។ ហើយផុតមក លោកនឹងត្រួតពិនិត្យនូវព្រះរាជសុខភាពរបស់លោក ម៉្លោះហើយលោកនឹងយាងមកវិញយ៉ាងយូរពីរសប្ដាហ៍» ។
ទាក់ទងនឹងព្រះមហាវីរក្សត្រ នរោត្តម សីហនុ និងសម្ដេចម៉ែ លោក អ៊ុំ តារាវុធ បានមានប្រសាសន៍ថាទ្រង់នឹងគង់នៅប្រទេសចិនមួយរយៈ ដើម្បីត្រួតពិនិត្យព្រះរាជសុខភាព ។
នៅក្នុងព្រះរាជដំណើរទៅកាន់ប្រទេសចិនរបស់ព្រះមហាក្សត្រ ព្រះមហាវីរក្សត្រ និងសម្ដេចម៉ែនោះ ក៏មានការចូលរួមដង្ហែព្រះរាជដំណើរពីសំណាក់ប្រធានរដ្ឋសភាជាតិ លោក ហេង សំរិន ប្រធានព្រឹទ្ធសភា លោក ជា ស៊ីម ប្រធានគណបក្សហ៊្វុនស៊ិនប៉ិច លោក កែវ ពុទ្ធរស្មី មន្ត្រីរដ្ឋាភិបាលជាន់ខ្ពស់ជាច្រើនរូបនិងមន្ត្រីទូតផងដែរ ៕