មេឃុំបក្សប្រជាជននៅពោធិ៍សាត់រងការចោទថាមិនឲ្យបក្សសមរង្ស៊ីប្រជុំ

ដោយ មណ្ឌលកែវ

2008-06-24

មន្ត្រីគណបក្សសមរង្ស៊ី ឃុំឈើតុំ ស្រុកក្រគរ ខេត្តពោធិ៍សាត់ បានចោទប្រកាន់មេឃុំនិងជាប្រធានគណបក្សប្រជាជនកម្ពុជាឃុំនេះថាបានប្រើអំណាចគាបសង្កត់មិនឲ្យគណបក្សសមរង្ស៊ីធ្វើសកម្មភាពកោះប្រជុំសមាជិកបក្សបាន ។

ជំទប់ទី១និងជាប្រធានគណបក្សសមរង្ស៊ីឃុំឈើតុំ លោក រឿន វ៉ាន់ បានមានប្រសាសន៍ប្រាប់វិទ្យុអាស៊ីសេរីនៅព្រឹកថ្ងៃ២៣ មិថុនា ថាមេឃុំឈើតុំ លោក ធឹម ង៉ុក បានបញ្ជាឲ្យមេភូមិរារាំងប្រជាពលរដ្ឋដែលគាំទ្រគណបក្សសមរង្ស៊ីមិនឲ្យទៅប្រជុំដើម្បីត្រៀមលក្ខណៈសម្រាប់យុទ្ធនាការឃោសនាបោះឆ្នោតនាពេលខាងមុខនេះនិងបានប្រើរូបភាពផ្សេងៗទៀត ដើម្បីបំបាក់ស្មារតីលោកផងដែរ ។

លោក រឿន វ៉ាន់ បានមានប្រសាសន៍ថា ៖ «មេឃុំគាត់អត់ធ្វើផ្ទាល់ទេ គាត់ដាក់បញ្ហាគាបសង្កត់នេះទៅលើមេភូមិគ្រប់ភូមិ ។ គាត់ឲ្យមេភូមិគ្រប់ភូមិឲ្យតែមានបញ្ហាប្រជុំអី គាត់ប្រើគ្រប់រូបភាពដើម្បីឲ្យមេភូមិហ្នឹងដើរគំរាមកំហែងប្រជាពលរដ្ឋ គាត់ថាប្រជាពលរដ្ឋណាហ៊ានទៅចូលរួមជាមួយគណបក្សសមរង្ស៊ីឬមួយក៏គណបក្សផ្សេងៗ ពេលបោះឆ្នោតដែលជាប់លោក ហ៊ុន សែន ជានាយករដ្ឋមន្ត្រី គាត់នឹងចែកតំបន់ថាអ្នកឯងបោះឆ្នោតឲ្យអ្នកណាអ្នកឯងទៅរស់នៅជាមួយនឹងអ្នកហ្នឹង» ។

មេឃុំឈើតុំ លោក ធឹម ង៉ុក បដិសេធការចោទប្រកាន់នេះដោយលោកមានប្រសាសន៍ថា លោកមិនដែលបានបញ្ជាឲ្យមេភូមិណាម្នាក់ធ្វើយ៉ាងដូច្នេះឡើយ ៖ «ខ្ញុំដូចជាមិនដឹងរឿងអីផង...» ។

ឯបញ្ហាលោក រឿន វ៉ាន់ រងការចោទប្រកាន់ថាបានទិញក្របីពីចោរនោះគឺជាការប្តឹងផ្តល់របស់ប្រជាពលរដ្ឋឲ្យលោកជួយដោះស្រាយក្នុងនាមជាអាជ្ញាធរដែនដី ពុំមែនជាការគាបសង្កត់ស្មារតីក្នុងន័យគណបក្សនយោបាយនោះឡើយ ។

លោក រឿន វ៉ាន់ បានមានប្រសាសន៍ថា ៖ «អាហ្នឹងវារឿងច្រឡំគ្នាយើងដោះស្រាយនៅសាលាឃុំទេតើ បីបួនលើកហើយតើ ប៉ុន្តែគេមិនព្រមផ្ទាល់ខ្លួន ហើយយើងបញ្ជូនទៅតុលាការទៅ ព្រោះឃុំមានសិទ្ធិអីនឹងដោះស្រាយ បើយើងដោះហើយវាមិនព្រមព្រៀង» ។

មន្ត្រីផ្នែកអង្កេតអង្គការអាដហុកប្រចាំខេត្តពោធិ៍សាត់ លោក ភួង សុធា មានប្រសាសន៍ថា លោកពុំទាន់បានដឹងរឿងនេះនៅឡើយទេ ប៉ុន្តែលោកទទួលស្គាល់ថាពិតជានៅមានការគាបសង្កត់ខ្លះៗពីសំណាក់គណបក្សកាន់អំណាចមកលើគណបក្សប្រឆាំងនៅឃុំមួយចំនួនក្នុងទូទាំងខេត្តតែរូបភាពគំរាមកំហែងបានថយចុះបើប្រៀបធៀបទៅនឹងអាណត្តិមុន ។

លោក ភួង សុធា បានឲ្យដឹងថា ៖ «នៅខាងភូមិឃុំណាក៏ដូចភូមិឃុំណាដែរ គណបក្សមានអំណាចគាត់តែងតែគាបសង្កត់ ។ គាបសង្កត់គណបក្សដែលឈរនៅក្នុងរដ្ឋាភិបាលហ្នឹង វាជាបញ្ហាធម្មតាទៅហើយសម្រាប់បក្សកាន់អំណាច ។ ហើយការគាបសង្កត់ហ្នឹងដូចជាការគាបសង្កត់ខាងស្មារតីទៅវិញទេ វាដូចជាអត់មានការគាបសង្កត់ដូចកាលពីអាណត្តិមុនៗដែលយើងឃើញថាមានការគំរាមកំហែង...» ។

គួរបញ្ជាក់ផងដែរថាការបោះឆ្នោតជ្រើសរើសសមាជិកសភាអាណត្តិទី៤ ដែលនឹងប្រព្រឹត្តទៅនៅថ្ងៃ២៧ កក្កដាខាងមុខនេះ មានគណបក្សចំនួន១១ចូលរួមប្រកួតប្រជែងក្នុងការបោះឆ្នោត ៕

បោះពុម្ព អ៊ីម៉េល