យោងតាមលិខិតជាផ្លូវការរបស់គណបក្សសមរង្ស៊ី ចុះថ្ងៃទី២២ ខែសីហានេះ ដែលបានផ្ញើជូនទៅគណៈកម្មាធិការជាតិរៀបចំការបោះឆ្នោត គឺគណបក្សសមរង្ស៊ីអះអាងថា គ.ជ.ប.បានលុបឈ្មោះអ្នកបោះឆ្នោតពីបញ្ជីបោះឆ្នោតឆ្នាំ២០០៧ លុបអស់ចំនួនជិត៦សែននាក់ ដោយគ្រាន់តែសំអាងទៅតាមការអះអាងរបស់មេភូមិនិងក្រុមប្រឹក្សាឃុំសង្កាត់តែប៉ុណ្ណោះ ដែលជាការផ្ទុយទៅនឹងសេចក្តីណែនាំដែលគ.ជ.ប.អនុញ្ញាតឲ្យលុបតែចំពោះអ្នកបោះឆ្នោតរូបណាដែលស្លាប់ អ្នកដែលមានឈ្មោះស្ទួន អ្នកផ្លាស់ទីលំនៅ និងអ្នកដែលរងការដកហូតសិទ្ធិបោះឆ្នោត ហើយថាបើលុបត្រូវធ្វើឡើងដោយយុត្តិធម៌ មានឯកសារច្បាស់លាស់ប្រកបដោយតម្លាភាព ។
គណបក្សសមរង្ស៊ីបញ្ជាក់ថា ការលុបឈ្មោះពលរដ្ឋជាច្រើនចេញពីបញ្ជីបោះឆ្នោតដោយអយុត្តិធម៌ដូច្នោះ បានធ្វើឲ្យពលរដ្ឋរាប់សែននាក់ដែលមានឆន្ទៈទៅបោះឆ្នោតបាត់បង់សិទ្ធិបោះឆ្នោតជ្រើសតាំងតំណាងរាស្ត្រអាណតិ្តទី៤ ថ្ងៃទី២៧ ខែកក្កដា ឆ្នាំ ២០០៨ នេះ យ៉ាងអយុត្តិធម៌ ។
លោក សម រង្ស៊ី ប្រធានគណបក្សសមរង្ស៊ីមានប្រសាសន៍បន្ថែមប្រាប់វិទ្យុអាស៊ីសេរី នៅថ្ងៃសៅរ៍នេះថា ការស្នើសុំឲ្យគ.ជ.ប.បង្ហាញឯកសារភស្តុតាងជាក់ស្តែងនោះគឺសំខាន់ណាស់ ។
លោក សម រង្ស៊ី បានឲ្យដឹងថា ៖ «នេះជាការផ្ដល់យុត្តិធម៌ដល់ប្រជាពលរដ្ឋខ្មែររាប់សែន អាចចូលរាប់លាននាក់ដែលត្រូវបានគេលុបឈ្មោះពីបញ្ជីឈ្មោះអ្នកបោះឆ្នោត ហើយដែលត្រូវបានបាត់បង់សិទ្ធិបោះឆ្នោតរបស់បងប្អូនទាំងនោះ ។ ការលុបឈ្មោះនេះគឺលុបដោយខុសច្បាប់ ពីព្រោះមុននឹងលុបឈ្មោះគេត្រូវតែមានភស្តុតាងថា សាមីខ្លួនបានស្លាប់ទៅហើយ ឬក៏សាមីខ្លួនបានចាកចេញពីភូមិឃុំជាស្ថាពរទៅណាបាត់ហើយ ។ តែជាក់ស្ដែងមិនមែនអ៊ីចឹង សាមីខ្លួននៅរស់សោះ សាមីខ្លួនអត់មានផ្លាស់ទីលំនៅទៅណាសោះ សាមីខ្លួនបានបោះឆ្នោតកាលពីឆ្នាំ២០០៧ ស្រាប់តែក្នុងរយៈពេលប៉ុន្មានខែចុងក្រោយនេះត្រូវគេលុបឈ្មោះ លុបដោយគ្មានភស្តុតាង ។ អ៊ីចឹងហើយបានជាខ្ញុំទារឲ្យគណៈកម្មាធិការជាតិរៀបចំការបោះឆ្នោតដែលមានលោក អ៊ឹម សួស្ដី ជាប្រធាននោះ សុំឲ្យផ្ដល់ភស្តុតាងមកថា មុននឹងលុបឈ្មោះគេថាតើមានអ្វីដែលបញ្ជាក់ថាគេស្លាប់ ? តើមានអ្វីដែលបញ្ជាក់ថាគេបានចាកចេញពីលំនៅឋានរបស់គេជាស្ថាពរទៅណាទីហើយ ? គេអត់មានទៅណាសោះ គេអត់ស្លាប់សោះ លុបឈ្មោះគេនេះគឺលុបដោយខុសច្បាប់ ហើយលុបដោយអយុត្តិធម៌» ។
លោក សម រង្ស៊ី មានប្រសាសន៍ថាគណបក្សសមរង្ស៊ីនៅមិនទាន់បានចម្លើយតបពីគ.ជ.ប.នៅឡើយទេចំពោះសំណើនោះរហូតមកដល់ពេលនេះ ។ បើតាមសេចក្តីប្រកាសជាផ្លូវការរបស់គ.ជ.ប.ស្តីពីលទ្ធផលបណ្តោះអាសន្ននៃការបោះឆ្នោតជាតិ ឆ្នាំ ២០០៨ នេះ បានឲ្យដឹងថាគណបក្សប្រជាជនកម្ពុជាឈ្នះបាន៩០អាសនៈ គណបក្សសមរង្ស៊ីបាន២៦អាសនៈ គណបក្សសិទ្ធិមនុស្សបាន៣អាសនៈ គណបក្ស នរោត្តម រណឫទ្ធិ បាន២អាសនៈ និងគណបក្សហ៊្វុនស៊ិនប៉ិចបាន២អាសនៈ ពីក្នុងចំណោម១២៣អាសនៈសភាជាតិកម្ពុជា ។
បើតាមច្បាប់ក្រោយពីថ្ងៃបោះឆ្នោតចំនួន៦០ថ្ងៃ កិច្ចប្រជុំដំបូងនៃសមាជិកសភាថ្មីនឹងប្រព្រឹត្តដែលត្រូវនឹងថ្ងៃទី២៤ ខែកញ្ញា ខែក្រោយនេះ ។ ប៉ុន្តែលោក សម រង្ស៊ី បានបញ្ជាក់ច្បាស់អំពីជំហររបស់គណបក្សសមរង្ស៊ី នឹងមិនចូលរួមក្នុងកិច្ចប្រជុំនោះទេ បើគ.ជ.ប.នៅតែមិនដោះស្រាយបណ្តឹងពីការបោះឆ្នោតនោះឲ្យមានយុត្តិធម៌ទេនោះព្រោះថា ៖ «គណបក្សសមរង្ស៊ីនិងគណបក្សសិទ្ធិមនុស្សមិនទទួលស្គាល់ទេការបោះឆ្នោតបែបនេះ លទ្ធផលដែលគេប្រកាសបែបនេះ ដោយសារតែមានប្រជាពលរដ្ឋរាប់សែនរាប់លាននាក់មិនបានចូលរួមក្នុងការបោះឆ្នោត ត្រូវគេលុបឈ្មោះ ត្រូវគេបំបាត់សិទ្ធិបោះឆ្នោត ដូច្នេះការបោះឆ្នោតនេះមិនត្រឹមត្រូវទេ មិនយុត្តិធម៌ទេ ។ គណៈកម្មាធិការជាតិរៀបចំការបោះឆ្នោតនោះបានបណ្ដោយឲ្យអ្នកដែលគ្មានសិទ្ធិបោះឆ្នោតសោះ យកឈ្មោះខ្មោចយកទៅប្រើប្រាស់ យកឈ្មោះមនុស្សដែលស្លាប់ទៅហើយ មនុស្សដែលគ្មានវត្តមាននៅក្នុងភូមិឃុំ បានទៅបោះឆ្នោត ដោយគេចេញទម្រង់បែបបទ១០១៨ក្លែងក្លាយ ចេញដោយខុសច្បាប់ មានន័យថារដ្ឋសភាបែបនេះ ហើយតំណាងរាស្ត្រមួយចំនួនដែលមកពីគណបក្សប្រជាជន គឺមិនមែនទទួលសំឡេងពីប្រជារាស្ត្រខ្មែរពេញសិទ្ធិទេ គឺទទួលសំឡេងពីជនបរទេស ពីយួនដែលបានបន្លំធ្វើជាខ្មែរ ហើយដែលបានទទួលទម្រង់បែបបទ១០១៨ក្លែងក្លាយ បានទទួលសំឡេងឆ្នោតពីមនុស្សដែលអត់មានសិទ្ធិបោះឆ្នោត ដូចជាក្មេងមិនទាន់គ្រប់អាយុផង ។ ដូច្នេះសភាបែបហ្នឹងយើងអត់ទទួលស្គាល់ ហើយយើងនឹងអត់ទៅប្រជុំជាមួយទេ ពេលគេបើកស្អីសម័យប្រជុំលើកទី១ ឲ្យគេបើកតែគ្នាគេទៅ» ។
លោក សម រង្ស៊ី បញ្ជាក់ថាគណបក្សសមរង្ស៊ីនៅតែរក្សាកៅអីសភាជាតិដែលបក្សបានទទួលពីពលរដ្ឋខ្មែរសម្រាប់អាណត្តិថ្មីដដែល គឺនឹងមិនបោះបង់ចោលទេ ឧបមាឈានដល់កម្រិតថាបើទោះជាគណបក្សសមរង្ស៊ីមិនចូលរួមក្នុងកិច្ចប្រជុំនោះក្តី ។
តែកន្លងមកនេះគ.ជ.ប.តែងបានបដិសេធនូវការចោទប្រកាន់របស់បក្សប្រឆាំងដែលថា ការបោះឆ្នោតនោះមិនយុត្តិធម៌ ។ គ.ជ.ប.អះអាងថាគេលុបឈ្មោះអ្នកបោះឆ្នោតគឺធ្វើត្រឹមត្រូវតាមច្បាប់ ៕