ក្នុងព្រះលិខិតជាភាសាបារាំងផ្សាយថ្ងៃទី២៥ សីហា ២០០៨ ក្នុងទំព័រវ៉ឹបសាយថ៍របស់ព្រះអង្គ អតីតព្រះមហាក្សត្របានចារថា ដោយមានប្រជាជាតិខ្មែរបានឃើញនិងបានដឹង នោះព្រះអង្គបានសុំឲ្យសមាជិករាជវង្សានុវង្សខ្មែរកុំធ្វើនយោបាយតទៅទៀត ។
ព្រះអង្គបញ្ជាក់ថាប្រតិកម្មទៅនឹងការស្នើសុំនេះគឺខ្លាំងណាស់ ហើយអវិជ្ជមានខ្លាំងណាស់ ព្រមទាំងសាហាវ ចាត់ជាអ្នកប្រឆាំងទៀតផង ។
ព្រះលិខិតបន្តដោយស្រង់បន្ទូលព្រះអង្គម្ចាស់មួយអង្គដែលបានហៅថា មហាព្រះអង្គម្ចាស់នោះថា "ឲ្យរាស្រ្តចិញ្ចឹម គឺធ្វើឲ្យរាស្ត្រកាន់តែក្រតទៅទៀត និងធ្វើឲ្យខ្សោះឈាម" ។
អតីតព្រះមហាក្សត្របន្តថា មហាព្រះអង្គម្ចាស់ក្សត្រាមួយអង្គទៀតមានបន្ទូលថា "ព្រះអង្គចង់ក្លាយជាមនុស្សរបស់រាស្ត្រ ហើយផ្តាច់ចេញពីលោហិតស្តេចដែលនៅក្នុងសរសៃឈាម នោះគឺដើម្បីនៅសេរីជាអ្នកនយោបាយ" ។
ព្រះលិខិតបន្តថា ច្រើនឆ្នាំកន្លងផុតទៅ ឥឡូវខែសីហានេះតើគេឃើញអ្វី ? គឺមហាព្រះអង្គម្ចាស់ក្សត្រីមួយអង្គ និងស្វាមីជាទីស្រឡាញ់របស់ព្រះអង្គនោះ ខូចអស់បុណ្យស័ក្តិ ព្រមទាំងអូសចូលភក់ ។
មហាព្រះអង្គម្ចាស់ក្សត្រាមួយអង្គបានត្រូវកាត់ទោសឲ្យជាប់ពន្ធនាគារ ហើយដើម្បីគេចពីការជាប់ពន្ធនាគារនោះចាំបាច់ត្រូវគង់នៅនិរទេស ។
អតីតព្រះមហាក្សត្រ ព្រះបាទ សម្តេចព្រះនរោត្តម សីហនុ បានមានបន្ទូលនៅចុងបញ្ចប់ថា ព្រះអង្គម្ចាស់ក្សត្រា ព្រះអង្គម្ចាស់ក្សត្រីខ្មែរ ដែលងប់នឹងនយោបាយនោះ គឺមិនងាយនឹងឃើញក្តីអភ័ព្វ និងភាពអាម៉ាស់របស់ខ្លួននោះឡើយ ៕