គម្រោងការទៅសួរសុខទុក្ខ លោក ទឹម សាខន នាពេលខាងមុខក្រោយពីមានសេចក្តីរាយការណ៍ថា លោក ទឹម សាខន កំពុងតែជាប់ឃុំខ្លួននៅក្នុងផ្ទះនៅខេត្តមាត់ជ្រូកក្នុងប្រទេសវៀតណាម ក្រោយពីលោកត្រូវបានដោះលែងឲ្យមានសេរីភាពចេញពីពន្ធនាគារកាលពីដើមឆ្នាំ២០០៨នេះ។
លោក សុន ឆ័យ តំណាងរាស្រ្តខាងគណបក្សសមរង្ស៊ីបានមានប្រសាសន៍ប្រាប់វិទ្យុអាស៊ីសេរីថា ៖ «ខ្ញុំជឿជាក់ថានឹងធ្វើដំណើរដោយរួមទាំងក្រុមគ្រួសាររបស់លោក សាខន ផង មានឪពុកជាដើម នៅដើមខែតុលានេះ។ យើងធ្វើនេះមិនមែនក្នុងនាមគណបក្សអីទេ អ្នកតំណាងរាស្ត្រមួយដែលទទួលការស្នើសុំឲ្យជួយដើម្បីទៅពិនិត្យមើលថា ពលរដ្ឋរបស់ខ្ញុំទទួលរងការគាបសង្កត់ដូចការចោទប្រកាន់ដែរឬយ៉ាងដូចម្ដេច?»។
លោកបានឲ្យដឹងថា លោកបានដាក់លិខិតរបស់លោកស្នើជាផ្លូវការទៅស្ថានទូតវៀតណាមប្រចាំក្នុងប្រទេសកម្ពុជា កាលពីថៃ្ងទី៨ ខែកញ្ញាកន្លងទៅថ្មីៗនេះ ប៉ុនែ្តលោកមិនទាន់បានទទួលចម្លើយជាផ្លូវការនៅឡើយទេពីស្ថានទូតវៀតណាមនោះ។
លោក ទ្រីញ បាកាំ មន្រ្តីអ្នកនាំពាក្យរបស់ស្ថានទូតវៀតណាមប្រចាំក្នុងប្រទេសកម្ពុជា បានមានប្រសាសន៍ប្រតិកម្មថា ការធ្វើដំណើររបស់លោក សុន ឆ័យ នោះ អាចធ្វើទៅបានលុះត្រាណាមានការអនុញ្ញាតត្រឹមត្រូវ។
លោកបានបញ្ជាក់ថា លោក ទឹម សាខន បានក្លាយប្រជាពលរដ្ឋធម្មតានៅក្នុងប្រទេសវៀតណាម ដូច្នេះលោកពុំមានឧបសគ្គអ្វីទេក្នុងការទាក់ទងជាមួយនឹងក្រុមគ្រួសារឬសាច់ញាតិនោះ។
លោក អាង ច័ន្ទឬទ្ធិ ប្រធានរបស់អង្គការខែ្មរកម្ពុជាក្រោមការពារសិទ្ធិមនុស្សបានមានប្រសាសន៍ថា លោក ទឹម សាខន កំពុងតែត្រូវបានជាប់ឃុំឃាំងនៅក្នុងផ្ទះនៅក្នុងខេត្តមាត់ជ្រូក ប្រទេសវៀតណាម។
លោក អាង ច័ន្ទឬទ្ធិ បានឲ្យដឹងថា ៖ «ពួកខ្ញុំបានទទួលព័ត៌មានហ្នឹងតាមរយៈសហគមន៍ខ្មែរកម្ពុជាក្រោមនៅហ្នឹង ហើយខាងសហព័ន្ធឬក៏ខាងសហគមន៍ខ្មែរក្រោម គាត់បានទទួលដែរពីខាងបងប្អូននៅកម្ពុជាក្រោម។ ប៉ុន្តែយើងឆ្ងល់ដែរថាហេតុអ្វីបានជាវៀតណាមមិនអនុវត្តទៅតាមច្បាប់របស់ខ្លួនឬក៏ច្បាប់របស់ប្រទេសកម្ពុជាផង ហេតុអីបានជាបន្តឃុំគាត់តទៅទៀតដោយមិនអនុវត្តតាមសាលក្រមរបស់តុលាការចេញថា អនុញ្ញាតឲ្យគាត់ហ្នឹងរួចខ្លួនហើយអាចវិលត្រឡប់មកស្រុកខ្មែរវិញ»។
សូមរំឮកថា លោក ទឹម សាខន ជាអតីតព្រះចៅអធិការនៃវត្តភ្នំឌិនខាងជើងក្នុងខេត្តតាកែវ ត្រូវបានអាជ្ញាធរកម្ពុជាចាប់ផ្សឹកយ៉ាងតក់ក្រហល់ កាលពីខែមិថុនា ឆ្នាំ២០០៧កន្លងទៅ ហើយបានបញ្ជូនខ្លួនទៅឲ្យអាជ្ញាធរវៀតណាមដោយស្ងាត់ៗ។
លោក ទឹម សាខន ត្រូវបានតុលាការវៀតណាមកាត់ទោសឲ្យជាប់គុករយៈពេលមួយឆ្នាំក្រោមបទចោទប្រកាន់ថា លោកបានធ្វើឲ្យមានការបែកបាក់ចំណងសាមគ្គីភាពរវាងកម្ពុជានិងវៀតណាម ចំពោះអ្វីដែលលោកមានការពាក់ព័ន្ធជាមួយនឹងសហព័ន្ធខែ្មរកម្ពុជាក្រោមពិភពលោកដែលមានមូលដ្ឋាននៅក្នុងសហរដ្ឋអាមេរិក។
របាយការណ៍សិទ្ធិមនុស្សប្រចាំឆ្នាំ២០០៧កន្លងទៅរបស់ក្រសួងការបរទេសសហរដ្ឋអាមេរិកបាននិយាយថា លោក ទឹម សាខន ជាមួយនឹងសកម្មជនវៀតណាមម្នាក់ទៀតបានបាត់ខ្លួនស្ងាត់ៗនៅពេលនោះគឺជារឿងនយោបាយ ហើយពួកគេបានទទួលរងនូវការធ្វើទុក្ខបុកមេ្នញនិងការរំលោភសិទ្ធិមនុស្សយ៉ាងធ្ងន់ធ្ងរពីសំណាក់អាជ្ញាធរវៀតណាម៕