លោក សុផល មុន្នី ដែលបានទៅកាន់តំបន់នោះបានរៀបរាប់ពីស្ថានភាពបច្ចុប្បន្ននៅប្រាសាទតាមាន់ធំនេះ តាមរយៈការសាកសួររបស់លោក ផាន សូផាត ដែលមានសេចក្តីដូចទៅ៖
ផាន សូផាត ៖ លោក សុផលមុន្នី ខ្ញុំចង់ជម្រាបសួរលោកអំពីស្ថានភាពនៅតំបន់ប្រាសាទតាមាន់ធំ តើយ៉ាងម៉េចហើយ នៅថ្ងៃនេះ (ថ្ងៃទី៧ សីហា)?
សុផល មុន្នី ៖ បាទ តាមការសាកសួររបស់ខ្ញុំ ទៅមន្រ្តីការពារព្រំដែន ក៏ដូចជាកងកម្លាំងប្រដាប់អាវុធខ្មែរនោះ ឃើញថា កងទ័ពរដ្ឋាភិបាលខ្មែរឥឡូវនេះ បានចូលកាន់កាប់ប្រាសាទតាមាន់ធំហ្នឹងទាំងស្រុងហើយ។
ដោយឡែកឯទ័ពឈុតខ្មៅរបស់ថៃ ដែលចូលកាន់កាប់ប្រាសាទតាមាន់ធំ កាលពីថ្ងៃទី៣ សីហា ដែលមានគ្នាពី៥០ រហូតដល់ជាង ៣០០នាក់នោះ បានដកថយចូលទៅក្នុងបន្ទាយរបស់ខ្លួនវិញហើយ ដែលមានចម្ងាយប្រមាណ ១០០ម៉ែត្រ ខាងក្រោយប្រាសាទតាមាន់ធំហ្នឹង។
ផាន សូផាត ៖ តើលោកមានបានជ្រាបទេថា ហេតុអីបានជាកងទ័ពដាក់កម្លាំងច្រើនទៅនៅប្រាសាទនោះ?
សុផល មុន្នី ៖ តាមមន្រ្តីខាងការពារព្រំដែន ហើយនិងទាហានដែលនៅទីនោះ បានអះអាងថា ការដាក់កម្លាំងការពារនេះ ឃើញថា ដោយសារតែខាងទ័ពថៃហ្នឹង បានឈ្លានពានចូលមកកាន់កាប់ កាលពីថ្ងៃទី៣ (សីហា) មានកម្លាំងពី៦០ ឡើងដល់ទៅជាង ៣០០នាក់ អ៊ីចឹងហើយទើបខាងកងទ័ពខ្មែរយើង បានដាក់កម្លាំងបន្ថែមការពារទីនោះដើម្បីបញ្ជៀសការឈ្លានពានរបស់ថៃនោះ។
ហើយពីថ្ងៃម្សិលមិញ ខាងមេបញ្ជាការកងទ័ពរបស់ខ្មែរយើង ក៏បានជួបចរចាជាមួយមេបញ្ជាការទាហានឈុតខ្មៅរបស់ថៃ ដែលបានជួបគ្នានៅឯខាងច្រកអូរស្មាច់ ប៉ុន្តែការជួបជុំគ្នានោះ គឺកើតមានឡើង បន្ទាប់ពីមានសភាពការណ៍តានតឹងនៅឯប្រាសាទតាមាន់ធំនោះ ហើយលទ្ធផលយ៉ាងណានោះ គឺមិនទាន់បញ្ជាក់ទេ ប៉ុន្តែក្រោយពីការប្រជុំឃើញថា មានការដកទ័ពថៃអីជាបន្តបន្ទាប់អ៊ីចឹង។
ផាន សូផាត ៖ ឥឡូវនេះ តើតំបន់ជុំវិញប្រាសាទតាមាន់ធំហ្នឹង មានអ្នកស្រុកប្រជារាស្រ្ដទៅរស់នៅ ឬមួយក៏ទៅទីហ្នឹងខ្លះដែរទេ ឬមួយក៏មានតែកម្លាំងទ័ពទេ?
សុផល មុន្នី ៖ តាមមន្រ្តីរបស់កងទ័ពបានឲ្យដឹងថា ថ្ងៃនេះ ឬថាមានសមាគមការពារអរិយធម៌ខ្មែរ ដែលមានលោក មឿង សុន ដែលជាប្រធាននោះ គ្រោងនឹងរៀបចំពិធីបួងសួងមួយ នៅល្ងាចនេះ ដោយមានការចូលរួមពីភ្ញៀវទេសចរ និងប្រជាពលរដ្ឋមកពីទីក្រុងភ្នំពេញ ខេត្តស្វាយរៀង និងខេត្តសៀមរាបនៅថ្ងៃនេះ។
ហើយដោយឡែកខាងមន្រ្តីរបស់សាលាស្រុកបន្ទាយអំពិលនេះ ក៏បានឲ្យដឹងថា នៅថ្ងៃទី៨ ខែសីហា ឆ្នាំ២០០៨ហ្នឹង ឃើញថា មន្រ្តីហ្នឹងនឹងគ្រោងធ្វើដំណើរទៅប្រាសាទតាមាន់ធំហ្នឹង ដើម្បីធ្វើការចែកអំណោយឧបត្ថម្ភថវិកាដល់កងទ័ព ដែលកំពុងឈរការពារនៅទីនោះ។ ហើយថវិកាដែលខ្ញុំបានសាកសួរទៅលោកអភិបាលរងស្រុកបន្ទាយអំពិលហ្នឹង គឺមានប្រហែលជាងមួយលាន ដែលបានរៃអង្គាសគ្នានៅក្នុងស្រុកហ្នឹង ដើម្បីជួយឧបត្ថម្ភដល់កងទ័ពនេះ៕