គ្រូបង្រៀនខេត្តព្រះវិហារ បានអះអាងថា ប្រាក់បៀវត្សខែវិច្ឆិកា របស់ពួកគាត់មិនទាន់បានបើកគិតមកដល់ថ្ងៃទី២៨ ខែធ្នូ ឆ្នាំ២០១២។
លោក ធួន ពុទ្ធ ជាតំណាងឲ្យគ្រូបង្រៀននៅខេត្តព្រះវិហារ បានស្នើឲ្យលោកនាយករដ្ឋមន្ត្រី ហ៊ុន សែន និងលោក អ៊ឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា ជួយមានវិធានការជំរុញឲ្យស្ថាប័នពាក់ព័ន្ធ ពន្លឿនបើកប្រាក់បៀវត្សជូនគ្រូបង្រៀនសម្រាប់ខែវិច្ឆិកា និងសម្រាប់ខែដទៃទៀត គឺត្រូវបើកឲ្យបានទៀងទាត់តាមខែនិមួយៗនាថ្ងៃអនាគត។
លោក ធួន ពុទ្ធ៖ «ប្រាក់ខែគ្រូបង្រៀនតិចតួចស្តួចស្តើង ហើយបើកមិនគ្រប់ខែ។ ១ខែ ៦០ថ្ងៃ ហើយបើកហើយកាត់កងលុយគាត់ទៀត។ គ្រូនៅតាមសាលាមួយចំនួនគាត់លែងចង់ទៅបង្រៀនហើយ ដោយសារប្រាក់ខែស្តួចស្តើង ហើយអត់បើកឲ្យគាត់ទៀត។ អ៊ីចឹងគាត់មានកម្លាំងអី ដល់អ៊ីចឹងអ្នករងគ្រោះ គឺពលរដ្ឋខ្មែរពិសេសសិស្សានុសិស្ស»។
តំណាងគ្រូបង្រៀនរូបនេះ បានរិះគន់សកម្មភាពរបស់មន្ត្រីស្ថាប័នទទួលខុសត្រូវបើកប្រាក់បៀវត្សគ្រូបង្រៀន មិនបានយកចិត្តទុកដាក់លើការងាររបស់ខ្លួនទេ ព្រោះសូម្បីប្រាក់បៀវត្សតិចតួចរបស់គ្រូបង្រៀន ក៏បើកមិនបានទៀងទាត់ផងនោះ។
បន្ថែមលើនេះ គ្រូបង្រៀននៅតាមសាលាមួយចំនួននាខេត្តព្រះវិហារ ក៏បានទទូចឲ្យប្រមុខដឹកនាំ និងមន្ត្រីក្រសួងអប់រំ ជួយកែលំអចំពោះបញ្ហាបើកប្រាក់ខែយឺត កំពុងកើតមានក្នុងសង្គមកម្ពុជា ឲ្យបានប្រសើរជាងសព្វថ្ងៃ ព្រោះថាជីវភាពគ្រូបង្រៀនរំពឹងទៅលើប្រាក់បៀវត្សទទួលបានតិចតួចសម្រាប់ផ្គត់ផ្គង់គ្រួសារ។
បញ្ហានេះ លោក ហន ឆន ប្រធានមន្ទីរអប់រំ ខេត្តព្រះវិហារ បដិសេធមិនធ្វើអត្ថាធិប្បាយតាមទូរស័ព្ទទេ ជុំវិញបញ្ហាបើកប្រាក់បៀវត្សខែវិច្ឆិកា យឺតរបស់គ្រូបង្រៀននេះ។
លោក ភួង សុវណ្ណ ប្រធានសមាគមមន្ត្រីរាជការឯករាជកម្ពុជា មានប្រសាសន៍ថា មកដល់ដំណាក់កាលនេះទៅហើយមិនគួរប្រាក់បៀវត្សគ្រូបង្រៀន ឬមន្ត្រីរាជការស្ថាប័នផ្សេងៗ រដ្ឋាភិបាល ឬផ្នែកពាក់ព័ន្ធ បើកមិនបានទៀងទាត់តាមខែនិមួយៗទៀតទេ។ លោកថា ជីវភាពមន្ត្រីរាជការសព្វថ្ងៃនេះ គឺរស់រំពឹងទៅលើប្រាក់បៀវត្សទទួលបានតិចតួច ដើម្បីរួមផ្សំបង្គ្រប់ទៅលើការចំណាយប្រចាំថ្ងៃ៖ «ករណីបើកយឺតយ៉ាវ ឬក៏ផ្តល់ឲ្យប្រាក់ខែយឺតនេះ វាប៉ះពាល់ខ្លាំងមែនទែនទៅដល់ជីវភាពរបស់ពួកគាត់ ជាពិសេសក្រុមគ្រួសារពួកគាត់ដែលកំពុងរង់ចាំប្រាក់ឧបត្ថម្ភផ្សេងៗ ដើម្បីទៅសិក្សា ឬសម្រាប់ផ្គត់ផ្គង់ជីវភាព»។
ដូចគ្នាដែរ លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ ក៏បានរិះគន់ស្ថាប័នពាក់ព័ន្ធ និងក្រសួងអប់រំ លើករណីបើកប្រាក់បៀវត្សជូនគ្រូបង្រៀនខេត្តព្រះវិហារ មិនបានទៀតទាត់នេះដែរ៖ «ប្រាក់ខែខែវិច្ឆិកា ឆ្នាំ២០១២ នេះ ពួកគាត់មិនទាន់បានទទួលនៅឡើយ។ ឥឡូវជិតដាច់ខែធ្នូ ទៅហើយ ពួកគាត់នៅតែមិនទាន់បានទទួលប្រាក់បៀវត្សនេះ។ យើងដឹងហើយប្រាក់ខែគាត់តិចតួច តម្លៃទំនិញខ្ពស់បើកមិនទាន់ពេលវេលា ធ្វើឲ្យពួកគាត់មានការលំបាកសម្រាប់គ្រូបង្រៀន»។
យ៉ាងណាក៏ដោយ ក្រុមគ្រូបង្រៀនខេត្តព្រះវិហារ បានអំពាវនាវឲ្យលោកនាយករដ្ឋមន្ត្រី ហ៊ុន សែន ជួយអន្តរាគមន៍ទៅស្ថាប័នពាក់ព័ន្ធឲ្យពន្លឿនបើកប្រាក់បៀវត្សជូនគ្រូបង្រៀនឲ្យទៀងទាត់តាមខែនិមួយៗ ពិសេសប្រាក់បៀវត្សខែវិច្ឆិកា ដែលស្ទើរដាច់ខែធ្នូ ទៅហើយ នៅមិនទាន់បើកជូនទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។