គ្រូបង្រៀនរូបនេះ បានស្នើឲ្យថ្នាក់ដឹកនាំក្រសួងអប់រំ ពិសេសប្រមុខដឹកនាំរដ្ឋាភិបាលជួយឲ្យរូបគាត់បានបង្រៀននៅសាលាចាស់ដដែល ពីព្រោះពួកគាត់ធ្លាប់បម្រើការងារនៅទីនោះជិត ១០ឆ្នាំហើយ។
អ្នកគ្រូ ឆឹម ចាន់ណាន ជាគ្រូបង្រៀននៅសាលាបឋមសិក្សាត្រពាំងម្កាក់ ខេត្តពោធិ៍សាត់ បានចោទនាយកសាលាខ្លួនថាមានបក្ខពួកនិយម និងធ្វើរបាយការណ៍ទៅថ្នាក់លើបង្ខំឲ្យរូបគាត់ទៅបង្រៀនសាលាផ្សេងទាំងគ្មានកំហុសឆ្គង។
គ្រូបង្រៀនរូបនេះបានឲ្យដឹងថា ប្រាក់បៀវត្សសម្រាប់ខែធ្នូ ឆ្នាំ២០១២ របស់គាត់ក៏ត្រូវស្ថាប័នអប់រំខេត្តពោធិ៍សាត់ បង្កកមិនបើកជូនថែមទៀត។
អ្នកគ្រូ ចាន់ណាន បានស្នើឲ្យលោក អ៊ឹម សិទ្ធី រដ្ឋមន្ត្រីក្រសួងអប់រំ និងលោកនាយករដ្ឋមន្ត្រី ហ៊ុន សែន ជួយឲ្យរូបគាត់បានបង្រៀននៅសាលាបឋមសិក្សាត្រពាំងម្កាក់ ឡើងវិញ ព្រោះរូបគាត់មិនចង់ទៅបង្រៀនសាលាផ្សេងទេ ព្រោះសាលាបង្រៀនត្រពាំងម្កាក់ ក៏កំពុងខ្វះគ្រូបង្រៀនដែរ។ អ្នកគ្រូឲ្យដឹងថា ការផ្លាស់ប្ដូរនេះអាចបណ្ដាលមកពីរូបគាត់ជាសកម្មជនរបស់សមាគមគ្រូបង្រៀនកម្ពុជាឯករាជ ទើបត្រូវប្រធានការិយាល័យអប់រំស្រុកក្រគរ និងប្រធានមន្ទីរអប់រំខេត្តពោធិ៍សាត់ បង្ខំផ្លាស់ប្ដូរឲ្យទៅបង្រៀនសាលាផ្សេង។
ទាក់ទិនបញ្ហានេះ លោក សូ សុខ នាយកសាលាបឋមសិក្សាត្រពាំងម្កាក់ បានបដិសេធមិនផ្តល់អត្ថាធិប្បាយទេជុំវិញការផ្លាស់ប្ដូរនេះ ដោយបង្វែរសំណួរទៅប្រធានការិយាល័យអប់រំស្រុកក្រគរ និងប្រធានមន្ទីរអប់រំខេត្តពោធិ៍សាត់ វិញ។
ប្រធានការិយាល័យអប់រំស្រុកក្រគរ លោក សេក យ៉ាន បានបដិសេធមិនធ្វើអត្ថាធិប្បាយចំពោះបញ្ហាផ្លាស់ប្ដូរគ្រូបង្រៀននេះទេ។
ប៉ុន្តែ លោក សួង សុភី ប្រធានមន្ទីរអប់រំខេត្តពោធិ៍សាត់ បានឲ្យដឹងថា ការដែលមន្ទីរ និងការិយាល័យស្នើផ្លាស់ប្ដូរសាលាបង្រៀនឲ្យអ្នកគ្រូ ឆឹម ចាន់ណាន ទៅបង្រៀនសាលាបឋមសិក្សាបឹងកន្ទួត ដោយសារសាលានោះគ្មានគ្រូ ហើយសាលាបឋមសិក្សាត្រពាំងម្កាក់ ដែលគាត់បង្រៀន គ្មានសិស្សឲ្យគ្រូបង្រៀនរូបនេះបង្រៀន។
ទោះយ៉ាងណា ការអះអាងថានេះ ត្រូវបានអ្នកគ្រូ ឆឹម ចាន់ណាន បញ្ជាក់ថា ការផ្លាស់ប្ដូររូបគាត់ចេញពីសាលាត្រពាំងម្កាក់ ដែលធ្លាប់បង្រៀនជិត ១០ឆ្នាំមកនោះ ដោយសារបញ្ហាបុគ្គល និងមានបក្ខពួកនិយមទៅវិញទេ។
បញ្ហានេះ មន្ត្រីក្រសួងអប់រំ ក៏បានបដិសេធថាមិនផ្តល់ព័ត៌មានជុំវិញការផ្លាស់ប្ដូរ នៅថ្ងៃទី៣ ខែមករា ឆ្នាំ២០១៣។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ មានប្រសាសន៍ថា មន្ត្រីពាក់ព័ន្ធស្ថាប័នអប់រំខេត្តពោធិ៍សាត់ មិនគួរយករឿងបុគ្គលដើម្បីផ្លាស់ប្ដូរគ្រូបង្រៀនពីសាលាមួយទៅសាលាមួយនោះទេ។ លោកថា ទង្វើរបៀបនេះអាចនាំឲ្យប៉ះពាល់ដល់គុណភាពអប់រំ ដែលរាជរដ្ឋាភិបាលកំពុងជំរុញឲ្យមានការរីកចម្រើន ដើម្បីចូលរួមប្រកួតប្រជែងជាមួយប្រទេសសមាគមន៍អាស៊ាន នាថ្ងៃអនាគតនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។