លោក ឌិន ដារ៉ូ អនុប្រធាននគរបាលអន្តោប្រវេសន៍ប្រចាំច្រកទ្វារអន្តរជាតិប៉ោយប៉ែតជាប់ច្រកខ្លងលិតថៃ បានថ្លែងប្រាប់វិទ្យុអាស៊ីសេរីថា មន្ត្រីអន្តោប្រវេសន៍កម្ពុជានិងមន្ត្រីអន្តោប្រវេសន៍ថៃ បានជួបប្រជុំគ្នាជាបន្ទាន់មួយរយៈពេល៣០នាទី កាលពីម៉ោង៣រសៀលថ្ងៃច័ន្ទ ទី១៨ សីហា ឆ្នាំ២០០៨ ដើម្បីកំណត់ឲ្យភាគីថៃបំពេញបែបបទតាមគោលការណ៍របស់ប្រទេសកម្ពុជា មុននឹងអនុញ្ញាតជនជាតិថៃធ្វើការនៅតាមក្រុមហ៊ុនបើកបរដឹកទំនិញចូលមកកម្ពុជា ។
លោក ឌិន ដារ៉ូ បានឲ្យដឹងថា ៖ «និយាយរួម ក្នុងច្បាប់ប្រទេសនីមួយៗវាត្រូវតែមានក្រដាសស្នាមចេញចូលអ៊ីចឹងហើយ ហើយកន្លងមកយើងចេះតែមានការយោគយល់ អ៊ីចឹងយើងមានបទបញ្ជាថ្មីតម្រូវឲ្យបំពេញបែបបទតាមលក្ខការណ៍ច្បាប់ ។ ប្រជាជននៅតាមតំបន់ព្រំដែន ក៏ដូចជាប្រជាជននៅតាមខេត្ត ត្រូវមាន Passport ត្រូវមាន Border Pass ឬក៏ក្រដាសស្នាមផ្សេងៗ ដូចខាងយើងដែរ» ។
លោក ឌិន ដារ៉ូ បានឲ្យដឹងថាលទ្ធផលនៃកិច្ចប្រជុំនោះគឺមិនទាន់សម្រេចជាផ្លូវការយ៉ាងណានៅឡើយទេ ព្រោះភាគីអន្តោប្រវេសន៍ថៃបានស្នើសុំភាគីកម្ពុជាចំនួនពីរចំណុច ទីមួយគឺថៃសុំពន្យារពេលរហូតដល់ថ្ងៃទី១ ខែតុលា និងសូមឲ្យរក្សាទម្រង់នៃការបំពេញបែបបទដូចមុនដដែល ។
តំណាងក្រុមហ៊ុនមួយចំនួនដែលមានទំនាក់ទំនងការរកស៊ីជាមួយក្រុមហ៊ុនថៃចេញចូលតាមច្រកទ្វារអន្តរជាតិប៉ោយប៉ែត បានមិនធ្វើអត្ថាធិប្បាយជុំវិញការដាក់ឲ្យតម្រូវបំពេញបែបបទតាមច្បាប់ខាងលើនេះទេ គ្រាន់តែបញ្ជាក់វាគឺច្បាប់របស់ប្រទេសនីមួយៗដែលជាតិសាសន៍ដទៃត្រូវតែគោរព ៖ «ព្រោះវាជារឿងដែលភាគីថៃយល់ឃើញថាត្រូវ ត្រូវធ្វើឲ្យគេ បើមិនធ្វើ គេអនុវត្តតាមច្បាប់» ។
បើតាមលោកឧត្តមសេនីយ៍ទោ សុខ ភាព ប្រធានការិយាល័យទំនាក់ទំនងព្រំដែន បានមានប្រសាសន៍ថានៅមុនកិច្ចប្រជុំភាគីកម្ពុជាបានបិទច្រកមិនឲ្យឡានដឹកទំនិញថៃចូលមកកម្ពុជាដែរ ហើយការបិទច្រកនោះបានធ្វើឲ្យមានការកកស្ទះមួយសន្ទុះធំ ក្រោយមកទើបបើកឲ្យមានការចេញចូលជាធម្មតាវិញ ។
លោក ឌិន ដារ៉ូ បានថ្លែងថាកម្ពុជាជូនដំណឹងទៅខាងភាគីថៃមុនថ្ងៃជួបប្រជុំប្រហែលជា ៤ថ្ងៃទៅហើយ ហើយការបិទនោះគឺដើម្បីបង្ខំឲ្យភាគីថៃចូលខ្លួនដោះស្រាយគោលការណ៍ច្បាប់របស់ប្រទេសកម្ពុជា ។
ទោះជាយ៉ាងណាក៏ដោយ លោក ឌិន ដារ៉ូ បានបញ្ជាក់ថាប្រជាពលរដ្ឋថៃនិយមមកលេងល្បែងកាស៊ីណូនៅលើទឹកដីខ្មែរ គឺនៅតែចេញចូលជាធម្មតាដូចមុន ចំណែកឯប្រជាពលរដ្ឋខ្មែរដែលចេញចូលទៅរកស៊ីឬអូសរទេះក្នុងទឹកដីថៃជិតព្រំដែនក៏នៅតែចេញចូលជាធម្មតាទេ លើកលែងតែក្រុមហ៊ុនថៃប៉ុណ្ណោះដែលចាំបាច់ត្រូវគោរពច្បាប់កម្ពុជា ៕