សមាជិកសភាអាមេរិកចង់ឲ្យមានវត្តមានមេបក្សប្រឆាំងនៅកម្ពុជា
ដោយ សុខ សេរី
2012-02-23
សមាជិកសភាសហរដ្ឋអាមេរិកដែលបញ្ចប់ទស្សនកិច្ចរយៈពេល ១សប្ដាហ៍នៅកម្ពុជា បានឲ្យដឹងថា អ្នកស្រីបានដឹងឮនូវការទាមទារជាច្រើនពីសកម្មជនបក្សប្រឆាំង ចង់ឲ្យមេដឹកនាំ លោក សម រង្ស៊ី វិលចូលក្នុងឆាកនយោបាយវិញសំរាប់ការបោះឆ្នោតនាពេលខាងមុខ។
សមាជិកសភាសហរដ្ឋអាមេរិក អ្នកស្រី នីគី សុងហ្គាស (Niki Tsongas) ធ្វើសន្និសីទកាសែត នារាជធានីភ្នំពេញ នៅថ្ងៃទី២៣ ខែកុម្ភៈ ឆ្នាំ២០១២។
សមាជិកសភាសហរដ្ឋអាមេរិកខាងគណបក្សប្រជាធិបតេយ្យ នៅរដ្ឋម៉ាសាឈូសេត (Massachusetts) គឺអ្នកស្រី នីគី សុងហ្គាស (Niki Tsongas) បានមានប្រសាសន៍ថា វាជារឿងសំខាន់ណាស់ដែលមេដឹកនាំគណបក្សប្រឆាំងមួយត្រូវមានវត្តមានចូលក្នុងឆាកនយោបាយវិញនៅប្រទេសកម្ពុជា ខាងមុខនេះ។
អ្នកស្រីបានមានប្រសាសន៍នៅក្នុងសន្និសីទកាសែតមួយ នៅសណ្ឋាគារសាន់វ៉េ (Sunway) នៅរាជធានីភ្នំពេញ ថ្ងៃទី២៣ ខែកុម្ភៈ ឆ្នាំ២០១២ ថា សំរាប់ប្រទេសមួយដែលប្រកាន់របបប្រជាធិបតេយ្យ គឺជាការសំខាន់ណាស់ត្រូវមានវត្តមានមេដឹកនាំគណបក្សប្រឆាំងដែលត្រូវបញ្ចេញសំឡេង និងមតិនានាឲ្យមហាជនបានដឹងឮ៖ «ខ្ញុំបានរៀនសូត្រយ៉ាងច្រើននៅក្នុងដំណើរទស្សនកិច្ចនេះ។ ខ្ញុំនឹងធ្វើសេចក្ដីថ្លែងការណ៍មួយ បើសិនណាជាការចាំបាច់នៅពេលខ្ញុំវិលត្រឡប់ទៅកាន់រដ្ឋម៉ាសាឈូសេតវិញ»។
តំណាងរាស្ត្រគណបក្ស សម រង្ស៊ី លោក សុន ឆ័យ ដែលបានជួបជាមួយអ្នកស្រី នីគី សុងហ្គាស នៅថ្ងៃទី២២ ខែកុម្ភៈ កន្លងទៅនេះបានមានប្រសាសន៍ថា លោកបានស្នើសុំឲ្យអ្នកស្រីជួយក្រើនរំលឹកដល់មេដឹកនាំប្រទេសកម្ពុជា គោរពសិទ្ធិមនុស្ស និងអនុវត្តតាមលទ្ធិប្រជាធិបតេយ្យឲ្យបានល្អប្រសើរ។
លោក សុន ឆ័យ៖ «យើងលើកអំពីតួនាទីរបស់គណបក្សប្រឆាំង ដែលមកទល់ថ្ងៃនេះមានការគាបសង្កត់នយោបាយហ្នឹងកាន់តែធ្ងន់ធ្ងរឡើង។ អ្នកតំណាងរាស្ត្រត្រូវបានគេកាត់បន្ថយស្ទើរតែមិនមានលទ្ធភាពបំពេញតួនាទីបាន មេបក្សត្រូវបានគេធ្វើទុកបុកម្នេញមិនអាច នៅដឹកនាំគណបក្សបាន ហើយចំណុចទាំងនេះអ្នកស្រីបានយកចិត្តទុកដាក់»។
មេដឹកនាំគណបក្ស សម រង្ស៊ី គឺលោក សម រង្ស៊ី កំពុងរស់នៅនិរទេសខ្លួននៅប្រទេសបារាំង តាំងពីចុងឆ្នាំ២០០៩ កន្លងមក នៅមុនពេលតុលាការខេត្តស្វាយរៀង បានកាត់ទោសកំបាំងមុខឲ្យលោកជាប់គុកចំនួន ២ឆ្នាំ នៅខែមករា ឆ្នាំ២០១០ កន្លងទៅ ក្រោមបទរើសអើងពូជសាសន៍ និងដកតម្រុយបង្គោលព្រំដែនរវាងកម្ពុជា-វៀតណាម លេខ ១៨៥ នៅភូមិកោះក្បានកណ្តាល ឃុំសំរោង ស្រុកចន្ទ្រា ខេត្តស្វាយរៀង នៅថ្ងៃទី២៥ ខែតុលា ឆ្នាំ២០០៩ កន្លងទៅ។
ក្រោយមកទៀតនៅថ្ងៃទី២៣ ខែកញ្ញា ឆ្នាំ២០១០ កន្លងទៅ សាលាដំបូងរាជធានីភ្នំពេញ បានកាត់ទោសកំបាំងមុខឲ្យលោក សម រង្ស៊ី ជាប់គុក ១០ឆ្នាំទៀត ក្រោមបទបរិហារកេរ្តិ៍រដ្ឋមន្ត្រីក្រសួងការបរទេសកម្ពុជា លោក ហោ ណាំហុង ជាឧបនាយករដ្ឋមន្ត្រី។
គណៈកម្មាធិការជាតិរៀបចំការបោះឆ្នោត គ្រោងរៀបចំការបោះឆ្នោតជ្រើសក្រុមប្រឹក្សាឃុំ សង្កាត់ នៅថ្ងៃទី៣ ខែមិថុនា ឆ្នាំ២០១២ ខាងមុខនេះ និងបោះឆ្នោតសកលនៅឆ្នាំ២០១៣ ខាងមុខ។ សកម្មជនគណបក្ស សម រង្ស៊ី ចង់ឲ្យលោក សម រង្ស៊ី វិលចូលឆាកនយោបាយវិញនៅប្រទេសកម្ពុជា។
នៅមុនការបោះឆ្នោតនោះឈានមកដល់ ក្រុមប្រតិកម្មរហ័សនៃទីស្ដីការគណៈរដ្ឋមន្ត្រី បានប្រកាសថា មានសមាជិកជាន់ខ្ពស់គណបក្ស សម រង្ស៊ី ចំនួន ១៧នាក់ នៅខេត្តកំពង់ចាម បានចុះចូលជាមួយគណបក្សប្រជាជនកម្ពុជា ដោយសារតែអស់ជំនឿលើគណបក្ស សម រង្ស៊ី ដោយបានចោទថា គ្មានគោលនយោបាយច្បាស់លាស់ និងប្រឆាំងផ្កាប់មុខ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។
អត្ថបទដែលទាក់ទង
កិច្ចប្រជុំអាស៊ានលើបញ្ហាជម្លោះសមុទ្រចិនទទួលបានលទ្ធផលវិជ្ជមាន
បក្សនរោត្តមរណឫទ្ធិនិងហ៊្វុនស៊ិនប៉ិចព្រមព្រៀងរួបរួមជាបក្សតែ១
មន្ត្រីបក្សប្រឆាំងគ្រោងលើកបញ្ហារំលោភសិទ្ធិមនុស្សជាមួយមន្ត្រីអាមេរិក
រដ្ឋាភិបាលគ្រោងបញ្ជូនជនជាតិចិនតៃវ៉ាន់៤៩នាក់ទៅចិនវិញ
លោក ហ៊ុន សែន ព្រមានមិនឲ្យប្រើព្រះនាមសម្ដេចឪមកឃោសនាបោះឆ្នោត
ពលរដ្ឋត្រូវគេរើសអើងមិនឲ្យបោះឆ្នោតក្រោយពីបណ្ដេញចេញ
បក្សសមរង្ស៊ីបដិសេធព័ត៌មានថាសមាជិកខ្លួនជាង៦ពាន់នាក់ចុះចូលបក្សប្រជាជន
ពលរដ្ឋនិយាយអំពីអំណាចនិងតួនាទីរបស់មេឃុំ-ចៅសង្កាត់បច្ចុប្បន្ន
គណបក្សមិនកាន់អំណាចតវ៉ាថា ការប្រជុំរបស់ខ្លួនត្រូវរំខាន
លោក ហ៊ុន សែន ប្រកាសជាថ្មីទៀតថាមិនឲ្យនរណាម្នាក់ស្លាប់ដោយអត់បាយ
មតិ
Click here to add your own comment