ប្រជាពលរដ្ឋមានលំនៅឋាននៅស្រុកគងពិសី បានអះអាងប្រហាក់ប្រហែលគ្នាថា មន្ត្រីកងរាជអាវុធហត្ថស្រុកគងពីសី និងមន្ត្រីកងរាជអាវុធហត្ថខេត្ត បានប្រព្រឹត្តិអំពើពុករលួយ ដោយបានយកប័ណ្ណ ដែលគ្រូពេទ្យកងទ័ពជើងទឹកអាមេរិកឲ្យយកទៅចែកជូនពលរដ្ឋ យកទៅលក់។
តំណាងពលរដ្ឋម្នាក់ឈ្មោះ ជុំ ជឿន រស់នៅឃុំព្រៃញាតិ ស្រុកគងពិសី ស្ថិតក្នុងចំណោមពលរដ្ឋច្រើននាក់ទៀត មានប្រសាសន៍ឲ្យវិទ្យុអាស៊ីសេរីដឹងនៅថ្ងៃទី២៧ ខែមិថុនាថា មន្ត្រីកងរាជអាវុធហត្ថ ដែលទទួលបន្ទុកចែកប័ណ្ណជូនពលរដ្ឋ បានយកប័ណ្ណទៅលក់ជូនពលរដ្ឋក្នុងមួយសន្លឹកចាប់ពី ៣ពាន់ រហូតដល់ ៥ពាន់រៀល ជាថ្នូរទទួលបានប័ណ្ណមួយសន្លឹក ដើម្បីបើកថ្នាំ។
បុរសឈ្មោះ ជុំ ជឿន មានប្រសាសន៍ដូច្នេះ ៖ «លក់មួយសន្លឹកបីពាន់ បួនពាន់ ប្រាំពាន់ តាមដូចថា អ្នកណាចង់បានពេកទៅ ប្រាំពាន់ ឬបីពាន់ បួនពាន់អ៊ីចឹងទៅ ប៉េអិមស្រុកគងពិសី»។
ពលរដ្ឋឲ្យដឹងថា ក្រុមគ្រូពេទ្យអាមេរិកបានចុះពិនិត្យព្យាបាល និងចែកថ្នាំជូនពលរដ្ឋ នៅខេត្តកំពង់ស្ពឺ នៅឃុំវាល ឃុំពេជ្រមុនី និងឃុំដើមរកា ស្ថិតក្នុងស្រុកគងពិសី ចាប់ពីដើមសប្ដាហ៍នេះមកម្ល៉េះ។ ប៉ុន្តែបេសកកម្មនេះ បានកើតមានភាពមិនប្រក្រតីជាច្រើន កើតពីមន្ត្រីកងរាជអាវុធហត្ថទទួលបន្ទុកចែកប័ណ្ណទទួលថ្នាំពេទ្យទៅវិញ។
លោក យស់ សាង មេបញ្ជាការកងរាជអាវុធហត្ថស្រុកគងពិសី នៅព្រឹកថ្ងៃទី២៧ ខែមិថុនានេះ បានបដិសេធមិនធ្វើអត្ថាធិប្បាយជុំវិញការចោទប្រកាន់របស់ពលរដ្ឋនោះទេ ប៉ុន្តែលោកបានបង្វែរសំណួរឲ្យវិទ្យុអាស៊ីសេរី សួរទៅថ្នាក់លើរបស់ខ្លួន នៅខេត្តកំពង់ស្ពឺវិញ។
លោក យស់ សាង មានប្រសាសន៍ ៖ «អាហ្នឹងខ្ញុំអត់ដឹងទេបង ទាល់តែទាកទងមេ ខ្ញុំអត់បំភ្លឺរឿងហ្នឹងទេបង»។
វិទ្យុអាស៊ីសេរី មិនអាចទំនាក់ទំនងមេបញ្ជាការកងរាជអាវុធហត្ថខេត្តកំពង់ស្ពឺ ដើម្បីបំភ្លឺជុំវិញការចោទប្រកាន់ ដែលថា មន្ត្រីកងរាជអាវុធហត្ថ បានប្រព្រឹត្តិអំពើពុករលួយ លក់ប័ណ្ណបើកថ្នាំពីក្រុមគ្រូពេទ្យមនុស្សធម៌អាមេរិកបានទេ។
ទោះយ៉ាងនេះក្ដី លោក ជុំ ជឿន ពលរដ្ឋនៅខេត្តកំពង់ស្ពឺ បានអំពាវនាវដល់ស្ថាប័នថ្នាក់លើ ឬក៏រាជរដ្ឋាភិបាលទប់ស្កាត់ ឬបើកការស៊ើបអង្កេតបន្ទាន់មួយ លុបបំបាត់អំពើពុករលួយកើតពីការចែកប័ណ្ណ ប្រព្រឹត្តិដោយមន្ត្រីកងរាជអាវុធហត្ថខេត្តកំពង់ស្ពឺ ឲ្យបានទាន់ពេល ដើម្បីរក្សាមុខមាត់ប្រទេស។
លោក ជុំ ជឿន ពលរដ្ឋនៅខេត្តកំពង់ស្ពឺ មានប្រសាសន៍បន្ថែមដូច្នេះ ៖ «ចង់ឲ្យលុបបំបាត់មន្ត្រីរាជការ ដែលកាន់អំណាច ការពារប្រជាពលរដ្ឋ ទៅធ្វើអំពើពុករលួយ កេងប្រវ័ញ្ចញើសឈាមរបស់ប្រជាពលរដ្ឋ។ យកប័ណ្ណដើរលក់យកកម្រៃបន្តិចបន្តួចហ្នឹង បំពានទៅលើច្បាប់។ បំបាត់អំពើហ្នឹង ខ្ញុំស្អប់ណាស់អំពើហ្នឹង»។
លោក ជ្រា វណ្ណប្ញទ្ធិ មន្ត្រីព័ត៌មានស្ថានទូតសហរដ្ឋអាមេរិកប្រចាំកម្ពុជា មានប្រសាសន៍ថា អំពើពុករលួយ កើតពីការចែកប័ណ្ណជូនពលរដ្ឋ ដើម្បីទទួលថ្នាំពេទ្យ ពីគ្រូពេទ្យអាមេរិក នៅខេត្តកំពង់ស្ពឺ ស្ថានទូតនៅមិនទាន់ទទួលបាននៅឡើយទេស។ ប៉ុន្តែករណីនេះ លោកនឹងផ្ដល់ព័ត៌មានទៅមន្ត្រីទទួលខុសត្រូវស្ថានទូត បើកការស៊ើបអង្កេតជាបន្ទាន់មួយ។
តបតាមការអញ្ជើញ របស់រដ្ឋាភិបាលកម្ពុជា នាវាមន្ទីរពេទ្យអាមេរិក ឈ្មោះ USNS Mercy បានមកដល់ប្រទេសកម្ពុជា នៅថ្ងៃទី១៥ ខែមិថុនា ដើម្បីធ្វើទស្សនកិច្ច និងសហប្រតិបត្តិការជាមួយរដ្ឋាភិបាលកម្ពុជា ក្នុងគម្រោងផ្នែកវិស្វកម្មសំណង់ និងសុខាភិបាល ក្នុងភាពជាដៃគូនៅតំបន់ប៉ាស៊ីហ្វិក សម្រាប់ឆ្នាំ២០១០។
ស្ថានទូតអាមេរិកប្រចាំទីក្រុងភ្នំពេញឲ្យដឹងថា ដំណើរទស្សនកិច្ចនាវាពេទ្យ USNS Mercy មកកម្ពុជា ក្រុមគ្រូពេទ្យអាមេរិក បានចុះជួយពិនិត្យព្យាបាលជំងឺជូនពលរដ្ឋខ្មែរ ប្រមាណ ៦ខេត្ត-ក្រុង នៅទូទាំងប្រទេស ក្នុងនោះមានខេត្តកំពង់ស្ពឺផងដែរ៕