ការប្រារព្ធពិធីបុណ្យពិសាខបូជាអន្តរជាតិនៅរដ្ឋកាលីហ្វ័រញ៉ា

ដោយ ម៉ៅ សុធានី

2008-05-12

ពិធីបុណ្យពិសាខបូជាអន្តរជាតិមួយ ត្រូវបានប្រារព្ធធ្វើនៅក្នុងវត្តខេមរង្សីខ្មែរក្រោម នៃទីក្រុងសាន់ហូស្សេ រដ្ឋកាលីហ្វ័រញ៉ា ក្នុងសហរដ្ឋអាមេរិក ។

នៅក្នុងវត្តខេមរង្សីខ្មែរក្រោមនៃទីក្រុងសាន់ហូស្សេ រដ្ឋកាលីហ្វ័រញ៉ា ក្នុងសហរដ្ឋអាមេរិក ព្រះភិក្ខុបញ្ញាបជោតោ ថាច់ ប៊ីរុង ព្រះសង្ឃនាយករងនៃសហព័ន្ធខ្មែរក្រោមបានមានថេរដីកាថាពិធីបុណ្យពិសាខបូជាអន្តរជាតិមួយ បានប្រារព្ធមកដល់ថ្ងៃទី៣ហើយនៅថ្ងៃអាទិត្យនេះ ដែលត្រូវនឹងព្រលឹមថ្ងៃច័ន្ទម៉ោងនៅប្រទេសកម្ពុជា ។

ព្រះភិក្ខុបញ្ញាបជោតោ ថាច់ ប៊ីរ៉ុង បានមានថេរដីកាថា ៖ «បុណ្យពិសាខបូជាអន្តរជាតិដែលរៀបចំដោយពុទ្ធិកសមាគមខ្មែរក្រោមវត្តខេមរង្សី នាថ្ងៃទី ៣ ។ ថ្ងៃទី១ យើងរៀបចំពុទ្ធាភិសេក ថ្ងៃទី២ បានធ្វើបូជានៅបូជនីយដ្ឋានកន្លែងព្រះអង្គប្រសូត ហើយថ្ងៃនេះយើងដង្ហែប្រទក្សិណបូជនីយដ្ឋានទាំង៤ និងនមសិកាដើម្បីឧទ្ទិសកុសលរកសុខសន្តិភាពពិតដល់សង្គមជាតិខ្មែរយើងទូទៅ និងសុខសន្តិភាព សេរីភាពដ៏ល្អប្រពៃចំពោះគណៈពុទ្ធសាសនានៅឯកម្ពុជាក្រោម ក៏ដូចជាប្រជានុរាស្រ្តរាប់លាននាក់ ព្រះសង្ឃរាប់ម៉ឺនអង្គ ដែលកំពុងស្ថិតនៅទឹកដីកម្ពុជាក្រោម បាត់បង់នូវសិទ្ធីសេរីភាពនៃការជឿនូវព្រះពុទ្ធសាសនានោះ គឺសូមឧទ្ទិសមហាកុសលនេះជូន និងប្រគេនដល់ព្រះថេរានុថេរៈគ្រប់ព្រះអង្គ ក៏ដូចជាពពួកពុទ្ធបរិស័ទទាំងចតុទិសនៅក្នុងមាតុភូមិជាទីស្នេហាយើងឲ្យបានសុខសន្តិភាព និងមានសាមគ្គីភាព ឯកភាពល្អប្រពៃ ក្រោមការការពារវប្បធម៌ អក្សរសាស្រ្ត ព្រលឹងជាតិ និងព្រពៃណីរបស់ខ្មែរយើងនៅកម្ពុជាក្រោមដែរ» ។

ព្រះបញ្ញាបជោតោ ថាច់ ប៊ីរុង ឲ្យដឹងទៀតថា មានវត្តមានព្រះសង្ឃជាមហាថេរៈជាតិនិងអន្តរជាតិជាច្រើនព្រះអង្គ និមន្តចូលរួមក្នុងពិធីដ៏ឱឡារិកនេះ ៖ «មហាថេរៈសាស្រ្តាចារ្យដែលបង្រៀននៅសកលវិទ្យាល័យ... ប្រទេសស្រីលង្កា គឺ... ដែលបាននិមន្តមក ហើយនិងអាចារ្យវិបស្សនាកម្មដ្ឋាន មហាអាចារ្យកែវ ដែលជាជនជាតិលាវបាននិមន្តមកចំនួន ៥ ព្រះអង្គ ហើយនិងមហា... ដែលជាមេគណនៅខ្មែរសុរិន្ទទឹកដីមាតុភូមិខ្មែរយើង ដែលជាអធិបតីនៃពិធីបុណ្យនេះផ្ទាល់ក៏បាននិមន្តមក ។ ហើយព្រះអង្គមហាបរិញ្ញាផ្នែកទស្សនវិជ្ជា ពុទ្ធសាសនាជានិស្សិតជំនាន់ទី២ ចប់នៅពុទ្ធិកវិទ្យាល័យព្រះសីហនុរាជ្យ គឺព្រះអង្គ ថាច់ ភឿង ដែលជាព្រះចៅអធិការវត្តនៃរដ្ឋ... ក៏បាននិមន្តមក ហើយនិងមានមហាភារៈដែលជាជនជាតិថៃ បាននិមន្តមក និងមហាភារៈនៃជនជាតិភូមាក៏បាននិមន្តមកជាអធិបតីនៅក្នុងពិធីបុណ្យនេះផងដែរ» ។

ឧបាសិកា ជូលីជា មានប្រសាសន៍ដោយក្តីរំភើបថា គឺជាឱកាសដ៏នក្ខត្តឫក្ស ដែលប្រជាពុទ្ធបរិស័ទខ្មែរបានមកជួបជុំគ្នានាពេលនេះ ៖ «កន្លែងហ្នឹងធំដូចសាលារៀន ហើយដែលមានព្រះសង្ឃចំនួន ២២ព្រះអង្គកម្រមានណាស់ ព្រោះនៅស្រុកនេះទាល់តែនិមន្តច្រើនកន្លែង បានៗ២២ព្រះអង្គហ្នឹង ។ ខ្ញុំមានចិត្តសោមនស្សរីករាយណាស់ដែលបាន ព្រោះមិនងាយទេមកនៅស្រុកនេះដែលបានព្រះសង្ឃដ៏ច្រើន ហើយមកធ្វើបុណ្យគឺថាមានសទ្ធាជ្រះថ្លាខ្លាំងណាស់ ។ នេះធ្វើឲ្យខ្ញុំនឹកឃើញពីប្រទេសកម្ពុជាដូចថាកាលនៅពីក្មេង ធ្លាប់ទៅពិធីបុណ្យជាមួយលោកឪពុក អ្នកម្ដាយខ្ញុំ ហើយធ្វើឲ្យខ្ញុំនឹកឃើញស្រុកទេស ព្រះពុទ្ធសាសនាយើងបានគង់វង្ស រុងរឿងដល់ពុទ្ធសាសនិកជនគាំទ្រ សប្បាយរីករាយ ហើយស្លៀកពាក់ខោអាវតាមទំនៀមទម្លាប់ប្រពៃណី ហើយអស់លោកមកនេះ អញ្ជើញមកធ្វើបុណ្យ ហើយមានសទ្ធាជ្រះថ្លា នឹងព្រះពុទ្ធសាសនា» ។

សូមរំឭកថាពិធីបុណ្យពិសាខបូជា បានត្រូវអនុម័តដោយអង្គការសហប្រជាជាតិកាលពីថ្ងៃ១៥ ខែធ្នូ ឆ្នាំ១៩៩៩ ដោយបានចាត់ទុកថាទិវាវិសាខបូជានេះជាថ្ងៃបុណ្យអន្តរជាតិ ។ ក្នុងទិវាវិសាខបូជានេះ ប្រជាពុទ្ធបរិស័ទទូទាំងពិភពលោក មូលមតិគ្នារំឭកដល់ព្រឹត្តិការណ៍សំខាន់៣ ដែលបានកើតឡើងក្នុងថ្ងៃ១៥កើតខែពិសាខ ដូចគ្នាទាក់ទងនឹងប្រវត្តិរបស់ព្រះពុទ្ធ ព្រះសមណ គោត្តម ដែលជាមេដឹកនាំនៃព្រះពុទ្ធសាសនា ។

ព្រឹត្តិការណ៍សំខាន់ទាំងបីនោះគឺការប្រសូតចាកគភ៌ព្រះមាតានៃព្រះសិទ្ធត្ថកុមារ ដែលជាតួព្រះពុទ្ធព្រះអង្គ ការបានត្រាស់ដឹងនូវសម្មាសម្ពោធិញ្ញាណរបស់ព្រះពុទ្ធព្រះអង្គ និងការយាងចូលព្រះបរិនិព្វាន ពោលគឺថ្ងៃអស់ជិវិតនៃតួព្រះពុទ្ធព្រះអង្គនោះ ៕

បោះពុម្ព អ៊ីម៉េល