លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍ប្រាប់កាសែតភ្នំពេញប៉ុស្តិ៍ថា វ៉ាក់សាំងចំនួន៣០ម៉ឺនដូសនេះមិនគ្រប់គ្រាន់សម្រាប់សេចក្តីត្រូវការរបស់ប្រជាពលរដ្ឋខ្មែរទូទាំងប្រទេសទេ ប៉ុន្តែដោយសារតែកម្ពុជាទទួលបានវ៉ាក់សាំងនេះមានកម្រិតតិចតួច ក្រសួងសុខាភិបាលនឹងធ្វើការចែកចាយចាក់ថ្នាំជូនដល់អ្នកដែលងាយទទួលរងគ្រោះខ្លាំងនិងការឆ្លងនិងកើតជំងឺគ្រុនផ្តាសាយថ្មី A(H1N1)នេះ ដែលក្នុងនោះមានបុគ្គលិកសុខាភិបាល ស្ត្រីមានផ្ទៃពោះ និងកូនក្មេងដែលមានអាយុចន្លោះពី៦ខែដល់២ឆ្នាំ។
លោក ម៉ម ប៊ុនហេង មានប្រសាសន៍បន្តថា ប្រសិនបើលោកអ្នកមានរោគសញ្ញាដូចជាគ្រុនក្តៅខ្លួនខ្លាំង ដែលកម្ដៅឡើងលើសពី៣៨អង្សារ ក្អក ឈឺក្បាល ឈឺសាច់ដុំ ឈឺបំពង់ក ហើយនិងហៀរសម្បោរ លោកអ្នកអាចទូរស័ព្ទចូលទៅខ្សែសង្គ្រោះបន្ទាន់ដែលមានលេខ ០១២ ៤៨៨ ៩៨១ និង ០៨៩ ៦៦៩ ៥៦៧៕