ក្រុមប្រជាពលរដ្ឋដែលរងគ្រោះដោយការបណ្តេញដោយបង្ខំបានអះអាងថា មិនមានការជូនដំណឹងឲ្យពួកគាត់បានដឹងជាមុននោះទេ ហើយពួកគាត់បានតវ៉ាឲ្យមានការសងឬដោះដូរមួយដែលសមរម្យដែលអាចទទួលយកបាន។
អ្នកស្រី ស្រេង សុងលីន ជាប្រជាពលរដ្ឋម្នាក់ដែលផ្ទះរបស់គាត់ត្រូវសមត្ថកិច្ចយកគ្រឿងចក្រឈូសឆាយនោះបានថ្លែងដោយការខកចិត្តថា ៖ «ឥឡូវជិតអស់ផ្ទះហើយ គាត់ឈូសតាំងពីព្រឹកមកម៉្លេះ។ អត់ទាមទារចង់បានអីទេ ព្រោះដីខ្ញុំ៣៥ម៉ែត្រ ខ្ញុំសុំថា ៥ម៉ែត្រក៏ខ្ញុំនៅដែរ ខ្ញុំអត់មានតវ៉ាឈ្លោះរឿងរ៉ាវ ចង់បានលុយ ចង់បានកាក់អីទេ នៅសល់៥ម៉ែត្រហ្នឹងគាត់អត់ឲ្យខ្ញុំនៅទៀត។ និយាយទៅ និយាយមួយម៉ាត់ថា យកឬមិនយកហី? គាត់អត់ឲ្យខ្ញុំតវ៉ាអីទាំងអស់»។
ក្រុមប្រជាពលរដ្ឋដែលមានផ្ទះត្រូវសមត្ថកិច្ចឈូសឆាយនោះបានថ្លែងថា ពួកគាត់មិនក្រាញននៀលឬប្រឆាំងក្នុងការអភិវឌ្ឍរបស់រដ្ឋាភិបាលឡើយ ប៉ុន្តែសុំឲ្យរដ្ឋាភិបាលដោះស្រាយនិងគិតគូរពីការរស់នៅរបស់ប្រជាពលរដ្ឋនិងការសិក្សារបស់ក្មេងៗនោះផង។
តាមការឲ្យដឹងពីប្រជាពលរដ្ឋ អាជ្ញាធរបានផ្តល់ដីទំហំ៤ម៉ែត្រគុណនឹង៦ម៉ែត្រនៅឯសង្កាត់បឹងទំពន់ ខណ្ឌមានជ័យ ជាការដោះដូរ។
មន្ត្រីនៃសាលាក្រុងភ្នំពេញនៅមិនទាន់អាចទាក់ទងដើម្បីសុំការបំភ្លឺក្នុងករណីឈូសឆាយផ្ទះប្រជាពលរដ្ឋដើម្បីអភិវឌ្ឍជារង្វង់មូលនៅខាងកើតស្ពានជ្រោយចង្វានោះទេ។ ចំណែកឯចៅសង្កាត់ជ្រោយចង្វាក៏មិនអាចទាក់ទងបានដែរ។
មន្ត្រីនៃក្រុមប្រឹក្សាសង្កាត់ជ្រោយចង្វាដែលសុំមិនបញ្ចេញឈ្មោះបានថ្លែងថា នេះគឺជាគម្រោងរបស់សាលាក្រុងភ្នំពេញក្នុងការសាងសង់រង្វង់មូលដើម្បីបញ្ចៀសការកកស្ទះចរាចរណ៍នោះ។
ចំណែកឯមន្ត្រីស៊ើបអង្កេតនៃអង្គការលីកាដូបានថ្លែងថា ក្នុងពេលឈូសឆាយផ្ទះស្ទើតែមានអំពើហិង្សារវាងប្រជាពលរដ្ឋនិងសមត្ថកិច្ចទៅហើយ។ មន្ត្រីស៊ើបអង្កេតនៃអង្គការដដែលបានថ្លែងថា ការអភិវឌ្ឍត្រូវតែគិតគូរដល់ប្រជាពលរដ្ឋនិងសងសំណងសមរម្យដែលអាចទទួលយកបានទាំងសងខាង៕