ហេតុការណ៍គ្រោះថ្នាក់ចរាចរណ៍នេះ បានកើតមានឡើងនៅលើផ្លូវជាតិលេខ៥ ស្ថិតក្នុងចំណុច ឃុំអន្លង់វិល ស្រុកសង្កែ កាលពីវេលាម៉ោងជាង ១០ព្រឹក ថ្ងៃទី១៥ ខែមេសា នេះ ចំថ្ងៃបង្ហើយនៃពិធីបុណ្យចូលឆ្នាំប្រពៃណីជាតិខ្មែរ។
គ្រោះថ្នាក់នេះបានបង្កឡើងដោយសាររថយន្តក្រុងរបស់ក្រុមហ៊ុនកាពីតូលទេសចរណ៍ និងម៉ូតូបីគ្រឿង។ មន្ត្រីប៉ូលិសចរាចរណ៍ដែលចុះទៅវាស់វែងនៅកន្លែងកើតហេតុ បានថ្លែងថា គ្រោះថ្នាក់ចរាចរណ៍នេះបណ្ដាលមកពីការបើកបរមានល្បឿនលឿន៖ «ស្លាប់ ៥នាក់ ម៉ូតូបីគ្រឿង។ អានេះឡានក្រុងបុកពីក្រោយចំ ព្រោះវាមកស្របទិសគ្នា ចំណែកឯម៉ូតូពីរគ្រឿងប៉ះដៃគ្នា ប៉ះដៃគ្នាទៅ ឡានក្រុងបុកបញ្ជូនមកវិញ បញ្ជូនឡានក្រុងបួងចង្កូតគេចមកបុកអានេះមួយទៀតរបួសបីនាក់»។
នៅកន្លែងកើតហេតុគេសង្កេតឃើញមានម៉ូតូបីគ្រឿងរងការខូចខាតទាំងស្រុង។ ចំណែកសាកសពមនុស្សខ្លះមានជាប់នៅក្រោមរថយន្ត និងសាកសពខ្លះទៀត ត្រូវរថយន្តកិនបែកក្បាលដាច់ក ធ្លាយខួរ ធ្លាយពោះវៀន មានឈាមក្រហមប្រឡាក់ពេញលើផ្លូវថ្នល់។ ហ្វូងអ្នកដំណើរជាច្រើនដែលបានធ្វើដំណើរកម្សាន្តឆ្លងកាត់កន្លែងគ្រោះនោះបានសម្ដែងការភ័យរន្ធត់យ៉ាងខ្លាំង។
ក្រៅពីសាកសពគេឃើញមានម៉ូតូមួយគ្រឿងជាប់នៅក្រោមរថយន្តក្រុងរបស់ក្រុមហ៊ុនកាពីតូលទេសចរណ៍នោះ ដែលជ្រុលចង្កូតធ្លាក់ពីលើចិញ្ចើមថ្នល់ទៅក្នុងប្រឡាយទឹក៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។