អង្គភាពប្រឆាំងអំពើពុករលួយ កាលពីថ្ងៃទី៨ ខែឧសភា ឆ្នាំ២០១២ បានបើកសន្និសីទមួយស្ដីពីការលុបបំបាត់ការទារយកប្រាក់កម្រៃលើសេវាសាធារណៈ នៅតាមឃុំ-សង្កាត់ ឬលុបបំបាត់លុយសំណូកក្រោមតុ ដែលកំពុងកើតមានសព្វថ្ងៃនេះ។
នៅក្នុងសន្និសីទនោះ លោក ឆាយ សាវុធ អនុប្រធានអង្គភាពប្រឆាំងអំពើពុករលួយ បានអំពាវនាវឲ្យមានការចូលរួមពីសំណាក់មហាជនទូទៅ ដើម្បីទប់ស្កាត់ការទារយកប្រាក់លើសេវាសាធារណៈនៅថ្នាក់ឃុំសង្កាត់។
លោកថា ការប្រឆាំងអំពើពុករលួយមិនអាចធ្វើទៅបានទេ បើសិនអង្គភាពនេះធ្វើតែម្នាក់ឯងនោះ ចាំបាច់ត្រូវមានការចូលរួមពីមជ្ឈដ្ឋានទូទៅ៖ «ការយកប្រាក់កម្រៃខុសច្បាប់នេះ ធ្វើតែលើអង្គភាពប្រឆាំងអំពើពុករលួយមួយ ក៏មិនអាចធ្វើបានដែរ ទាល់តែយើងចូលរួមទាំងអស់គ្នា។ ការចូលរួមទាំងអស់គ្នានេះហើយបានយើងអំពាវនាវឲ្យមានការចូលរួមពីសំណាក់សង្គមស៊ីវិល មាន NGO មានគណបក្សនយោបាយនានា ដើម្បីចូលរួមតាមរយៈការចុះ MOU ជាមួយគ្នា»។
លោក ព្រាប កុល ប្រធានអង្គការតម្លាភាពកម្ពុជា មានប្រសាសន៍ថា វាជាការបោះជំហានទៅមុខមួយជំហានទៀតរបស់រដ្ឋាភិបាល ដើម្បីទប់ស្កាត់អំពើពុករលួយ។ ដំណឹងនេះល្អសម្រាប់សង្គមស៊ីវិលដើម្បីធ្វើការពិចារណា៖ «បានបើកទ្វារឲ្យសង្គមស៊ីវិល និងគណបក្សនយោបាយនានា ចូលរួមចំណែកក្នុងការអនុវត្ត និងឃ្លាំមើលដំណើរការនូវគំនិតផ្ដួចផ្ដើមថ្មីនេះឲ្យមានប្រសិទ្ធភាព។ ខ្ញុំលើកទឹកចិត្តឲ្យសង្គមស៊ីវិលពិចារណានូវឱកាស និងចូលរួមចំណែកធ្វើយ៉ាងណាឲ្យការអនុវត្តវិធានការថ្មីមានប្រសិទ្ធភាព ពីព្រោះអីការទប់ស្កាត់ការសូកប៉ាន់ ឬក៏ទទួលប្រាក់កម្រៃជើងសាផ្សេងៗនេះ បានជះឥទ្ធិពលអវិជ្ជមាន និងធ្វើឲ្យប៉ះពាល់ដល់ជីវភាពរបស់ប្រជាពលរដ្ឋ អ៊ីចឹងជាការបោះជំហានយ៉ាងល្អប្រសើរមួយ ហើយយើងខ្ញុំស្វាគមន៍ចំពោះការវិវត្តន៍នេះ»។
ដូចគ្នានេះដែរ លោក សន ជ័យ ប្រធានអង្គការអ្នកសម្របសម្រួលបណ្ដាញរួបរួមគណនេយ្យភាពសង្គមប្រចាំអាស៊ីបូព៌ា និងប៉ាស៊ីហ្វិក មានប្រសាសន៍ថា ព័ត៌មាននេះជាចំណុចចាប់ផ្ដើមមួយដែលរដ្ឋាភិបាលផ្ដល់ឱកាសឲ្យមហាជនចូលរួមក្នុងយុទ្ធនាការប្រឆាំងអំពើពុករលួយនេះ៖ «ចំពោះរឿងការយកចិត្តទុកដាក់ទៅលើការយកតំលៃ ទៅលើថ្នាក់ឃុំសង្កាត់ ខ្ញុំគិតថា ជាចំណុចចាប់ផ្ដើមមួយដែលល្អ។ សំខាន់យើងចង់ឲ្យមានការចូលរួមប្រឆាំងអំពើពុករលួយហ្នឹងពីសំណាក់មហាជន គឺប្រជាពលរដ្ឋដែលនៅថ្នាក់មូលដ្ឋានតែម្ដង»។
ប៉ុន្តែលោក សន ជ័យ បន្ថែមថា អំពើពុករលួយមិនមែនមាននៅតែក្នុងថ្នាក់ឃុំ-សង្កាត់នោះទេ គឺមាននៅក្នុងស្ថាប័នប៉ូលិសថ្នាក់មូលដ្ឋានដែរ ហេតុនេះអង្គភាពនេះគួរចាត់វិធានការចំពោះបញ្ហានោះផង៖ «ថ្នាក់ឃុំសង្កាត់គឺជាស្ថាប័ននីតិបុគ្គលមួយ ដែលបោះឆ្នោតដោយប្រជាពលរដ្ឋ អ៊ីចឹងការទារលុយទារកាក់ពីសំណាក់ក្រុមប្រឹក្សាឃុំសង្កាត់ គឺមិនសូវជាអ្វីដែលធំដុំនោះទេ ប៉ុន្តែអ្វីដែលធំដុំនោះ គឺស្ថាប័នប៉ូលិសតែម្ដង ដូចជាការធ្វើសំបុត្រ សៀវភៅស្នាក់នៅ សៀវភៅគ្រួសារអីហ្នឹង គឺមានការទារលុយហ្នឹងមិនមានតាមកំណត់ដោយច្បាប់នោះទេ គឺទារឆៅៗតែម្ដង ហើយយើងក៏ចង់ឲ្យអង្គភាពប្រឆាំងអំពើពុករលួយ ចាត់វិធានការទៅលើបញ្ហានេះផងដែរ ហើយក៏សំណូមពរឲ្យអង្គភាពប្រឆាំងអំពើពុករលួយ ដាក់ការផ្ដល់សេវាសាធារណៈដោយប៉ូលិសហ្នឹង ជារបៀបវារៈមួយសំខាន់ដែរ មិនមែនធ្វើឡើងសម្រាប់តែឃុំសង្កាត់នោះទេ»។
ចំណែកលោក ព្រាប កុល លើកឡើងថា ទោះបីមានការរិះគន់ខ្លះពីមនុស្សមួយចំនួនថា ការបើកឲ្យមានយុទ្ធនាការនេះ ជាការធ្វើឡើងដើម្បីរកសំឡេងឆ្នោតរបស់គណបក្សកាន់អំណាចក៏ដោយ តែយុទ្ធនាការនេះត្រូវបានសង្គមស៊ីវិលសាទរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។