ការប្រកាសឲ្យដឹងអំពីសេចក្តីសម្រេចរបស់អង្គបុរេជំនុំជម្រះបានធ្វើឡើងដោយលោក Lars Olsen មន្រ្តីទំនាក់ទំនងផ្នែកច្បាប់នៃសាលាក្តីខ្មែរក្រហមក្នុងសន្និសីទសារព័ត៌មានមួយកាលពីថ្ងៃពុធ ទី២ ខែកញ្ញា ឆ្នាំ២០០៩។
តាមរយៈលោក រាជ សម្បត្តិ ប្រធានផ្នែកកិច្ចការសាធារណៈសាលាក្តីខ្មែរក្រហម លោក Lars Olsen ថ្លែងដូច្នេះថា ៖ «អ៊ីចឹងហើយនៅក្នុងសេចក្ដីពិចារណារបស់អង្គបុរេជំនុំជម្រះនេះ គឺមានន័យថា សហព្រះរាជអាជ្ញាខាងភាគីអន្តរជាតិហ្នឹង គាត់បានបញ្ជូនដីកាសន្និដ្ឋាន បញ្ជូនឲ្យស៊ើបសួរថ្មីទៅកាន់សហចៅក្រមស៊ើបអង្កេត ដើម្បីបើកការស៊ើបអង្កេតទៅតាមនីតិវិធីនៃច្បាប់»។
លោកស្រី ជា លាង សហព្រះរាជអាជ្ញាជាតិ ដែលធ្លាប់ជំទាស់ទៅនឹងសំណើរបស់សហព្រះរាជអាជ្ញាអន្តរជាតិកន្លងមក ថ្លែងថា សេចក្តីសម្រេចដែលសហព្រះរាជអាជ្ញាអន្តរជាតិស្នើសុំស៊ើបសួរបន្ថែមនេះជាសិទ្ធិរបស់អង្គបុរេជំនុំជម្រះ ៖ «អាស្រ័យទៅលើច្បាប់ យើងអត់អាចធ្វើអីហួសពីច្បាប់ដែលមាន»។
លោក Lars Olsen មន្រ្តីទំនាក់ទំនងផ្នែកច្បាប់ ថ្លែងថា សេចក្តីពិចារណារបស់អង្គបុរេជំនុំជម្រះបានបញ្ជូនទៅសហព្រះរាជអាជ្ញាហើយ។
លោក William Smith សហព្រះរាជអាជ្ញាអន្តរជាតិស្តីទី បញ្ជាក់ថា ខាងការិយាល័យរបស់លោកបានទទួលសេចក្តីសម្រេចនេះហើយ ហើយលោកនឹងអនុវត្តក្នុងពេលឆាប់ៗតាមអ្វីដែលលោក Robert Petit បានស្នើកន្លងមក។
លោក William Smith បានមានប្រសាសន៍ថា ៖ "យើងនឹងស្នើសុំឲ្យមានការស៊ើបសួរក្រុមមនុស្សនិងបទល្មើសជាក់លាក់មួយចំនួនបន្ថែមទៀត ដែលមិននៅក្រោមការស៊ើបអង្កេតបច្ចុប្បន្ន"។
ការខ្វែងគំនិតគ្នារវាងសហព្រះរាជអាជ្ញាជាតិនិងអន្តរជាតិបានកើតមានក្នុងខែធ្នូ ឆ្នាំ២០០៨ ដែលកាលនោះ លោក Robert Petit សហព្រះរាជអាជ្ញាអន្តរជាតិ បានស្នើសុំឲ្យមានការស៊ើបសួរជនសង្ស័យថ្មីបន្ថែមទៀតនៅក្នុងរឿងក្តីខ្មែរក្រហម។ ក៏ប៉ុន្តែសំណើនេះត្រូវលោកស្រី ជា លាង សហព្រះរាជអាជ្ញាជាតិជំទាស់ ដោយសំអាងហេតុផលទាក់ទងនឹងសន្តិសុខនិងស្ថិរភាពសង្គម។
សេចក្តីសម្រេចឲ្យសហព្រះរាជអាជ្ញាអន្តរជាតិមានសិទ្ធិអាចបញ្ជូនដីកាសន្និដ្ឋានឲ្យស៊ើបសួរថ្មីទៅកាន់សហចៅក្រមស៊ើបអង្កេតនេះ ត្រូវលោក Lars Olsen ថ្លែងថាជាដំណោះស្រាយធ្វើឡើងតាមវិធានផ្ទៃក្នុងរបស់សាលាក្តីខ្មែរក្រហមបន្ទាប់ពីអង្គបុរេជំនុំជម្រះប្រកាសថា ខ្លួនមិនអាចរកសំឡេងចៅក្រម៤រូបក្នុងចំណោម៥រូបបាន ដើម្បីសម្រេចលើការខ្វែងយោបល់គ្នានេះ។
លោក Lars Olsen បញ្ជាក់ថា នៅពេលនេះការិយាល័យសហចៅក្រមស៊ើបអង្កេតមិនទាន់បានទទួលដីកាសន្និដ្ឋានឲ្យស៊ើបសួរថ្មីពីសហព្រះរាជអាជ្ញានៅឡើយទេ៕