កិច្ចប្រជុំនេះ គឺដើម្បីឈានទៅដល់ការធ្វើសេចក្ដីព្រាងប្រកាសរួមគ្នា ការពិចារណា និងពិភាក្សាទៅលើឯកសារមួយចំនួន ស្ដីពីសន្តិសុខតំបន់ ដែលកំពុងកើតមានបញ្ហាផ្សេងៗ សម្រាប់ជាគន្លឹះ ដាក់ជូនទៅកិច្ចប្រជុំ ថ្នាក់រដ្ឋមន្ត្រីការពារជាតិអាស៊ាន ដែលនឹងធ្វើឡើងនៅអំឡុងខែឧសភាខាងមុខ។
លោកឧត្ដមសេនីយ៍ នាង ផាត ជារដ្ឋលេខាធិការក្រសួងការពារជាតិ នៃប្រទេសកម្ពុជា គឺជាប្រធាននៃកិច្ចប្រជុំនោះ។ លោកបានថ្លែងសុន្ទរកថា៖ទៅកាន់ក្រុមមន្ត្រីជាន់ខ្ពស់នៃកិច្ចប្រជុំថា៖ការប្រជុំពេលនេះនឹងធ្វើការពិចារណា ពិភាក្សាទៅលើឯកសារសំខាន់ចំនួន២ ព្រមទាំងឯកសារទស្សនទាន ដែលស្នើឡើងដោយអគ្គលេខាធិការដ្ឋានអាស៊ាន ដែលនឹងត្រូវបញ្ជូនទៅក្នុងកិច្ចប្រជុំ ក្រុមរដ្ឋមន្ត្រីការពារជាតិអាស៊ាន នៅខែឧសភាខាងមុខ។ បន្ថែមលើនេះក្រុមមន្ត្រីជាន់ខ្ពស់ នៃក្រសួងការពារជាតិអាស៊ាន ក៏នឹងពិភាក្សាទៅលើបញ្ហាសន្តិសុខសំខាន់ៗ ដែលកំពុងកើតមាន និងកំណត់នូវវិធីសាស្ត្ររួមគ្នា ដើម្បីឆ្លើយតបចំពោះបញ្ហាទាំងនោះ ប្រកបដោយប្រសិទ្ធភាពខ្ពស់ ៖ "ខ្ញុំជឿជាក់យ៉ាងមុតមាំថា ការចូលរួមរបស់ឯកឧត្ដម និងលោកជំទាវ ដើម្បីទទួលបាននូវការពិភាក្សាស្មោះត្រង់ និងការផ្លាស់ប្ដូរទស្សនៈ ស្ដីពីបញ្ហាសន្តិសុខក្នុងតំបន់ និងការចូលរួមបន្ថែមទៀត លើការយោគយល់គ្នាទៅវិញទៅមក និងការពង្រឹងស្ថាប័ន។ ខ្ញុំមានជំនឿជឿជាក់ថា៖ យើងអាចបង្កើតនូវគំនិត និងទស្សនៈទានច្បាស់លាស់ ដើម្បីពង្រឹងឥទ្ធិពលអាស៊ាន ក្នុងការដឹកនាំស្ថាប័ននីតិកម្ម សន្តិសុខក្នុងតំបន់។ ជាថ្មីម្ដងទៀត ខ្ញុំសូមឆ្លៀតឱកាសដ៏នក្ខត្តឫក្សនេះ ដើម្បីថ្លែងអំណរគុណដល់ឯកឧត្ដម អស់លោក លោកស្រី ទាំងអស់ ដែលបានគាំទ្រប្រទេសកម្ពុជា ក្នុងការធ្វើជាប្រធានអាស៊ានក្នុងឆ្នាំនេះ"។
កិច្ចប្រជុំរបស់ក្រុមមន្ត្រីជាន់ខ្ពស់នៃក្រសួងការពារជាតិអាស៊ាន បានបញ្ជាក់ថា៖គេត្រូវការគោលការណ៍ ដែលជាយុទ្ធសាស្ត្ររួមគ្នា ដែលផ្អែកទៅលើកិច្ចសហប្រតិបត្តិការសន្តិសុខ ឱ្យប្រសើរឡើង។
ចាប់ពីថ្ងៃទី២៦ ខែមេសា ក្រុមមន្ត្រីជាន់ខ្ពស់នៃក្រសួងការពារជាតិអាស៊ានទាំង១០ មានគម្រោងនឹងចូលរួមប្រជុំ ជាមួយអាស៊ានបូក៨ ដែលមានប្រទេស ចិន ជប៉ុន កូរ៉េ ឥណ្ឌា អាមេរិក រុស្ស៊ី អូស្ត្រាលី និងនូវែលហ្សេឡង់ ចូលរួមផងដែរ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។