លោក លី សូវ៉ាន់ ជាអនុប្រធាននាយករដ្ឋានគ្រប់គ្រងជំងឺឆ្លងនៃក្រសួងសុខាភិបាលកម្ពុជា បានមានប្រសាសន៍ប្រាប់វិទ្យុអាស៊ីសេរីថា ប្រជាពលរដ្ឋដែលកំពុងតែកើតជំងឺផ្តាសាយ A(H1N1) បានកើនទ្បើងចំនួន៥៤៤ករណីនៅក្នុងសប្តាហ៍នេះ ចំណែកឯប្រជាពលរដ្ឋដែលបានស្លាប់ដោយសារជំងឺនេះគឺមានចំនួន៦នាក់ជាដដែល នៅក្នុងនោះមានប្រុស៣នាក់និងស្រី៣នាក់។
លោកបានមានប្រសាសន៍បញ្ជាក់ថា ថ្នាំវ៉ាក់សាំងចំនួនជាង៣០ម៉ឺនដូស ដែលបានសន្យាដោយអង្គការសុខភាពពិភពលោក (WHO) ដើម្បីបង្ការជំងឺគ្រុនផ្តាសាយA(H1N1) នោះ នឹងអាចត្រូវបានពន្យារមកប្រទេសកម្ពុជា រហូតដល់ខែមករា ឬខែកុម្ភៈ ឆ្នាំ២០១០ គឺដោយសារតែបញ្ហារដ្ឋបាល ការដឹកជញ្ជូននិងការងារបណ្តុះបណ្តាលមន្រ្តីសុខាភិបាលឲ្យយល់ដឹងបចេ្ចកទេសឲ្យបានច្បាស់លាស់ជាមុនសិន ។
លោកបានអះអាងថា ក្រសួងសុខាភិបាលកំពុងតែរៀបចំសំណុំឯកសារបែបបទរដ្ឋបាលដើម្បីពន្លឿនឲ្យបានឆាប់។
នៅពេលណាថ្នាំវ៉ាក់សាំងនោះបានមកដល់ប្រទេសកម្ពុជា គឺក្រសួងសុខាភិបាលមានគម្រោងការចាក់ដោយមិនយកកម្រៃអ្វីទ្បើយចំពោះក្រុមគ្រូពេទ្យដែលធ្វើការងារជិតដិតជាមួយអ្នកជំងឺ A(H1N1) ក្រុមស្រ្តីមានផ្ទៃពោះនិងកុមារមានអាយុ៦ខែដល់២ឆ្នាំ៕