ថ្នាំបង្ការជំងឺគ្រុនផ្តាសាយA(H1N1)នឹងមកដល់កម្ពុជាខែក្រោយ
ដោយ គឹមពៅ
2009-10-21
ប្រភពពីមន្ត្រីសុខាភិបាលបានឲ្យដឹងថា វ៉ាក់សាំងការពារជំងឺគ្រុនផ្តាសាយ A(H1N1) ត្រូវគេរំពឹងថា នឹងមកដល់កម្ពុជានៅខែក្រោយនេះ ក្រោយពីការស្នើសុំរបស់កម្ពុជាទៅអង្គការសុខភាពពិភពលោក។
អ្នកដំណើរពាក់ម៉ាសមុខ ខណៈដើរកាត់ផ្សារមួយ នៅក្នុងរាជធានីភ្នំពេញ កាលពីថ្ងៃ៦ តុលា ២០០៩។
លោក សុខ ទូច ប្រធាននាយកដ្ឋានការពារជំងឺឆ្លងនៃក្រសួងសុខាភិបាលថ្លែងថា គេនៅមិនទាន់ដឹងនៅឡើយថា អង្គការសុខភាពពិភពលោកនឹងផ្តល់ឲ្យកម្ពុជាចំនួនប៉ុន្មាននៅឡើយទេ ប៉ុន្តែយ៉ាងណាក៏ដោយ គេគិតថា នឹងមិនមានចំនួនគ្រប់គ្រាន់សម្រាប់ពលរដ្ឋទាំងអស់គ្នាឡើយ។
លោក សុខ ទូច មានប្រសាសន៍ដូច្នេះ ៖ «តាំងពីថ្ងៃ៣០ ខែមិថុនាមក គឺឯកឧត្ដមរដ្ឋមន្រ្តីលោកបានផ្ញើលិខិតសុំទៅភាគីពាក់ព័ន្ធទាំងអស់នៅក្នុងការផ្គត់ផ្គង់នូវសម្ភារៈបរិក្ខារ ក៏ដូចជាវ៉ាក់សាំងក៏ដោយពីអង្គការសុខភាពពិភពលោក ហើយអង្គការសុខភាពពិភពលោកក៏បានទទួលរួចហើយ។ ថ្មីៗនេះទៀត យើងក៏បានទទួលដំណឹងថា អង្គការសុខភាពពិភពលោកនឹងផ្ដល់វ៉ាក់សាំងមកកម្ពុជាយើង។ យើងកំពុងតែរៀបចំយន្តការក្នុងស្រុក ដើម្បីទទួលនូវវ៉ាក់សាំងទាំងនោះនៅក្នុងខែក្រោយ ប៉ុន្តែចំនួនប៉ុន្មាន ឬមកដល់ពេលណាយើងមិនទាន់ដឹងទេ គេកំពុងរៀបចំនៅឡើយ ដូច្នេះខ្ញុំមិនទាន់បរិយាយបានទេ»។
ការស្នើសុំបានធ្វើឡើងក្រោយពីជំងឺគ្រុនផ្តាសាយប្រភេទថ្មី A(H1N1) បានរីករាលដាលមកដល់កម្ពុជា ដែលមកដល់ពេលនេះអ្នកកើតជំងឺគ្រុនផ្តាសាយ A(H1N1) សរុបចំនួន២០០ករណីហើយ ដែលក្នុងនោះមានមនុស្សចំនួន៣នាក់ស្លាប់ដោយសារតែជំងឺនេះ។
ខេត្តក្រុងទាំងនោះ មានក្រុងភ្នំពេញ កំពង់ស្ពឺ សៀមរាប ស្វាយរៀង តាកែវ កណ្តាល និងបាត់ដំបង ត្រូវគេប្រកាសអំពីការរីករាលដាលនៃជំងឺនេះ។
មន្ត្រីដដែលបង្ហើបថា ថ្វីត្បិតតែរបាយការណ៍ប្រចាំសប្តាហ៍បានបង្ហាញនូវតួលេខកើនឡើងពិតមែន ប៉ុន្តែមិនមានអ្វីធ្ងន់ធ្ងរនៅឡើយ ដែលលោកសុំឲ្យពលរដ្ឋព្យាយាមរក្សាអនាម័យជាប្រចាំ ដើម្បីគេចផុតពីជំងឺនេះ។
លោក សុខ ទូច បានឲ្យដឹងដូច្នេះ ៖ «ជារួមជំងឺផ្លូវដង្ហើមនៅយើងនេះវាមានការកើនឡើង ប៉ុន្តែកើនឡើងមិនមែនគំហុក ឧបមាថា អាទិត្យមុនយើង១៦១ ឥឡូវឡើង៥០០-៦០០នោះទេ។ យើងដាក់គ្រប់មន្ទីរពេទ្យហើយ ដូច្នេះយើងឃើញថា កម្រិតហ្នឹងនៅទាបនៅឡើយទេ។ បើថាឈឺច្រើនគ្រប់គ្នា មិនបានមកធ្វើតេស្ដក៏ដោយ ប៉ុន្តែជំងឺឈឺធ្ងន់គាត់នៅតាមគ្រប់ពេទ្យអស់ហើយ យើងអាចឃើញ ប៉ុន្តែឥឡូវកម្រិតហ្នឹងនៅទាបទេ»។
ជំងឺគ្រុនផ្តាសាយ A(H1N1) ត្រូវបានគេប្រកាសករណីដំបូងបង្អស់នៅកម្ពុជា កាលពីថ្ងៃទី៣០ ខែមិថុនាកន្លងទៅ ចាប់ផ្តើមដោយក្រុមនិស្សិតមួយក្រុម ធ្វើដំណើរមកពីសហរដ្ឋអាមេរិកមកកាន់កម្ពុជា។ មកដល់ពេលនេះ ការចម្លងត្រូវបានក្រុមមន្ត្រីជំនាញអះអាងថា កើតមានឡើងវិលវល់នៅក្នុងស្រុក៕
អត្ថបទដែលទាក់ទង
អ្នកកើតជំងឺផ្ដាសាយA(H1N1)នៅកម្ពុជាកើនដល់៤៤៤នាក់
មន្ត្រីសុខាភិបាល៖ ពលរដ្ឋយកចិត្តទុកដាក់ក្នុងការការពារជំងឺផ្តាសាយថ្មី
មន្ទីរសុខាភិបាលខែត្រសៀមរាបគ្រោងធ្វើយុទ្ធនាការផ្សព្វផ្សាយពីផ្តាសាយថ្មី
សហជីពកម្មករសុំឲ្យអាជ្ញាធរផ្សព្វផ្សាយពីវិធីការពារជំងឺផ្ដាសាយថ្មី
មន្រ្តីសុខាភិបាលបារម្ភពីការឆ្លងនៃជំងឺផ្ដាសាយថ្មីក្នុងពេលអុំទូក
WHOនិងអាជ្ញាធរត្រៀមចែកខិត្តប័ណ្ណអប់រំពីផ្ដាសាយថ្មីក្នុងពិធីបុណ្យអុំទូក
ពលរដ្ឋបារម្ភពីការឆ្លងរាតត្បាតនៃគ្រុនផ្ដាសាយA(H1N1)នៅកម្ពុជា
WHOនិងក្រសួងសុខាភិបាលគ្រោងធ្វើយុទ្ធនាការផ្សព្វផ្សាយពីគ្រុនផ្តាសាយថ្មី
អ្នកស្លាប់ដោយសារគ្រុនផ្ដាសាយ A(H1N1) កើនដល់៣នាក់ហើយនៅកម្ពុជា
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.