ក្រុមគ្រួសារអ្នកផ្ទុកមេរោគអេដស៍ចំនួន២០គ្រួសារក្នុងចំណោម៣១គ្រួសារ ត្រូវបានអាជ្ញាធរឲ្យរើអីវ៉ាន់និងចាកចេញតាមរថយន្តដឹកទំនិញពីផ្ទះសម្បែងដែលពួកគាត់កំពុងតែរស់នៅក្នុងបរិវេណនៃក្រសួងទេសចរណ៍នៅបុរីកីឡាដើម្បីទៅរស់នៅទីកន្លែងថ្មីស្ថិតក្នុងភូមិទួលសំបូរ សង្កាត់ព្រៃវែង ខណ្ឌដង្កោ ចម្ងាយប្រមាណ២០គីឡូម៉ែត្រខាងលិចទីក្រុងភ្នំពេញ កាលពីព្រឹកថ្ងៃព្រហស្បតិ៍ ទី១៨ ខែមិថុនានេះ។
ស្ត្រីម្នាក់ដែលរូបគាត់និងស្វាមីរបស់គាត់ជាអ្នកផ្ទុកមេរោគអេដស៍ គឺអ្នកស្រី តួត ឆៃរ៉ន បានថ្លែងថា ពួកគាត់បានសម្រេចចិត្តចាកចេញទៅកាន់ទីតាំងថ្មីទាំងតក់ក្រហល់ ព្រោះពួកគាត់គ្មានជម្រើស ៖ «ពេលដែលទៅប្រជុំពីម្សិលមិញដល់សាលាក្រុង ជួបឯកឧត្ដម ម៉ាន់ ឈឿន ហ្នឹង គាត់ប្រាប់ថា ២អាទិត្យទៀតបានឲ្យពួកខ្ញុំ ២០គ្រួសារហ្នឹងរើចេញ ស្រាប់ដល់ពេលព្រឹកមិញម៉ោង ៨ព្រឹក គេទូរស័ព្ទមកឲ្យពួកខ្ញុំទៅដល់ខណ្ឌ ស្រាប់តែត្រឡប់ពីខណ្ឌមកវិញគេឲ្យរើចេញតែម្ដង។ អ៊ីចឹងខ្ញុំអត់មានប្រុងប្រយ័ត្នរៀបចំអីសោះ ទៅដោយអត់មានព្រលឹងទេ»។
ទាក់ទិននឹងបញ្ហានេះ រដ្ឋលេខាធិការក្រសួងទេសចរណ៍ លោក សូ ម៉ារ៉ា បានមានប្រសាសន៍ថា នេះមិនមែនជាការឲ្យចាកចេញដោយបង្ខំនោះទេ តែជាការដោះដូរតាមគោលការណ៍ស្ម័គ្រចិត្ត ដោយរដ្ឋាភិបាលបានគិតគូរដល់ប្រជាពលរដ្ឋទាំងនោះជាចម្បងអំពីបញ្ហាសុខភាពនិងសុវត្ថិភាពសម្រាប់ពួកគាត់ខណៈដែលការសាងសង់អគារថ្មីនៃក្រសួងទេសចរណ៍កំពុងតែប្រព្រឹត្ត។
លោក សូ ម៉ារ៉ា មានប្រសាសន៍ដូច្នេះថា ៖ «គឺជាការផ្ទេរលំនៅរបស់បងប្អូនពីកន្លែងតូចចង្អៀត លំបាក នៅក្នុងការដ្ឋានសាងសង់របស់ក្រសួងទេសចរណ៍ ដែលយើងគម្រោងបញ្ចប់នៅថ្ងៃទី២៧ ខែ៩ ជាថ្ងៃបុណ្យទេសចរណ៍ពិភពលោក ហើយយើងនឹងអញ្ជើញអគ្គលេខាធិការអង្គការទេសចរណ៍ពិភពលោកមកធ្វើពិធីសម្ពោធជាមួយថ្នាក់ដឹកនាំរដ្ឋាភិបាល»។
រីឯប្រធានផ្នែកស៊ើបអង្កេតនៃសម្ព័ន្ធខ្មែរការពារសិទ្ធិមនុស្ស លីកាដូ លោក អំ សំអាត បានមានប្រសាសន៍ថា ការដែលអាជ្ញាធរបញ្ជូនអ្នកផ្ទុកមេរោគអេដស៍ឲ្យទៅរស់នៅកន្លែងថ្មី ហាក់ដូចជាយកពួកគាត់បំបរបង់ចោលយ៉ាងដូច្នោះ ៖ «ការជម្លៀសប្រជាពលរដ្ឋ ២០គ្រួសារដែលមានជំងឺចេញពីបុរីកីឡានេះ វាជារឿងមួយដែលប្រជាពលរដ្ឋទាំងអស់ជួបផលវិបាក។ ទី១ លំនៅថ្មីដែលប្រជាពលរដ្ឋទៅរស់នៅហ្នឹង ខ្វះហេដ្ឋារចនាសម្ព័ន្ធ ដូចជាទឹកស្អាតនិងភ្លើង ដែលយើងឃើញជាក់ស្ដែង។ ហើយទីតាំងដែលរស់នៅហ្នឹង គឺមានសភាពជាស័ង្កសី បានន័យថា ក្ដៅសម្រាប់ពួកគាត់ ជាពិសេសពាក់ព័ន្ធនឹងពួកគាត់ដែលកំពុងតែមានរោគដូច្នេះផង គឺវាធ្វើឲ្យប៉ះពាល់ដល់សុខភាពគាត់ខ្លាំងណាស់»។
ជុំវិញបញ្ហានេះ កាលពីថៃ្ងទី៩ ខែមេសាកន្លងទៅ អង្គការលើកលែងទោសអន្តរជាតិ (Amnesty International) បានចេញសេចក្តីថែ្លងការណ៍មួយដោយទទូចសុំឲ្យរដ្ឋាភិបាលកម្ពុជានិងសាលារាជធានីភ្នំពេញបញ្ឈប់ផែនការជម្លៀសក្រុមគ្រួសារអ្នកផ្ទុកមេរោគអេដស៍ទៅកាន់តំបន់ជាយក្រុងព្រោះនៅទីនោះពុំមានហេដ្ឋារចនាសម្ព័ន្ធសមស្របដូចជា ភ្លើងអគ្គិសនី ទឹកស្អាត ហើយជាពិសេសនោះ គឺឆ្ងាយពីមណ្ឌលសម្រាប់សេវាថែទាំសុខភាពរបស់ពួកគាត់៕