មេដឹកនាំគណបក្សប្រឆាំងចំនួនពីរ មានគណបក្សសមរង្ស៊ី និងគណបក្សសិទ្ធិមនុស្ស បានហៅកិច្ចប្រជុំអន្តរសភាអាស៊ាន លើកទី៣២ ដែលកម្ពុជាធ្វើម្ចាស់ផ្ទះ ចាប់ផ្ដើមពីថ្ងៃទី១៨ ដល់ថ្ងៃទី២៤ ខែកញ្ញា ឆ្នាំ២០១១ ថាមិនចំណេញអ្វីដល់កម្ពុជានោះទេ។
រាជរដ្ឋាភិបាលកម្ពុជាបានផ្ដល់ថវិកាប្រមាណ ១,៣លានដុល្លារអាមេរិក លើគម្រោងស្នើសុំ ១,៩លានដុល្លារអាមេរិក សម្រាប់រៀបចំមហាសន្និបាត ឬកិច្ចប្រជុំ AIPA លើកទី៣២ នៅកម្ពុជា។
លោក សុន ឆ័យ ប្រធានក្រុមតំណាងរាស្ត្រគណបក្សសមរង្ស៊ី និងជាអ្នកតំណាងរាស្ត្រមណ្ឌលភ្នំពេញ។ លោកចាត់ទុកកិច្ចប្រជុំ AIPA ដែលចាប់ផ្ដើមនៅថ្ងៃអាទិត្យ នាទីក្រុងភ្នំពេញ ថាមិនអាចជំរុញឲ្យការគោរពសិទ្ធិមនុស្ស និងប្រព័ន្ធតុលាការប្រទេសកម្ពុជាបានប្រសើរនោះទេ។
លោកបន្តថា កិច្ចប្រជុំនេះ អាចនិយាយថា កម្ពុជាចាយថវិកាជាតិចោលខ្ជះខ្ជាយឥតប្រយោជន៍។ ប៉ុន្តែលោកថា កិច្ចប្រជុំ AIPA នេះ លោកនឹងលើកបញ្ហាប្រឈមរបស់កម្មករ-កម្មការិនីខ្មែរ យកទៅជម្រាបជូនកិច្ចប្រជុំបានដឹង ក្នុងអំឡុងកិច្ចប្រជុំ ៖ «កិច្ចប្រជុំ AIPAនេះ តាមកម្មវិធីរៀបចំ គឺគ្រាន់តែជាការរៀបចំដើម្បីឲ្យអ្នកមកចូលរួមទទួលបានការធ្វើដំណើរកម្សាន្ត គឺអស់ទឹកប្រាក់ច្រើនណាស់។ ឯខ្លឹមសារនៃការប្រជុំ AIPAនេះ យើងឃើញហើយគឺមានចេញជាសេចក្ដីប្រកាសជាច្រើន ក៏ប៉ុន្តែសកម្មភាពជំរុញឲ្យមានការនាំដល់ភាពប្រសើរឡើងនៃប្រទេសក្នុងសហគមន៍ដូចជាវិស័យសិទ្ធិមនុស្ស វិស័យការគោរពច្បាប់ វិស័យនៃការពង្រឹងរដ្ឋបាល ឲ្យមានការបម្រើប្រជារាស្ត្រឲ្យបានត្រឹមត្រូវនោះ ហាក់ដូចជា AIPA មិនបានបំពេញតួនាទីរបស់ខ្លួនឲ្យបានត្រឹមត្រូវទេ»។
មិនខុសគ្នាទេ លោក កឹម សុខា ប្រធានគណបក្សសិទ្ធិមនុស្ស និងជាអ្នកតំណាងរាស្ត្រមណ្ឌលកំពង់ចាម។ លោកបានថ្លែងថា មិនបានគាំទ្រកិច្ចប្រជុំ AIPA ដែលកម្ពុជាធ្វើជាម្ចាស់ផ្ទះពេលនេះទេ។
លោក កឹម សុខា បានហៅកិច្ចប្រជុំ AIPA ថាជាការរៀបចំរបស់រដ្ឋាភិបាល ដើម្បីលើកមុខមាត់បក្សកាន់អំណាច ប៉ុន្តែមិនបានបម្រើប្រយោជន៍ពលរដ្ឋ និងសង្គមជាតិនោះទេ ៖ «យើងឃើញថា ការប្រជុំថ្នាក់អន្តរជាតិទាំងឡាយ ដែលរៀបចំក្នុងដំណាក់កាលគណបក្សប្រជាជនកាន់អំណាចពេញទីនេះ គឺគេធ្វើគ្រាន់តែបង្ហាញមុខគ្នាគេតែប៉ុណ្ណឹងទេ គេអត់ប្រមូលពហុបក្សយកទៅទេ។ អង្គប្រជុំ១ ដែលជាលក្ខណៈអន្តរជាតិពិតប្រាកដដែលមានតម្លៃទាល់តែបើកឱកាសឲ្យគ្រប់គណបក្សមានអាសនៈក្នុងសភាបញ្ចេញទស្សនៈគ្រប់ជ្រុងជ្រោយទាំងអស់ជាមួយគ្នា។ ហើយបើការរៀបចំការចាត់ចែងចង់លិចមុខលិចមាត់តែខ្លួនឯងពួកយើងខ្ញុំអត់ស្វាគមន៍ទេ»។
ទោះយ៉ាងណា លោក ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភាកម្ពុជា។ លោកបានឲ្យដឹងថា កិច្ចប្រជុំ AIPA នឹងផ្ដោតសំខាន់លើបញ្ហា៤ចំណុច។ ចំណុចទាំង៤ រួមមាន សេចក្ដីព្រាងសេចក្ដីសម្រេចចិត្តស្ដីពីការពង្រឹងសហគមន៍ សន្តិសុខ នយោបាយអាស៊ាន តាមរយៈបង្កើនសហប្រតិបត្តិការ និងសមាហរណកម្មក្នុងតំបន់។ សេចក្ដីព្រាងនៃសេចក្ដីសម្រេចចិត្តស្ដីពីការជំរុញ និងការកសាងសហគមន៍ឲ្យមានទំនុកចិត្តតាមរយៈភាពរឹងមាំនៃសាមគ្គីភាពរបស់អាស៊ាន ដើម្បីវិបុលភាពក្នុងតំបន់។ សេចក្ដីព្រាងនៃសេចក្ដីសម្រេចចិត្តស្ដីពីរបាយការណ៍នៃកិច្ចប្រជុំអ្នកនយោបាយ AIPA និងរបាយការណ៍នៃកិច្ចប្រជុំរវាងថ្នាក់ដឹកនាំ AIPA និងអាស៊ាន នាកិច្ចប្រជុំកំពូលអាស៊ានលើកទី១៨។
លោក ជាម យៀប បានបន្តថាកិច្ចប្រជុំ AIPA នឹងពិភាក្សាពីបញ្ហាសេដ្ឋកិច្ច និងការអភិវឌ្ឍឆ្ពោះទៅកាត់បន្ថយគម្លាតនៃការអភិវឌ្ឍក្នុងអាស៊ាន ការប្រែប្រួលធាតុអាកាស សេចក្ដីព្រាងសេចក្ដីសម្រេចចិត្តស្ដីពីការពង្រឹងការអនុវត្តច្បាប់បង្ក្រាបការជួញដូរមនុស្ស តួនាទីសមាជិកសភានៃប្រទេសសមាជិក AIPA ក្នុងការពន្លឿនការអនុវត្តគោលដៅអភិវឌ្ឍសហស្សវត្សឱ្យបាន ក្នុងឆ្នាំ២០១៥ ជាដើម។ លោក ជាម យៀប មានជំនឿថាកិច្ចប្រជុំ AIPA លើកទី៣២ ដែលកម្ពុជាធ្វើម្ចាស់ផ្ទះនឹងទទួលបានជោគជ័យខ្ពស់ជាមិនខាន។
មកទល់ពេលនេះ អន្តរសភាអាស៊ាន ឬ AIPA មានសមាជិកចំនួន ១០ប្រទេស។ សមាជិកទាំង១០ មានដូចជាប្រទេសប្រ៊ុយណេ ឥណ្ឌូណេស៊ី ឡាវ ម៉ាឡេស៊ី ភូមា ហ្វីលីពីន សិង្ហបុរី ថៃ វៀតណាម និងកម្ពុជា។ ក្រៅពីនេះ កិច្ចប្រជុំក៏មានបណ្ដាប្រទេសចំនួន១១ ផ្សេងទៀត ជាគណៈប្រតិភូនៃប្រទេសសង្កេតការណ៍មានដូចជា ប្រទេសអូស្ត្រាលី កាណាដា សាធារណរដ្ឋប្រជាមានិតចិន សភាអឺរ៉ុប និងឥណ្ឌាជាដើម។
លោក ជាម យៀប ក៏បានឲ្យដឹងដែរថា សមាជិក AIPA ទាំង១០ប្រទេស ត្រូវបង់ថវិកាប្រមាណបីម៉ឺន ៥ពាន់ដុល្លារក្នុងមួយឆ្នាំៗ។ រីឯការចំណាយលើការរៀបចំកិច្ចប្រជុំម្ដងៗ ប្រទេសទទួលធ្វើម្ចាស់ផ្ទះជាអ្នកធានារ៉ាប់រងទាំងស្រុង៕