ពិធីហែក្បួននេះធ្វើឡើងបន្ទាប់ពីមានសេចក្ដីរាយការណ៍ថា សកម្មភាពចរាចរណ៍គ្រឿងញៀនកើតឡើងកាន់តែខ្លាំង។
ស្នងការប៉ូលិសខេត្តរតនគិរី លោក រ៉ែ រ៉ៃ មានប្រសាសន៍បញ្ជាក់ថា គឺជាការចាំបាច់ដើម្បីជួយការពារសុខុមាលភាពនិងសេចក្ដីថ្លៃថ្នូររបស់ប្រជាពលរដ្ឋក្នុងខេត្តដែលងាយរងគ្រោះ ៖ «ថ្នាក់ខេត្តមានការព្រួយបារម្ភណាស់...»។
នៅក្នុងឆមាសដើមឆ្នាំ២០០៨នេះស្នងការដ្ឋាននគរបាលខេត្តរតនគិរីរកឃើញសកម្មភាពចរាចរណ៍ជួញដូរនិងប្រើប្រាស់ថ្នាំញៀនក្នុងខេត្ត៩មុខសញ្ញា មានអ្នកប្រើប្រាស់៨០នាក់គឺមានការកើនឡើងបើប្រៀបធៀបទៅនឹងតួលេខឆមាសដើមឆ្នាំ២០០៧កន្លងទៅនេះ មានអ្នកប្រើប្រាស់ត្រឹមតែ៧០នាក់ប៉ុណ្ណោះ។
របាយការណ៍ដដែលឲ្យដឹងដែរថា ក្នុងខេត្តនេះគ្មានទីតាំងផលិតគ្រឿងញៀនទេ តែត្រូវបានគេនាំចូលតាមច្រករបៀងពីប្រទេសលាវ ហើយធ្វើការជួញដូរនិងចែកចាយដោយពុំមានទីតាំងពិតប្រាកដ។
មន្រ្តីស៊ើបអង្កេតសមាគមការពារសិទ្ធិមនុស្សអាដហុក ខេត្តរតនគិរី លោក ប៉ែន ប៊ុណ្ណារ៍ កត់សម្គាល់ថា វិធានការបង្រ្កាបរបស់អាជ្ញាធរពាក់ព័ន្ធទៅនឹងគ្រឿងញៀនកម្រិតទាប។
លោក ប៉ែន ប៊ុណ្ណារ៍ បានមានប្រសាសន៍ថា ៖ «ទំហំនៃការរីករាលដាលហ្នឹងដល់បងប្អូនជនជាតិភាគតិចនៅឆ្ងាយៗទៅហើយ។ ដូច្នេះបញ្ហាជួញដូរគ្រឿងញៀន ប្រើប្រាស់គ្រឿងញៀនមិនធម្មតាទេ»។
គ្រឿងញៀនតាមរបាយការណ៍ស៊ើបអង្កេតរបស់ប៉ូលិសឲ្យដឹងថា ត្រូវបានគេនាំចូលតាមច្រករបៀងពីប្រទេសលាវឆ្លងកាត់ស្រុកសៀមប៉ាង ចូលមកច្រកស្រុកវ៉ឺនសៃ ខេត្តរតនគិរី។ មួយចំណែកនាំចេញពីខេត្តស្ទឹងត្រែងចេញទៅតាមបណ្ដាខេត្តផ្សេងៗទៀត និងចូលមកកាន់ខេត្តរតនគិរី តាមផ្លូវជាតិលេខ៧៨។
អ្នកភូមិជនជាតិដើមឃុំយក្សឡោមដែលចូលរួមហែក្បួននៅព្រឹកថ្ងៃអង្គារមានប្រសាសន៍ថា កំពុងប្រឈមមុខនឹងអំពើហិង្សាបង្ករឿងកាប់សម្លាប់គ្នាដោយសារគ្រឿងញៀន ៖ «គេលក់គ្រឿងញៀនស្អីៗហ្នឹង យើងអត់ដឹងផង ចេះតែផឹកចេះតែស៊ីទៅ ប៉ុន្តែចេញពីផឹកស៊ី អ្នកខ្លះវឹង...។ ...រាល់ថ្ងៃហ្នឹងដើរប្លន់ ដើរលួចហ្នឹង»។
អភិបាលខេត្តរតនគិរី លោក ជ័យ សាយឿន ជាតំណាងឲ្យគណៈកម្មការខេត្តប្រយុទ្ធប្រឆាំងគ្រឿងញៀនទទួលស្គាល់ថា គឺជាការទទួលខុសត្រូវរបស់អាជ្ញាធរមានសមត្ថកិច្ចនៅក្នុងខេត្ត។
លោក ជ័យ សាយឿន បានឲ្យដឹងថា ៖ «បើសិនជាយើងមិនបានធ្វើការផ្សព្វផ្សាយនិងទប់ស្កាត់គ្រប់មូលដ្ឋាន ប្រជាពលរដ្ឋវាអាចនឹងប៉ះពាល់តទៅទៀត»។
របាយការណ៍សន្និបាតក្រសួងមហាផ្ទៃ ឆ្នាំ២០០៨ ឲ្យដឹងថា កាលពីឆ្នាំ២០០៧ ប្រតិបត្តិការបង្រ្កាបគ្រឿងញៀនទូទាំងប្រទេសបាន១៤១ករណី ចាប់បានមនុស្ស២៥៣នាក់ ដកហូតវត្ថុតាងមានមេតំហ្វេតាមីន៣៣១.៥៥៦គ្រាប់ និងម្សៅ៥,៦១គីឡូក្រាម ហេរ៉ូអ៊ីន១៣,៣៧៣គីឡូក្រាម កញ្ឆា២១៣គីឡូក្រាម ប្រេងម្រះព្រៅ៤.១១០លីត្រ និងគ្រឿងញៀន ព្រមទាំងសារធាតុផ្សំនិងវត្ថុតាងជាច្រើនមុខទៀត៕