ក្នុងចំណោមបាតុករខ្មែរប្រមាណ ៥០នាក់ ដែលតវ៉ានៅមុខស្ថានទូតថៃនោះ លោក ថូម៉ាស់ កែវ អគ្គហិរញ្ញិកនៃសមាគមអង្គរ បានមានប្រសាសន៍សម្ដែងនូវគោលបំណងនៃការតវ៉ាថា ៖ «ខ្ញុំគឺមកពីសមាគមអង្គរ នៅប្រចាំរដ្ឋធានីវ៉ាស៊ីនតោនឌីស៊ី និង ម៉ារីឡែន។ ការធ្វើបាតុកម្មថ្ងៃនេះ គឺយើងមានបំណង៣ សំខាន់បំផុត គឺទី១ យើងសុំឲ្យរដ្ឋាភិបាលថៃ ទទួលស្គាល់នូវច្បាប់របស់ខ្លួន ដែលបានស៊ីញ៉េនៅខែ៧ ថ្ងៃទី៨ ឆ្នាំ២០០៨។ ទី២ គឺចង់ឲ្យរដ្ឋាភិបាលថៃ ដកទ័ពចេញពីទល់ដែនពីព្រះវិហារ។ ទី៣ គឺយើងមិនចង់ឲ្យមានសង្រ្គាម»។
លោកបញ្ជាក់ថា ក្រៅពីការមកចូលរួមផ្ទាល់តវ៉ាចាប់ពីម៉ោង ១០ព្រឹក ដល់ម៉ោង២ រសៀល ថ្ងៃចន្ទ ទី១១ ខែសីហា ក៏នៅមានខ្មែរជាច្រើន នៅរដ្ឋដទៃៗទៀតក្នុងសហរដ្ឋអាមេរិក បានទូរស័ព្ទសម្ដែងការលើកទឹកចិត្ត និងគាំទ្រដល់ការតវ៉ាផងដែរ ដើម្បីឲ្យថៃដកកងទ័ពចេញ ហើយនិងឲ្យមានសន្តិភាព។
លោក ថូម៉ាស់ កែវ មានប្រសាសន៍បន្ថែមថា ៖ «ខ្លះមកពីគណៈកម្មការផ្សេង ហើយក្នុងនោះមានសមាគមខ្មែរ មកពីរដ្ឋដទៃ មិនបានមកចូលរួមទេ ក៏ប៉ុន្តែ គេបានទូរស័ព្ទមកចូលរួមជួយគាំទ្រ ដូចជា តិចសាស់ កាលីហ្វ័រញ៉ា ផែនស៊ីលវេនៀ»។
នៅមុខស្ថានទូតថៃ ដែលស្ថិតនៅអគារលេខ១០២៤ មហាវិថី Wisconsin Ave. រដ្ឋធានីវ៉ាស៊ីនតោន ឌីស៊ី បាតុករខ្មែរដែលបានចូលរួមក្នុងបាតុកម្ម បានសម្ដែងនូវគោលបំណងរបស់ខ្លួនថា ៖ «ខ្ញុំឈ្មោះ សូ ឡុង ពីដើមខ្ញុំនៅខេត្តសៀមរាប អង្គរវត្ត។ ខ្ញុំមកថ្ងៃនេះ ដើម្បីជួបជុំគ្នា ខ្មែរយើងទាំងអស់ មកតវ៉ាឲ្យថៃ ដកទ័ពពីដែនដីខ្មែរយើង ជាពិសេស គឺនៅវត្តព្រះវិហារ វាមកឈ្លានពានដីខ្មែរយើង ឲ្យវាដកទ័ពក្នុងពេលឆាប់ៗនេះ។ ខ្ញុំឈ្មោះ ម៉ូនីកា នៅរដ្ឋវ៉ាស៊ីនតោន ឌីស៊ី។ យើងខ្ញុំមកហ្នឹង ដើម្បីមកធ្វើបាតុកម្ម ដើម្បីទាមទារឲ្យថៃគោរពអង្គការយូណេស្កូ ហើយឲ្យថៃដកទ័ពចេញពីទឹកដីខ្មែរយើង ដែល[ថៃ]កំពុងតែចូលនៅព្រះវិហារឥឡូវហ្នឹង...»។
បាតុកម្មប្រឆាំងថៃ បានចប់បន្ទាប់ពីតំណាងបាតុករ បានជូនញត្តិតវ៉ា ដែលមានចុះហត្ថលេខាផង ជូនទៅតំណាងស្ថានទូតថៃ៕