ក្រុមអង្គការសង្គមស៊ីវិលធ្វើការពាក់ព័ន្ធការងារប្រយុទ្ធប្រឆាំងអំពើពុករលួយបានជួបជុំគ្នានាទីលានប្រជាធិបតេយ្យ ក្នុងទីក្រុងភ្នំពេញ នៅព្រឹកថ្ងៃទី៩ ខែធ្នូ ដើម្បីរៀបចំទិវាអន្តរជាតិប្រឆាំងអំពើរលួយ ដោយបានអំពាវនាវឲ្យពលរដ្ឋចូលរួមលុបបំបាត់អំពើពុករលួយតាមរយៈ «ត្រូវមានបង្កាន់ដៃបង់ប្រាក់ពីសេវាសាធារណៈ»។ លោកបន្តថា រាល់ការចំណាយប្រាក់ទៅឲ្យមន្ត្រីរាជការក្នុងជួររដ្ឋាភិបាល ទៅលើការងារអ្វីមួយត្រូវមានបង្កាន់ដៃឲ្យបានគ្រប់ៗគ្នា។
លោក សន ជ័យ មន្ត្រីសម្របសម្រួលបណ្ដាញរួបរួម ដើម្បីគណនេយ្យភាពសង្គមនៅអាស៊ីបូព៌ា និងប៉ាស៊ីហ្វិក មានប្រសាសន៍ក្នុងពិធី ក្រៅពីបានស្នើឲ្យពលរដ្ឋទូទាំងប្រទេសចូលរួមទប់ស្កាត់អំពើពុករលួយ មន្ត្រីរូបនេះក៏បានអំពាវនាវដល់មន្ត្រីរាជការ ក៏ដូចជាប៉ូលិសចរាចរណ៍មួយចំនួន ឲ្យចូលរួមទប់ស្កាត់អំពើពុករលួយឲ្យបានគ្រប់គ្នា។ មានន័យថា ត្រូវបញ្ឈប់ការផាកពិន័យចរាចរណ៍លើសច្បាប់បានកំណត់ និងត្រូវមានវិក្កយបត្រផាកពិន័យឲ្យបានត្រឹមត្រូវ។
លោក សន ជ័យ បានអំពាវនាវបន្ថែមដូច្នេះ ៖ «រឿងដែលខ្លួនបានជួបប្រទះ ឬត្រូវគេបង្ខំ ហើយប្រជាពលរដ្ឋត្រូវតាំងចិត្តថា ខ្លួនមិនសូកប៉ាន់នៅពេលដែលខ្លួនទៅទទួលសេវាសាធារណៈ ហើយហ៊ានរាយការណ៍ព័ត៌មានទាំងឡាយនៃអំពើពុករលួយតាមរយៈសរសេរជាសំបុត្រផ្ញើជូនអង្គភាពប្រឆាំងអំពើពុករលួយ»។
លោក វ៉ន ពៅ ប្រធានសមាគមប្រជាធិបតេយ្យសេដ្ឋកិច្ចក្រៅប្រព័ន្ធ ដែលមានក្រុមអ្នករត់ម៉ូតូ ស៊ីក្លូ រ៉ឺម៉ករាប់ពាន់នាក់ជាសមាជិក ក៏បានស្នើដល់សមាជិករបស់ខ្លួនឲ្យចូលរួមទប់ស្កាត់អំពើពុករលួយ តាមរយៈការទាមទារវិក្កយបត្រនៅពេលពួកគេចំណាយថវិកាទៅលើសេវាសាធារណៈ ឬក៏ការផាកពិន័យអ្វីមួយ។
លោក វ៉ន ពៅ មានប្រសាសន៍ថា ៖ «ថ្ងៃនេះយើងត្រូវតែចូលរួមទាំងប្រជាពលរដ្ឋ ទាំងមន្ត្រីរាជការតូចតាចទាំងអស់ រួមគ្នាប្រយុទ្ធប្រឆាំងអំពើពុករលួយ ដើម្បីកុំឲ្យអំពើពុករលួយញាំញីដល់ប្រជាពលរដ្ឋតូចតាច ជាពិសេសអ្នកដឹកជញ្ជូន អ្នកលក់ដូរនៅតាមដងផ្លូវ ដែលជាសមាជិករបស់សមាគម ក៏ដូចជាអ្នកផ្សេងៗទៀតនៅទូទាំងប្រទេសកម្ពុជាផងដែរ»។
ស្ត្រីឈ្មោះ ធី សារិន ជាប្រជាពលរដ្ឋរស់នៅស្រុកកំចាយមារ ខេត្តព្រៃវែង បានអះអាងថា រាល់ថ្ងៃនេះការផាកពិន័យរបស់ប៉ុលិសចរាចរណ៍នៅខេត្តព្រៃវែង ជាពិសេសនៅស្រុកមេសាង ប៉ូលិសបានស្ទាក់ផាកពិន័យទៅលើម៉ូតូដែលអត់កញ្ចក់ ឬស្លាកលេខ គឺមិនបានចេញវិក្កយបត្រជូនពលរដ្ឋនោះទេ។
ស្ត្រីឈ្មោះ ធី សារិន មានប្រសាសន៍បន្ត ៖ «គ្មានឲ្យប័ណ្ណទេ យកតែលុយតែម្ដងរាល់ថ្ងៃ ហើយសិស្សមិនសូវដែលបានទៅរៀនទេ សិស្សសាលា»។
ទាក់ទងបញ្ហានេះ លោក សុក សំអឿន ប្រធានសម្ព័ន្ធដើម្បីសុចរិតភាព និងគណនេយ្យភាពសង្គម ដែលបានចូលរួមជាវាគ្មិន ក៏បានស្នើទៅមន្ត្រីសាធារណៈក្នុងជួររដ្ឋាភិបាលបច្ចុប្បន្នមួយចំនួន ដែលបានប្រព្រឹត្តអំពើពុករលួយ សូមឲ្យបញ្ឈប់ និងចូលរួមទប់ស្កាត់អំពើពុករលួយឲ្យបានគ្រប់គ្នា ដើម្បីភាពរុងរឿងសម្រាប់ទាំងអស់គ្នា និងសង្គមជាតិ។
លោក សុក សំអឿន ដែលជាប្រធានក្រុមអ្នកច្បាប់ការពារសិទ្ធិកម្ពុជាផងនោះ បានថ្លែងថា អ្នកប្រព្រឹត្តអំពើពុករលួយ ប្រសិនបើរកឃើញកំហុសនៅក្នុងការងាររបស់ខ្លួននឹងត្រូវប្រឈមការពិន័យតាមផ្នែករដ្ឋបាល ឬក៏អាចជាប់ពន្ធនាគារ ចំពោះកំហុសពុករលួយធ្ងន់ធ្ងរ។
លោក សុក សំអឿន មានប្រសាសន៍ដូច្នេះ ៖ «ដើម្បីឲ្យការប្រយុទ្ធប្រឆាំងអំពើពុករលួយមានជោគជ័យទៅបាន លុះត្រាតែមានការចូលរួមពីប្រជាជនទាំងអស់គ្នា។ មានការចូលរួមពីមន្ត្រីរាជការទាំងអស់គ្នា មានការគាំទ្រពីសង្គមស៊ីវិល និងមានការគាំទ្រពីថ្នាក់ដឹកនាំនយោបាយ»។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ធ្លាប់បានឲ្យដឹងពីប្រភេទបទល្មើសពុករលួយ ហើយត្រូវប្រឈមមុខច្បាប់ មានដូចជាការផាកពិន័យរបស់ប៉ូលិសមិនផ្ដល់វិក្កយបត្រជាដើម។
នៅក្នុងទិវាប្រយុទ្ធប្រឆាំងអំពើពុករលួយលើកទី៧ ថ្ងៃទី៩ ធ្នូនេះដែរ ពលរដ្ឋ និងនិស្សិតដែលបានចូលរួមរាប់រយនាក់ បានថ្លែងថា ពួកគេនឹងចូលរួមចំណែកដើម្បីទប់ស្កាត់អំពើពុករលួយនៅកម្ពុជា ឲ្យបានប្រសើរឡើង។ មានន័យថា រាល់ការចំណាយណាមួយរបស់ពួកគេទៅឲ្យមន្ត្រីសាធារណៈ រដ្ឋាភិបាលត្រូវតែមានបង្កាន់ដៃថ្លៃចំណាយឲ្យបានគ្រប់ចំនួន៕