លោក ភូ ពុយ ឲ្យដឹងថា ស្រូវថ្មីបង្កើនរដូវកំពុងតែច្រូតហើយ នៅតែ ១ខែទៀតស្រូវកណ្ដាល ក៏នឹងទុំ ដូចនេះអង្ករមិនខ្វះទេ បើទោះបីមានទឹកជំនន់លិចស្រូវនៅខេត្តផលិតស្រូវមួយចំនួនក៏ដោយ។ លោកអំពាវនាវយ៉ាងដូច្នេះ នៅពេលដែលក្រុមហ៊ុនបៃតងកម្ពុជា ដឹកអង្ករមកលក់ចំនួន ៦កន្លែងក្នុងក្រុងភ្នំពេញ ដើម្បីទប់កុំឲ្យឈ្មួញដំឡើងថ្លៃអង្ករ លក់យកចំណេញ។
លោក ភូ ពុយ បន្ថែមថា ២ថ្ងៃនៃការលក់អង្កររបស់ក្រុមហ៊ុនបៃតងកម្ពុជា បានលក់អង្ករដាច់ជិត ៣០០តោន។ លោកបញ្ជាក់ថា អង្ករនឹងលក់បន្តរហូតដល់ពលរដ្ឋផ្អាកការទិញអង្ករ៖ «តម្លៃលក់នេះគឺយើងមិនលក់ទាបពេកនោះទេ គឺលក់ក្រោមទីផ្សារសេរីតិចតួច ដើម្បីយើងទប់កុំឲ្យវាឡើងថ្លៃតទៅទៀត។ ឃើញថា យើងលក់២ថ្ងៃនេះមក អ្នកលក់អង្ករតាមស្តង់មួយចំនួនក៏គាត់បានបន្ទាបតម្លៃដែរហើយ»។
តំណាងក្រុមហ៊ុនបៃតងកម្ពុជា ដែលឈរលក់អង្ករនៅមុខស្ថានីយរថភ្លើងក្នុងសង្កាត់ស្រះចក ក្រុងភ្នំពេញ បានកំណត់លក់អង្ករជូនក្នុងម្នាក់តែ ១បាវទេ ទោះបីទម្ងន់ ២៥គីឡូ ឬ៥០គីឡូក៏ដោយ។
ពលរដ្ឋបានឈរតម្រង់ជួរដើម្បីទិញអង្ករនៅមុខស្តង់អង្ករឲ្យដឹងថា តម្លៃលក់របស់ក្រុមហ៊ុនថោកជាងតម្លៃឈ្មួញកំពុងលក់ប្រមាន ៣ដុល្លារក្នុង១បាវ ៥០គីឡូក្រាម។
លោក ភារុន ថ្លែងថា អង្ករផ្កាម្លិះ ក្រុមហ៊ុនលក់បែងចែកច្រើនប្រភេទ ប៉ុន្តែគាត់រើសយកតម្លៃអង្ករ ៣១,៧៨ដុល្លារ ក្នុង ១បាវទម្ងន់ ៥០គីឡូក្រាម៖ «អរគុណហើយដែលរដ្ឋាភិបាលបានគិតគូរពីប្រជារាស្ត្រយើងទាំងអស់គ្នាហ្នឹង កុំឲ្យមានឈ្មួញឡើងថ្លៃទៅថ្ងៃក្រោយ»។
អ្នកស្រី ពៅ នៅខណ្ឌឫស្សីកែវ ឲ្យដឹងថា សាលារាជធានីភ្នំពេញ សហការជាមួយក្រុមហ៊ុនបៃតងកម្ពុជា បញ្ចេញអង្ករលក់មកឲ្យពលរដ្ឋក្នុងពេលប្រទេសកម្ពុជា កំពុងទឹកជន់លិច គឺជាការជួយសង្គ្រោះប្រជាពលរដ្ឋទាន់ពេលផង និងដើម្បីទប់តម្លៃឈ្មួញអង្ករកុំឲ្យឡើងថ្លៃបានផង៖ «តាមទីផ្សារវាថ្លៃជាង។ ថ្លៃជាងក្នុង ១បាវ បើតាមខ្ញុំគិត ប្រហែលជា ១ម៉ឺន ទៅ ១ម៉ឺន២ពាន់រៀលអីហ្នឹង»។
លោក សុជា នៅខណ្ឌទួលគោក ឲ្យដឹងថា គាត់ទិញអង្ករផ្កាខ្ញីថ្លៃ ១៣៥.០០០រៀលក្នុងមួយបាវ ទម្ងន់ ៥០គីឡូក្រាម គឺថោកជាងឈ្មួញលក់។ លោកថា តម្លៃទីផ្សារអង្ករផ្កាខ្ញីក្នុងពេលបច្ចុប្បន្នថ្លៃជិត ១៥ម៉ឺនរៀល ក្នុង ៥០គីឡូដូចគ្នានេះ៖ «ខ្ញុំគ្រាន់តែឃើញគេបញ្ចុះតម្លៃអ៊ីចឹងទៅ ខ្ញុំក៏មកទិញ។ ដូចជាសាលាក្រុងគេមកជួយបញ្ចុះតម្លៃ ដូចហាងឆេងគេខ្ពស់ទៅ ខ្ញុំឃើញតម្លៃគេថោកជាង ហាងឆេងអង្ករខ្ញុំក៏មកទិញ»។
ប្រធានអង្គការសេដាក លោកបណ្ឌិត យ៉ង សាំងកុមារ ថ្លែងកាលពីថ្ងៃ១៧ ខែតុលា ថា កម្ពុជាជាប្រទេសបានរងគ្រោះដោយទឹកជំនន់នៅឆ្នាំ២០១១នេះ។ ប៉ុន្តែមិនប៉ះពាល់ដល់ការនាំអង្ករចេញទេ។
ខេត្តមួយចំនួនធំនៅប៉ែកនិរតី មិនមានទឹកជំនន់ទេ កសិករកំពុងតែប្រមូលស្រូវបង្កើនរដូវ និងស្រូវប្រាំងច្រើនលើសពីសព្វមួយដង ដោយសារអំណោយទឹកភ្លៀងធ្លាក់មកល្អតាំងពីដើមឆ្នាំ។
លោកសុំឲ្យពលរដ្ឋកុំភ្ញាក់ផ្អើលទិញអង្ករស្ដុកទុក។ លោកថា ខេត្តកំពត តាកែវ ខេត្តកំពង់ស្ពឺ ជាដើម កំពុងញាប់ដៃប្រមូលផលស្រូវដែលជាហេតុបញ្ជាក់ថា ស្រូវនឹងមិនខ្វះ។
របាយការណ៍ចុងក្រោយពីគណៈកម្មាធិការជាតិគ្រប់គ្រងគ្រោះមហន្តរាយ ឲ្យដឹងថា ស្រូវជាង ៥សែន៩ម៉ឺនហិកតារ បានលិចទឹកជំនន់ ក្នុងនោះស្រូវជាង ២សែនហិកតារទៀតបានរលួយដោយសារទឹកជំនន់៕